Ehe, tsy mitovy fivavahan̈a jiaby. Amy Baiboly ao mikoran̈a karazan̈a fivavahan̈a maro tsy namparavoravo Zan̈ahary. Raha aroe ty mampiavaka iro fivavahan̈a aby zen̈y.

Raha 1: Fivavahan̈a manompo zan̈ahary tsy izy

 Koran̈iny Baiboly fa fanompoan̈a iro zan̈ahary tsy izy aby io “hevitry diso”, “raha tsisy dikany” ndreky “tsisy ilan̈a izy.” (Jeremia 10:3-5; 16:19, 20) Jehovah a Zan̈ahary nivolan̈a karaha ty tamy firenenany Israely: “Aza manan̈a Zan̈ahary hafa, izikoa tsy zaho fo.” (Eksodosy 20:3, 23; 23:24) Iro Israelita aby io koa fa nanompo zan̈ahary hafa, “Jehovah neloko tamindro.”​—Nomery 25:3; Levitikosy 20:2; Mpitsara 2:13, 14.

 Mbala karaha zen̈y fo ataony Jehovah aminolo manompo iro raha “an̈arany zan̈ahary” fo io. (1 Korintianina 8:5, 6; Galatianina 4:8) Izy nivolan̈a fa olo jiaby manompo izy tsy mila miaraka aminolo man̈araka fivavahan̈a diso. Ho izy: “Ke miboaha anaro, misaraha aminany.” (2 Korintianina 6:14-17) Mba nivolan̈a zen̈y edy Zan̈ahary izikoa mitovy fo fivavahan̈a jiaby?

Raha 2: Fanompoan̈a Zan̈ahary marin̈y kanefa tsy mifan̈araka amy fomba itiavany izy

 Taloha tan̈y, nisy fotoan̈a iro Israelita aby io salakady nanompo Jehovah baka io nanompo iro zan̈ahary tsy izy aby io ke Jehovah tsy nankasitraka raha nataondro zen̈y. (Eksodosy 32:8; Deoteronomia 12:2-4) Jesosy koa nasiaka iro pitariky fivavahan̈a aby io fotony iro tsy nety fomba nanompoandro Zan̈ahary. Iro man̈ano lamba miavaka han̈aboahan̈a aminolo fa iro mivavaka, kanefa iro mihatsaravelatsihy ke iro tsy man̈ano raha ‘farany maventy amy Lalàn̈a, tsy ino zen̈y fa fan̈anovan̈a ny rariny ndreky mafatoky.’​—Matio 23:23.

 Aminy andra izioty koa, fivavahan̈a man̈araka fahamarin̈ana amy Baiboly ao fo man̈ampy olo hifandray amy Zan̈ahary. (Jaona 4:24; 17:17; 2 Timoty 3:16, 17) Mahay miala lavitry Zan̈ahary fo olo azony fivavahan̈a mampianatra raha tsy mifan̈araka amy Baiboly io. Maro fampianaran̈a sambaranolo baka amy Baiboly, kanefa izio baka aminolo manompo zan̈ahary tsy izy aby io. An̈isany fampianaran̈a zen̈y Zan̈ahary tokana olo telo, fan̈ahy tsy mety maty ndreky motrobe. Amy fivavahan̈a mampianatra raha karaha zen̈y, didiny Zan̈ahary soloandro fampianaran̈anolombelon̈o, ke tsy aminany foeky fomba fanompoandro Zan̈ahary.​—Marka 7:7, 8.

 Zan̈ahary tsy tia fivavahan̈a mihatsaravelatsihy aby io. (Titosy 1:16) Izikoa fivavahan̈a araiky tihan̈ampy olo han̈aton̈o Zan̈ahary, tokony ho iro antsendriky man̈araka raha ampianarindro, fa tsy raha mandrisiky olo han̈araka fombafomba fo. Ohatra, karaha ty koran̈iny Baiboly: “Izikoa misy olo mivolan̈a fa izy pivavaka amy Zan̈ahary, kanefa izy tsy man̈isy lamboridy lelanany, izy mamitaka fonany, ke tsisy varany fanompoan̈anany. Amy Zan̈ahary Babantsika, karaha ty fivavahan̈a madio sady tsisy loto: Mikarakara olo kamboty ndreky man̈angy maty vady amy fahorian̈andro, avio miaro ten̈a fo baka tsy havoa tasiny donia ty.”​—Jakoba 1:26, 27.