Ehe. Tany ty tsy ho potiky, tsy ho ravan̈a motro, avio tsy hisoloan̈a hafa. Baiboly mivolan̈a fa niasany Zan̈ahary tany ty hipitrahanolo mandrakizay.

•   “Olo marin̈y handova tany, ke hipetraka iô tsisy farany.”​—Salamo 37:29.

•   “Izy niasa tany ty, nataony fatatra tsarabe fototronany, baka tsy ho voahozongozon̈o mandrakizay.”​—Salamo 104:5.

•   “Tany ty ndraiky maharitry mandrakizay.”​—Mpitoriteny 1:4.

•   ‘Zan̈ahary namolavola tany ndreky Pan̈amboatra izio, nan̈ano izio mafy orin̈y tsarabe, ... tsy raha tsisy antony niasany izio fa nataony hipitrahanolo.’​—Isaia 45:18.

 Zan̈ahary tsy han̈omba olo han̈apotiky tany ty amy fandotovan̈a tontolo iain̈ana, lagera ndreky raha hafa. Izy ‘handripaka lan̈iany olo mandrobaka tany ty.’ (Apokalypsy 11:18) Akory han̈anaovany zen̈y?

 Hisoloany Fanjakan̈a lavorary andan̈itry an̈y fanjakan̈anolombelon̈o jiaby, ke Fanjakan̈anany io hahavita hiaro tany ty. (Daniela 2:44; Matio 6:9, 10) Jesosy Kristy, Zanaka Zan̈ahary ho pitondra amy Fanjakan̈a io. (Isaia 9:6, 7) Tamy Jesosy tambony tany teto, izy nan̈ano fahagagan̈a nan̈aboahany fa izy manan̈a angovo mahavita mifehy angovony natira. (Marka 4:35-41) Jesosy Panjakany Fanjakan̈any Zan̈ahary io, ke izy hahavita hamehy tany jiaby ndreky raha jiaby misy amizio. Izy han̈ova fiain̈ana ambony tany eto, hataony ho mira fiain̈ana tamy zaridain̈y Edena in̈y.​—Matio 19:28; Lioka 23:43.

 Aha. Baka amy tsy fazahoanolo dikany raha koran̈iny Baiboly amy 2 Petera 3:7 mahavy olo mivolan̈a zen̈y. Karaha ty ho izy ao: ‘Lan̈itry ndreky tany izioty io atokan̈a aminandra fitsaran̈a olo aby tsy mavozo Zan̈ahary io.’ (2 Petera 3:7) Diniha baka hevitry maventy aroe ty baka hazava amintsika dikany volan̈a aby io:

1.   Ndraikindraiky Baiboly koa fa mivolan̈a “lan̈itry” na “tany” na “motro”, raha hafa tiany koran̈iny. Ohatra, koran̈iny Genesisy 11:1: “Mbala volan̈a araiky fo nampiasainy tany jiaby, ke mira fo volan̈a nampiasaindro.” Olombelon̈o raha tiany koran̈iny amy “tany” io.

2.   Izikoa volan̈a man̈odidin̈y andininy amy 2 Petera 3:7 zahan̈a, tsy arabakiteny lan̈itry, tany, ndreky motro koran̈iny ao. Andininy 5 ndreky 6 ao mikoran̈a Safodrano tamy faha Noa. Tamy zen̈y baka, olo ratsy fan̈ahy fo naty fa tany ty tsy ravan̈a. “Tany” ivolan̈any olo ratsy fan̈ahy aby io amy Genesisy 6:11 ao. Safodrano in̈y nandravan̈a “lan̈itry”, tsy azovy zen̈y fa iro olo pitondra tamy zen̈y. Iro olo ratsy fan̈ahy aby io fo ripaka fa tsy tany ty ravan̈a. Noa ndreky fianakavian̈anany tamy zen̈y tsy naty ke mbala nipetraka tambony tany teto fo, izikoa fa vita Safodrano.​—Genesisy 8:15-18.

 Karaha nataony ranobe tamy Safodrano in̈y, “motro” koran̈iny 2 Petera 3:7 io hivolan̈ana fandripahan̈a iro olo ratsy fan̈ahy ambony tany eto, fa tsy handravan̈a tany ty. Zan̈ahary mampan̈anten̈a “lan̈itry vaovao ndreky tany vaovao, ny marin̈y fo hanjaka amy zen̈y.” (2 Petera 3:13) “Lan̈itry vaovao” na Fanjakan̈any Zan̈ahary io hanjaka amy “tany vaovao” na iro olo marin̈y ho tavela ambony tany eto. Amy zen̈y, tany hanjary Paradisa tsara.​—Apokalypsy 21:1-4.