Taloha irô manam-pahaizan̈a momba siansy aby io nieritreritry fa mamin’ny folera tsitsefin’ny kôlibrỳ amy lelany. Fa tafara tatỳ, hitandrô fa kaiky mbala be pitsopitson’izen̈y fomba fangalan’ny vôron̈o io mamin’ny folera. Asiany fandriky izio.

 Diniha hely baka: Lelan’ny kôlibrỳ koa fa mikasiky mamin’ny folera direkty vaky aroe. Amy tendrony tsiaraikiaraiky misy raha mahay mibian̈a ndreky mifody. Izikoa izio mikasiky amy mamin’ny folera direkty mibian̈a sady mangala mamin’ny folera. Fa mifanohitry amy zen̈y ndraiky raha miboaka izikoa miala an̈atin’ny mamin’ny folera ao lelan’ny vôron̈o io. Mifody tendron’ny lelanany ke voafandriky ao mamin’ny folera. Safe tsy tsitsefin’ny vôron̈o io mamin’ny folera fa fandrihiny an̈atin’ny lelanany.

 Alejandro Rico-Guevara, ndreky Tai-Hsi Fan, aviô Margaret Rubega, manam-pahaizan̈a mpan̈ano fikarohan̈a, nivolan̈a fa latsakan’ny ampahafolon’ny segondy fotoan̈a impodimpodianan’ny lelan’ny kôlibrỳ man̈ano raha zen̈y. Nivolan̈a koa ho irô fa tendron’ny lelan’ny vôron̈o io fitaovan̈a ten̈a mahomby angalany mamin’ny folera. Izio mahavita mibian̈a ndreky mifody malaky isaka mikasiky na miala an̈atin’ny ranon-draha ao.”

 Ankoatran’izen̈y, tsy mila mampiasa angôvo aby vôron̈o hely io koa fa man̈ano zen̈y. Fa isaka lelanany miditry na miboaka an̈atin’ny ranon-draha, tendron’ny lelanany mivaky aroe mampiditry maminy aviô mifody.

 Hain’ny lelan’ny kôlibrỳ tsarabe mamandriky ranon-draha amy lelanany, ke irô manam-pahaizan̈a aby io mieritreritry hangala tahaka izio han̈amboaran̈a fitaovan̈a ilain̈y amy fitahan̈a, an̈amboaran̈a robot na raha hafa. Izio koa mety man̈ampy koa fa man̈amboatra fitaovan̈a fan̈adiovan̈a ranon-draha na menaka very.

 Akôry ho anao? Baka amin’ny evôlision ma nahavy lelan’ny kôlibrỳ be tsipiriany be io, sa izio nisy namôron̈o?