Karazany makoba aby kahian̈a “Manta”, lera irô milomon̈o in̈y sady mihina fo. Tsintsefiny amy vavany ranomasin̈y ndreky irô biby madiniky be aby io, ke mandalo amy raha karaha sivan̈a amy tendanany ao. Sivan̈a io amin-jay man̈avaka biby madiniky aby io ke lôso hanin̈y, fa rano ndraiky mbala monohy mandalo amy sivan̈a io fo, ke miboaka amin’ny isaisan’ny makoba io. Aviô ndray helihelin’ny mason’ny sivan̈a io biby madiniky aby io, mbala vitan’ny sivan̈a io fo man̈avaka irô. Mivolan̈a i Ed Yong, mpan̈ano gazety momba siansy fa “raha karaha tsy ho posibla foeky zen̈y.”

 Diniha baka ty: Sivan̈a io karaha antsasaka raha boribory dimy aby. Tsiaraikiaraiky amin’ny antsasaka raha boribory io karaha pain̈y, ke misy nifinifiny aby andan̈iny aroe amizio. Mitodiky mandeha aloha sasany amy nifinifiny io, fa sasany ndraiky mitodiky man̈afara. Irô nifinifiny io man̈avaka rano tafiditry am-bavan’ny makoba io. Mandalo an̈abon’ny nifinifiny io ampahany amy rano, fa lambiny ndraiky tafiditry an̈elan̈elany, ke lôso misy rano mihodinkodin̈y am-bavan’ny makoba io ao.

 Izikoa fa indesin’ny rano mihodinkodin̈y io hanin̈y aby io, mikon̈o amy sisin’ny nifinifiny io. Ke lôso amy tendan’ny makoba io fo izio amy farany, ke ateliny an̈y. Ndray raha manan̈ain̈y hely be, tôkony ho tafiditry an̈elan̈elan’ny nifinifiny io, mbala lôso amy tendan’ny makoba io fo. Mandeha malaky be baka izio izikoa fa indesin’ny rano io mihodikondin̈y, ke mikon̈o amy nifinifiny io. Ke ndray raha faran’ny madiniky tsy very man̈araka rano io, fa mbala lôso hanin̈in’ny makoba io fo.

 Fan̈ampin’izen̈y koa, nata makoba io mandeha mare be na maro be biby madiniky ampidiriny am-bava, sivan̈a io tsy mety tsentsin̈y aviô mahavita man̈adio ten̈a.

 Man̈anten̈a irô mpikaroko aby io fa hahavita han̈amboatra sivan̈a mitovy fomba fiasan’ny sivan̈a am-bavan’ny makoba io. Tiandrô raha zen̈y hampiasain̈a han̈adiovan̈a rano aviô han̈avahan̈a pôtipôtiky plastiky mety mahafaty an̈atin’izio.

 Akôry hevitrinao? Navinavy ho azy ma sivan̈a am-bavan’ny makoba io, sa nisy namôron̈o?