Karaha ty nisoratin’i apostoly Paoly: “Zaho koa fa man̈iry han̈ano ny tsara, ny ratsy tsy afaka an̈atiny ain̈inaka ato.” (Romanina 7:21) Anao efa navy nahatsapa karaha zen̈y? Izikoa ia, lahatsoratra ty afaka man̈ampy anao tsy ho resin’ny fakam-pan̈ahy han̈ano raha ratsy.

•  Raha tsara ho hainao

•  Raha mety ataonao

•  Hevitrin’ny tanora karaha anao

 Fitaoman̈an’ny naman̈a io matetiky mitondra fakam-pan̈ahy. Baiboly lastiô mivolan̈a fa ‘naman̈a ratsy mandrobaka fitondran-ten̈a tsara.’ (1 Korintianina 15:33, lamariky amy pazy ambany) Baka amy naman̈a na raha hita amy tele mety hahavy anao han̈iry han̈ano raha ratsy ndreky mety hahavy anao ‘han̈araka raha fataon’olo man̈ano raha ratsy.’​—Eksodosy 23:2.

 “Tsisy olo tihahilikilikin’olo, ke zen̈y mahavy anao manjary tafihan̈araka raha jiaby ataondrô. Tianao baka izikoa anao tiandrô ndreky ikendrô ho namandrô.”​—Jeremy.

 Diniha ty: Nan̈ino ho sarotro aminao handresy fakam-pan̈ahy izikoa anao miasaloha be amy raha iritriretin’olo momba anao?​—Ohabolana 29:25.

 Aza adin̈a ty: Naman̈a aza ambela hampivadiky anao amy raha inoanao.

 Diniha ino raha inoanao. Izikoa tsy hainao raha inoanao, anao manjary ataon’olo papoety ke manjary irô mibaiko anao. Ke tsara izikoa arehanao raha koran̈in’ny Baiboly ty: “Aleva antoko aby raha jiaby, ke aza avôsotro ny tsara.” (1 Tesalonianina 5:21) Ho moramora aminao han̈araka raha inoanao izikoa izio hainao ndreky mazava tsara aminao. Ho vitanao koa handresy fakam-pan̈ahy han̈ano raha tsy mifan̈araka amy raha inoanao.

 Diniha ty: Nan̈ino anao matoky fa fitsipikin’ny Zan̈ahary momba fitondran-ten̈a io mahatsara anao?

 “Hitako fa mahaihajain’olo anten̈a izikoa tsy mivadiky amy raha inoanten̈a ndreky tsy man̈eky ho resin’ny fakam-pan̈ahy.”​—Kimberly.

Môdely tsara amy Baiboly: Daniela. Mbala tanora Daniela efa ‘tapa-kevitry tan̈atin’ny fônany’ fa làlan̈an’ny Zan̈ahary fo arehany.​—Daniela 1:8.

 Diniha ino fahalimian̈anao. Baiboly mikoran̈a momba “fan̈irian̈a mpahazo tanora”, mahery fan̈irian̈a io amy tanora. (2 Timoty 2:22) Tsy fan̈irian̈a han̈ano firaisan̈a fo tafiditry amin’izio fa fan̈irian̈a ho tian’olo ndreky fan̈irian̈a hahaleo ten̈a ndray anao mbala tsy vôn̈ono amy zen̈y aby.

 Diniha ty: Baiboly mivolan̈a fa ‘fan̈irian̈an’olo tsiaraikiaraiky fo mitsapa jerinany, ke mamandriky izy.’ (Jakoba 1:14) Ino fan̈irian̈a ten̈a mitsapa jery anao?

 “Ikia fa misy fakam-pan̈ahy sasany ten̈a mitsapa mare anao. Baka iô, man̈anaova fikarohan̈a, tadiava akôry atao mandresy raha aby io. Sorata lan̈iany hevitry hitanao afaka man̈ampy anao, amy zen̈y lera izio miboaka amy man̈araka sabo efa hainao akôry hiadivan̈a aminany.”​—Sylvia.

 Môdely tsara amy Baiboly: Davida. Nisy fotoan̈a izy resin’ny fan̈irian̈anany ndreky fitaoman̈an’ny naman̈a. Fa Davida nangala fianaran̈a baka tamin’ny hadisovan̈anany aviô niezaka niova. Izy nivavaka karaha ty tamy Jehovah: ‘Amoron̈a fô madio zaho, baka iô hameza toe-tsain̈y vaovao tsy miovaova foeky.’​—Salamo 51:10.

 Aza man̈eky resy. Baiboly mivolan̈a karaha ty: “Aza man̈eky ho resin’ny ratsy.” (Romanina 12:21) Dikan’izen̈y aza man̈eky resin’ny fakam-pan̈ahy. Anao afaka mifidy han̈ano ny tsara.

 Diniha ty: Izikoa fa misy fakam-pan̈ahy miboaka, ino raha mety ataonao baka anao tsy ho resin’izio fa han̈ano ny tsara fo?

 “Dinihiko ino raha ho tsapako izikoa zaho man̈eky resin’ny fakam-pan̈ahy. Ho ravoravo ma zaho? Pôsibla, fa izy fo tsy mahadin̈y ela. Mbala hahatsiaro sambatra fo ma zaho koa fa mandeha fotoan̈a? Ehe, jerinaka tsy hilamin̈y foeky. Izikoa zen̈y, tsisy varany han̈anaovako izio.”​—Sophia.

 Môdely tsara amy Baiboly: Paoly. Izy nan̈eky fa izy misy fahalimian̈a, fa ndray zen̈y, Paoly tsy nan̈eky ho resin’izio. Karaha ty nisoratiny: ‘Sireko mare ain̈inaka ke andivôziko.’​—1 Korintianina 9:27, lamariky amy pazy ambany.

 Aza adin̈a ty: Anao sôfera, safe anjaranao mifidy na anao han̈eky na tsy han̈eky ho resin’ny fakam-pan̈ahy.

 Tsaraova fa fakam-pan̈ahy aby io raha mihelan̈a fo. Karaha ty nivolan̈in’i Melissa, tanora 20 taon̈o: “Maro amy fakam-pan̈ahy hitako karaha maventy taminaka tamy zaho mbala tamy lise hitako karaha fa tsisy dikany ziôty. Zaho koa fa mandiniky zen̈y, zaho lôso korazy fôtony haiko fa mandalo fo fakam-pan̈ahy mavoa zaho amy ziôty, aviô andra araiky an̈y zaho koa fa mandiniky fakam-pan̈ahy aby io zaho ho ravoravo fôtony tsy nan̈eky resindrô io.”