•  Olo karakôry ma fahitanao anao?

•  Nan̈ino tsara mahay zen̈y?

•  Raha mety ataonao

•  Raha han̈ampy anao hieritreritry raha tsara

•  Hevitrin’ny tanora karaha anao

•   Tia mizaha lafy tsaran-draha

   “Zaho miezaka erakan’ny vitako ho ravoravo ndreky tsy ho mora meloko. Tiako mitokiky ndreky ho ravoravo fo isanandra.”​—Valerie.

•   Tia mizaha lafy ratsin-draha

   “Izikoa fa misy raha tsara miboaka, direkty zaho mieritreritry fa tsy maintsy misy raha hafahafa fo ao.”​—Rebecca.

•   Man̈eky raha misy

   “Izikoa zaho mifantoko amy lafy tsaran-draha fo, zaho manjary diso fan̈antinan̈a lera misy raha ratsy miboaka. Izikoa ndraiky zaho mifantoko amy lafy ratsin-draha, zaho halahelohelo lava. Ke sitrany zaho miezaka man̈eky zay raha misy iô karaha io zaho tsy diso fan̈antinan̈a.”​—Anna.

 Baiboly mivolan̈a fa ‘olo misy fô ravoravo miran̈a man̈ano fety lalandava.’ (Ohabolana 15:15) Hay be fa olo mizaha lafy tsaran-draha ndreky mizaha toetry tsaran’olo fo ny ten̈a ravoravo. Irô koa mora mahazo kamarady. Salakady tsisy olo tihiaraka amin’olo bitarain̈y ndreky malahelo lava.

 Fa ndray anao tia mizaha lafy tsaran-draha, anao mety mbala mety miatriky raha sarotro fo. Ty ohatra:

•   Anao mety haharen̈y vaovao momba ady, terôrisma na famonoan̈a olo.

•   Mety misy prôblemo amy fianakavian̈anao.

•   Mety misy fahalimian̈anao iadivinao mare.

•   Mety misy kamaradinao nan̈ano raha namparary fônao.

 Raha aby zen̈y tsy voatery ataonao sary tsy hita na koa handeha hifantohanao be, fa sitrany anao mianatra mandanjalanja. Karakôry ma zen̈y? Ikia raha misy amy zen̈y anao tsy hieritreritry lafy ratsindraha ndreky tsy ho kivy be.

•   Aza mifantoko be amy fahalimian̈anao.

   Baiboly mivolan̈a: “Tsisy olo tsy man̈ano raha diso ambony tany eto nata izy mifen̈y man̈ano raha tsara amy fotoan̈a jiaby.” (Mpitoriteny 7:20, Fandikan-teny Vaovao Tsara) Hadisovan̈a na raha tsy mety tafiataonao man̈aporofo fa anao olombelon̈o, fa tsy mivolan̈a fa anao olo tsy manjary.

   Ikia raha misy: Iadiva fo fahalimian̈anao, fa ndray zen̈y aza adin̈a fa anao tsy lavorary. Karaha ty ho Caleb: “Zaho mifen̈y tsy mieritreritry raha tsy nety nataoko amy zen̈y zaho tsy kivy. Zaho mangala fianaran̈a baka amy hadisovan̈anaka misy hahitako raha mbala mila ankatsaraiko.”

•   Aza mampiran̈a ain̈inao amin’olo.

   Baiboly mivolan̈a: “Atsika tsy tôkony ho poerapoera ke han̈ano raha hahavy atsika samby atsika hifan̈oesa ndreky ho be fô.” (Galatianina 5:26) Izikoa nisy kamaradinao nan̈ano fety kanefa anao tsy niainvitendrô, mety halahelo na ho meloko anao koa fa mahita sarindrô tamy fety io amin’ny internet. Mety tsy ho tianao foeky koa kamaradinao aby io.

   Ikia ny raha misy: Ikia fa olo tsy voatery ikaiky anao fo isaka misy fety. Tsy raha jiaby mandalo koa aboakan’ny sary hitanao amin’ny internet io. Karaha ty nambaran’i Alexis: “Raha ten̈a miavaka tamy fiain̈anandrô fo matetiky pibliendrô, fa izikoa raha tsotsotra fo tsy aboakandrô.”

•   Ataova raha hampisy firaisan-tsain̈y an̈atin’ny fianakavian̈anao.

   Baiboly mivolan̈a: ‘Izikoa mbala mety, ke miankiny aminarô koa, man̈anaova fo raha ihavan̈ana.’ (Romanina 12:18) Anao tsy mahavita mibeko raha ataon’olo, fa anao ndraiky afaka mibeko ain̈inao. Anao afaka mifidy han̈ano raha ihavanan̈a fo.

   Ikia ny raha misy: Aza manôsoko prôblemo eky fa ataova raha hampiray sain̈y fianakavian̈anarô, karaha ataonao amy kamaradinao an̈y. Nivolan̈a karaha ty tanora araiky kahian̈a Melinda: “Tsisy olo lavorary, salakady atsika jiaby lastiô samby man̈ano raha tsy tian’ny naman̈a ndraikindraiky. Ke anjarantsika foeky ny mifidy asa atsika han̈ano raha hihavanan̈a fo na tsy han̈ano.”

•   Mahaiza mankasitraka.

   Baiboly mivolan̈a: “Aboaha fa anarô mahay mankasitraka.” (Kolosianina 3:15) Izikoa anao mahay mankasitraka, anao mifantoko amy raha tsara amy fiain̈ananao fa tsy amy raha ratsy.

   Ikia ny raha misy: Aleva on̈ono prôblemo mandalo aminao, fa aza atao sary tsy hita koa raha tsara miboaka amy fiain̈ananao. Rebecca nivolan̈a karaha ty: “Isanandra, tsy maintsy misy raha tsara araiky soratiko. Tiako alain̈a onon̈o baka fa ndray iô prôblemo amy fiain̈ananaka, misy raha tsara fo afaka ampadihanako jeriko.”

•   Diniha olo ataonao kamarady.

   Baiboly mivolan̈a: “Naman̈a ratsy mandrobaka fahazaran̈a tsara.” (1 Korintianina 15:33) Izikoa kamaradinao olo bitarain̈y, tia mitretre na mankaratsy olo, toetry ratsindrô mety hifindra aminao.

   Ikia ny raha misy: Kamaradinao koa fa mandalo raha sarotro, ndraikindraiky irô mety halahelo na ho kivy. Ampia irô, fa ndray zen̈y, aza ifantohan̈a be prôblemondrô. Michelle nivolan̈a: “Tsy tôkony olo mizaha lafy ratsin-draha fo ataontsika naman̈a.”

 Baiboly mivolan̈a fa atsika miain̈y amy “fotoan̈a sarotro tsy mora hatrefin̈y.” (2 Timoty 3:1) Hitanao sarotro ma mifantoko amy lafy tsaran-draha an̈aty donia feno prôblemo ty? Vakia “Nan̈ino ma Jaly Mahaimare Fo?”