Asan’ny Apostoly 1:1-26
1 Fitantaran̈a voanalohany nisoratiko in̈y, Teofilo, izy in̈y momba raha jiaby nataon’i Jesosy ndreky nampianariny rango tamy voanalohany
2 firaka tamin’ny andra nampanongàn̈a izy tan-dan̈itry, tafaran’izy nan̈amia toromariky tamin’ny alalan’ny fan̈ahy masin̈y tamindrô apôstôly nifidiny aby io.
3 Izy koa fa baka nijaly, impirimpiry izy niboaka tamindrô sady nan̈amia porofo tsy mety famaran̈a fa izy velon̈o. Tan̈atin’ny 40 andra izy hitandrô, aviô izy nikoran̈a tamindrô momba Fanjakan̈an’ny Zan̈ahary.
4 Izy koa fa nitraotro tamindrô, ty beko namezany irô: “Anarô aza miala a Jerosalema, fa ambesa fo raha nampan̈antin̈ain’ny Baba, eraka raha efa nikoran̈iko taminarô in̈y,
5 fôtony Jaona nan̈ano batisa tamy rano, fa anarô ndraiky hatao batisa amy fan̈ahy masin̈y, afaka andra vitsivitsy.”
6 Ke irô koa fa vory, irô nan̈ontany izy: “Tômpo, ziôty ma anao han̈ampody fanjakan̈a amin’Israely?”
7 Ho izy tamindrô: “Tsy anjaranarô mahay fotoan̈a na vanim-potoan̈a, fa Baba zaraiky fo manan̈a fahifan̈a amy zen̈y.
8 Fa anarô hahazo angôvo lera fan̈ahy masin̈y avy aminarô, ke anarô hanjary vavolombelon̈onaka a Jerosalema ndreky man̈eran̈a Jodia ndreky Samaria, aviô amy faritry farany lavitry ambony tany eto.”*
9 Izy koa fa baka nivolan̈a raha aby zen̈y, irô mbala rikian̈a nizaha in̈y, izy nampanongain̈a, aviô nisy rôndro nandrakotro izy ke izy efa tsy hitandrô eky.
10 Tamin’irô mbala nizaha lan̈itry tamy Jesosy lôso in̈y, tiô fo nisy lelahy aroe avoa lamba fotsy nitsangana narikitry irô tiô
11 ke nivolan̈a: “Lelahy galilianin̈y, nan̈ino ma anarô mitsangana iô mizaha lan̈itry? Jesosy araiky taminarô tiô ke nampanongain̈a tan-dan̈itry in̈y mbala ho avy ndraiky, ke karaha fomba nahitanarô izy nanonga tan-dan̈itry in̈y fo fomba himpodianany.”
12 Irô nimpody ta Jerosalema ndraiky, irô koa fa baka tamy bongo araiky kahian̈a Bongo Olivy. Izio marikitry Jerosalema, kadiriny kilômetra araiky fo.*
13 Irô koa fa navy, irô nandeha tamin’ny efitry araiky fidokoandrô, an̈abon’ny etazy. Tao i Petera ndreky Jaona aviô Jakoba ndreky Andrea, Filipo ndreky Tomasy, Bartolomeo ndreky Matio, Jakoba zanakan’i Alfeo, Simona araiky mafana fô in̈y, baka iô Jodasy zanakan’i Jakoba.
14 Irô niray sain̈y, ke irô tsy nety vôly nivavaka. Nisy man̈angy sasantsasany koa niaraka tamindrô tao, an̈isan’izen̈y Maria maman’i Jesosy, aviô irô rahalahin’i Jesosy aby io.
15 Tamin’ny andra aby zen̈y Petera nitsangana tan̈ivondrô rahalahy aby io (kadiriny 120 irô tamy zen̈y), ke ho izy:
16 “Rahalahy aby, tsy maintsy tanteraka raha volan̈in’ny Soratra Masin̈y momba raha nambaran’i Davida tamin’izy nitaritin’ny fan̈ahy masin̈y ke naminan̈y momba Jodasy, araiky nitariky irô olo nanambotro Jesosy in̈y.
17 Jodasy namanay teto sady navoafidy handray anjara amy fanompoan̈a ty koa.
18 (Lelahy zen̈y araiky nivanga vilo tamy karama nazony baka tamy raha tsy marin̈y. Izy koa fa latsaka, lohanany lôso aloha, ke vatan̈anany nipaofaka* aviô nipaorapaora tsontsorinany jiaby.
19 Nanjary hain’olo jiaby nipetraka ta Jerosalema tao raha zen̈y, ke Akeldama nikahian̈a vilo io amy volan̈andrô; dikan’izio: “Vilon-dio.”)
20 Ty baka raha voasoratra amy bokin’ny Salamo ao: ‘Anò tany ipitrahany hanjary paiky, baka iô anò tsy hisy olo hipetraka eky ao’, aviô: ‘Anò ho lôson’olo hafa asanany amy maha mpiandraikitry izy.’
21 Ke izy mila soloan̈a araiky amindrô lelahy niaraka taminay tamy fotoan̈a nan̈anaovan’i Jesosy Tômpo asanany* taminay teto,
22 nanomboko tamy fotoan̈a nan̈anaovan’i Jaona batisa izy firaka tamin’ny andra nangalan̈a izy baka taminay teto. Araiky amindrô lelahy aby zen̈y tôkony hitsangana vavolombelon̈o miaraka aminay han̈ambara fa izy* efa natsangana tamy maty.”
23 Ke irô nanolotro olo aroe: Josefa araiky kahian̈a Barsabasy na koa kahian̈a Josto, aviô Matiasy.
24 Baka iô irô nivavaka karaha ty: “A Jehovah e, anao mahay raha an̈atin’ny fôn’olo jiaby, ke ambarà zahay azôvy amindrô roe lahy ty nifidinao
25 han̈ano fanompoan̈a ty ndreky hanjary apôstôly hisolo Jodasy, araiky niala ke nan̈ano zay raha tiany in̈y fo.”*
26 Irô nan̈ano antsapaka, ke Matiasy navoafidy han̈ampy isa* irô apôstôly 11 aby io.
Lamariky amy Pazy Ambany
^ Na: “aviô firaka amy faran’ny tany.”
^ Abt: “lalan̈a sabata andra araiky.”
^ Na: “vatan̈anany nibian̈a baka an̈ivo.”
^ Abt: “tamy Jesosy Tômpo nidi-niboaka.”
^ Na: “Jesosy.”
^ Na: “niala baka handeha amy plasinany.”
^ Dikan’izen̈y nitovy tamindrô 11 hafa aby io.
