Asan’ny Apostoly 11:1-30
11 Ren̈indrô apôstôly aby io ndreky irô rahalahy aby ta Jodia fa nan̈eky volan̈an’ny Zan̈ahary koa irô hafa firenena aby io.
2 Petera koa fa nanonga ta Jerosalema, nan̈amia tsin̈y izy* irô olo aby mpan̈izingizin̈y fa tsy maintsy arehan̈a lalàn̈a momba famosiran̈a,
3 ke ho irô: “Anao niditry tan-tran̈on’olo tsy avoavositry ndreky niaraka nihinan̈a tamindrô.”
4 Ke nazavain’i Petera tamindrô tamin’ny an-tsipiriany raha nandalo. Ho izy:
5 “Tamy zaho tamy tanànan’i Jopa tan̈y, tan̈atiny zaho mbala nivavaka in̈y, zaho nahita fahitan̈a. Zaho nahita raha karaha lamba lin maventy zay najotso baka tan-dan̈itry baka tamy zôron’ny efatra, ke izio najotso firaka taminaka.
6 Zaho koa fa nizaha tsarabe raha tan̈atin’izio, zaho nahita biby manan̈a vitiny efatra, ndreky biby dỳ, baka iô biby mandady, aviô vôron̈o mitilin̈y.
7 Zaho baka tiô naharen̈y feo nivolan̈a taminaka karaha ty: ‘Mitsangàna Petera! Vonia, baka iô hoana!’
8 Fa ho zaho: ‘San̈atria, Tômpo! Vavanaka mbala tsiary nidiran’ny raha maloto na tsy madio zen̈y foeky.’
9 Tamy fan̈indroeny, feo baka tan-dan̈itry io nivolan̈a karaha ty: ‘Aza ataonao maloto eky raha efa nidiovin’ny Zan̈ahary.’
10 Feo in̈y koa fa baka nivolan̈a taminaka* ndraiky fan̈intelony, direkty raha jiaby in̈y nantsoritin̈y nanonga tan-dan̈itry.
11 Tamy zen̈y tsarabe, nisy lelahy telo nitsangana tamy varavaran̈an’ny tran̈o nidokoanay. Irô io baka ta Kaisaria, nirahin̈y hangala zaho.
12 Ke fan̈ahy masin̈y nan̈iraka zaho tsy hisalasala foeky fa hiaraka amindrô. Rahalahy tsiota aby ty koa niaraka taminaka, ke zahay niditry tan-tran̈on’i Kornelio.
13 “Nitantarainy taminay fa izy nahita anjely nitsangana tan-tran̈onany, aviô nivolan̈a: ‘Man̈iraha olo handeha a Jopa hikaiky Simona araiky kahian̈a Petera,
14 fa hambarany anao amy fomba akôry hahavy anao ndreky olo jiaby tran̈o araiky aminao ho voavonjy.’
15 Zaho amizay koa fa nanomboko nivolan̈a, irô nilatsahan’ny fan̈ahy masin̈y, karaha nataon’izio latsaka tamintsika tamy voanalohany in̈y.
16 Tamy zen̈y, azoko onon̈o raha fivolan̈in’ny Tômpo ty: ‘Jaona nan̈ano batisa tamy rano, fa anarô ndraiky hatao batisa amy fan̈ahy masin̈y.’
17 Ke izikoa irô namezan’ny Zan̈ahary kadô tsy vangaim-bola zen̈y, karaha nataony nan̈amia izio atsika fôtony atsika nino Jesosy Kristy Tômpo, azôvy ma zaho ke handeha hisakana Zan̈ahary tsy han̈ano sitrapônany?”
18 Izikoa fa ren̈indrô raha aby zen̈y, irô efa tsy nanohitry eky.* Irô nan̈amia voninahitry Zan̈ahary, ke ho irô: “Mazava amizay! Kaiky irô hafa firenena aby io koa mba nambelan’ny Zan̈ahary hibebaka baka irô hahazo fiainan̈a!”
19 Irô mpianatra aby niparitaka baka tamy fan̈injehan̈a, tafaran’ny namonoan̈a Stefana in̈y, lôso firaka ta Fenisia ndreky Sipra aviô ta Antiokia, fa irô tsy nitory* izikoa tsy tamy Jiosy fo.
20 Kanefa, nisy olo sasany baka ta Sipra ndreky ta Kyrena navy ta Antiokia. Irô nikoran̈a tamin’olo miteny griky ndreky nan̈ambara vaovao tsara momba Jesosy Tômpo tamindrô.
21 Tan̈an’i Jehovah nan̈ampy irô,* ke nahainaro fo olo nanjary mpino ke niova ndreky nan̈araka* Tômpo.
22 Izikoa fa ren̈in’ny fiangonan̈a ta Jerosalema raha momba irô zen̈y, irô rahalahy aby io nan̈iraka Barnabasy handeha a Antiokia.
23 Izy koa fa navy tan̈y, hitany fa Zan̈ahary nan̈aboaka hatsaram-pan̈ahy miavaka tamindrô. Ravoravo izy, ke izy nankahery irô baka irô jiaby ho tapa-kevitry tsy hivadiky amy Tômpo amy fôndrô jiaby.
24 Izy baka lelahy tsara fan̈ahy sady feno fan̈ahy masin̈y aviô ten̈a nanan̈a finoan̈a. Ke nisy vahoaka marobe nanjary nino Tômpo.
25 Ke izy nandeha ta Tarsosy nitsakaraka Saoly.
26 Barnabasy koa fa nahita izy, izy nindesiny ta Antiokia. Ke tan̈atin’ny taon̈o araiky, irô niaraka nivory tamy fiangonan̈a, ndreky nampianatra olo marobe. Ta Antiokia somilany nikahian̈a irô mpianatra aby io “Kristianin̈y”,* eraka sitrapôn’ny Zan̈ahary.
27 Tamin’ny andra aby zen̈y, nisy mpaminan̈y nijotso baka ta Jerosalema nandeha ta Antiokia.
28 Araiky tamindrô io nanan̈a an̈aran̈a Agabo. Izy nitaritin’ny fan̈ahy masin̈y han̈ambara tsialohaloha fa tsy ho ela hisy mosary mare man̈eran̈a tany jiaby misy olo. Niboaka ankitin̈y raha zen̈y tamin’ny andran’i Klaodio.
29 Ke irô mpianatra aby io nanapa-kevitry handefa fan̈ampian̈a tamindrô* rahalahy ta Jodia, erakan’ny mety ho vitandrô tsiaraikiaraiky.
30 Zen̈y ankitin̈y raha nataondrô. Ke izio nampitondrasindrô i Barnabasy ndreky Saoly handeha amindrô anti-pan̈ahy aby an̈y.
Lamariky amy Pazy Ambany
^ Na: “nitady malo taminany.”
^ Abt: “Raha zen̈y koa fa nandalo.”
^ Abt: “irô nangin̈y jay.”
^ Na: “irô tsy nan̈ambara hafatra io.”
^ Abt: “niaraka tamindrô.”
^ Abt: “nitodiky tamy.”
^ Volan̈a io baka amin’ny an̈aran̈a “Kristy.”
^ Na: “nanapa-kevitry han̈ano fanompoan̈a ke han̈ampy irô.”
