Asan’ny Apostoly 12:1-25
12 Tamy fotoan̈a zen̈y, Mpanjaka Heroda nampijaly sasany tamin’olo an̈isan’ny fiangonan̈a.
2 Jakoba rahalahin’i Jaona nivoneny tamy sabatra.
3 Izikoa fa hitany fa namparavoravo irô Jiosy aby io raha zen̈y, nisambôriny koa Petera. (Andran’ny Fetin’ny Môfo Tsisy Levira tamy zen̈y.)
4 Izy koa fa baka nisambôriny, izy nampidiriny tamy prizon. Nisy maramila andiany efatra nirahiny nifamdimby hiambin̈y izy. Isaka andiany nisy maramila efatra. Petera baka tiany haboaka* man̈oloan̈a vahoaka izikoa fa vita Pasky.
5 Ke Petera nitanàn̈a tamy prizon tan̈y; fa fiangonan̈a ndraiky nivavaka mare baka Zan̈ahary han̈ampy izy.
6 Tamin’ny alin̈y talohan’i Heroda han̈aboaka izy tamindrô, Petera nandry tan̈ivon’ny maramila aroe, baka iô izy nifihezin̈y silisily aroe. Nisy mpiambin̈y koa nidôko tambôhon’ny varavaran̈a tao niambin̈y prizon io.
7 Kanefa tiô fo nisy anjelin’i Jehovah nitsangana tiô, aviô nisy hazavan̈a nangilangilatra nan̈azava selily io. Nikon̈on’ny anjely io tahezan̈an’i Petera misy hamoazany izy, sady ho izy: “Mitsangàna malaky!” Ke latsaka baka tamy tan̈anany silisily namihezan̈a izy aby in̈y.
8 Baka iô ho anjely io taminany: “Sikìna* lambanao aviô ataova savatinao.” Ke nataony raha zen̈y. Farany ho izy taminany: “Sikìna lambanao ambelan̈a, baka iô areha fo zaho.”
9 Ke izy niboaka aviô izy nan̈araka anjely io, kanefa tsy hainy fa efa ten̈a izy raha nataon’ny anjely io. Sambarany fa nahita fahitan̈a baka izy.
10 Irô nandika tamy mpiambin̈y voanalohany, baka iô tamin’ny araiky faharoe, aviô irô navy tamy barô vy mandeha an-tanàna. Izio nibian̈a hoazy nan̈oloan̈a irô tiô. Irô koa fa tafiboaka, irô nandeha nijotso tamy lalan̈a araiky zay, baka iô direkty anjely io niala izy.
11 Petera koa fa tontohitry tamy raha nandalo in̈y, ho izy: “Haiko tsarabe ziô fa Jehovah nan̈iraka anjelinany nan̈avotro zaho tan-tan̈an’i Heroda ndreky tamy raha jiaby nantin̈aindrô Jiosy aby io fa havoa zaho.”
12 Izy koa fa baka nieritreritry momba raha zen̈y, izy nandeha tan-tran̈on’i Maria maman’i Jaona, araiky kahian̈a Marka in̈y. Nisy olo maromaro nivory ndreky nivavaka tao.
13 Izy koa fa nikonkon̈o tamy barô tao, nisy mpanompovavy kahian̈a Roda zay nandeha nizaha azôvy tao.
14 Niaraka izy nahay feon’i Petera, ravoravo loatra izy ke tsy tafan̈abian̈a barô, fa lôso izy nilomoay niditry tan̈aty tan̈y nivolan̈a fa Petera mitsangana amy barô ao.
15 Ho irô taminany: “Anao io nanjary lefaka!” Kanefa izy tsy vôly nivolan̈a fa Petera ankitin̈y ao. Ke irô nanomboko nivolan̈a: “Anjelinany zen̈y.”
16 Fa Petera mbala tao fo nikonkon̈o. Irô amizay koa fa nan̈abian̈a barô, irô nahita izy ke irô lany fan̈ahy.
17 Fa izy nan̈ano fihetsiky tamy tan̈anany hampangin̈ana irô, aviô nambarany irô tamin’ny an-tsipiriany tamy fomba akôry nan̈aboahan’i Jehovah izy baka tamy prizon tao, ke ho izy: “Mindao ambarà Jakoba ndreky irô rahalahy aby io raha aby zen̈y.” Izy baka tiô lôso niboaka aviô nandeha tan-tany hafa.
18 Izikoa fa maraindrain̈y andra, nialamboetry irô maramila aby io ke irô nifan̈ontany nan̈aia i Petera.
19 Heroda koa fa baka nitsakaraka izy tsarabe ke tsy nahita izy, nataony ankaity irô mpiambin̈y aby io, aviô irô nirahiny nisazìn̈y. Izy baka tiô niala ta Jodia ke nandeha nijotso ta Kaisaria, baka iô izy nidôkodôko tan̈y.
20 Heroda tamin’io neloko* tamindrô olo nipetraka ta Tyro ndreky Sidona. Ke irô nan̈ano jery araiky handeha aminany an̈y. Irô koa fa baka nandresy lahatra Blasto, lelahy niandraikitry lafamìn’ny* mpanjaka, irô nitady fihavanan̈a tamy mpanjaka, fôtony tanin’ny mpanjaka namatsy hanin̈y firenenandrô.
21 Tamin’ny andra voatôndro, Heroda nisikiny lamban’ny mpanjaka baka iô izy nipetraka tamy toeran̈a fitsaran̈a, aviô izy nanomboko nan̈ano kabary tamy vahoaka.
22 Ke irô olo aby vory tiô nandronton̈o karaha ty: “Zen̈y feon-dran̈ahary, fa tsy feon’olo ô!”
23 Tiô ny iô izy nivangoen’ny anjelin’i Jehovah, fôtony izy tsy nan̈amia voninahitry Zan̈ahary. Ke izy nihoanin’ny ankana aviô izy naty.
24 Kanefa volan̈an’i Jehovah tsy vôly niparitaka, baka iô nahainaro fo olo nanjary mpino.
25 Izikoa fa vitan’i Barnabasy ndreky Saoly fandrasan̈a fan̈ampian̈a ta Jerosalema tan̈y, irô nimpody ta Antiokia; nindesindrô niaraka tamindrô koa Jaona, araiky kahian̈a Marka in̈y.
Lamariky amy Pazy Ambany
^ Na: “tiany hindesin̈y hitsarain̈a.”
^ Na: “Ataova.”
^ Na: “nitady ady.”
^ Abt: “efitry fandrian’ny.”
