Asan’ny Apostoly 14:1-28
14 Paoly ndreky Barnabasy niditry tamy synagogan’ny Jiosy ta Ikonioma. Irô ten̈a nahay nan̈ano kabaro, ke marobe olo nanjary mpino, na Jiosy zen̈y na Griky.
2 Irô Jiosy tsy nino aby io ndraiky nampirisiky irô olo hafa firenena aby io hanohitry irô rahalahy aby io, aviô irô nitaon̈o olo aby io hankahala irô.
3 Refindrefin̈y hely irô roe lahy nitory tao, baka iô irô tsy navozovozo foeky nan̈ano zen̈y fôtony Jehovah efa nan̈amia fahifan̈a irô. Naboakany tsarabe fa nankasitrahiny hafatra momba hatsaram-pan̈ahinany miavaka nitorindrô, ke irô namezany angôvo* han̈ano famantaran̈a ndreky fahagagan̈a maro.
4 Kanefa olo aby tamy tanàna io tao tsy nitovy hevitry: Sasany nilan̈y tamindrô Jiosy aby io, fa sasany ndraiky nilan̈y tamindrô apôstôly aby io.
5 Irô olo hafa firenena ndreky irô Jiosy aby io baka iô irô mpitondra aby tamindrô tao nitady hampijaly irô roe lahy ndreky hitaora-bato irô.
6 Nanjary haindrô raha zen̈y, ke irô nilefa tamindrô tanàna aby ta Lykaonia tan̈y ndreky ta Lystra aviô ta Derbe ndreky tamy faritry man̈odidin̈y.
7 Tan̈y, irô nanohy nan̈ambara vaovao tsara.
8 Ta Lystra tao nisy lelahy nalemy vity rango izy vo teraka. Ke izy tsiary nahavita nandeha fa nipetraka fo.
9 Nizahavan’i Paoly tsarabe izy ke hitany fa lelahy io nino raha nivolan̈iny ndreky natoky fa vitany mampajanga izy.
10 Ke Paoly nivolan̈a mare karaha ty: “Mitsangàna!” Lelahy io nitsangana baka iô izy nanomboko nandeha.
11 Izikoa fa hitan’ny vahoaka raha nataon’i Paoly in̈y, irô nandronton̈o mare tamy volan̈a lykaonianin̈y karaha ty: “Irô zan̈ahary aby io nanjary miran̈a olombelon̈o, aviô irô nijotso amintsika atỳ!”
12 Ke Barnabasy nikahiandrô “Zeosy”,* fa Paoly ndraiky “Hermesy”* fôtony matetiky izy fo nivolan̈a.
13 Irô mpisôron̈on’i Zeosy aby io nitondra aomby ndreky girlandy* tamy barôn’ny tanàna io, fôtony irô tihan̈ano sôron̈o niaraka tamy vahoaka. Nisy tempolin’i Zeosy baka tamy fidiran̈a amy tanàna io.
14 Fa izikoa fa ren̈in’ny apôstôly Barnabasy ndreky apôstôly Paoly raha zen̈y, irô nan̈atriaka lambandrô aviô irô nilomoay nan̈aton̈o vahoaka sady nandronton̈o karaha ty:
15 “A olo aby, nan̈ino ma anarô man̈ano raha karaha io? Olombelon̈o karaha anarô* fo kony zahay ay! Mitory vaovao tsara io aminarô zahay baka anarô hiala amy raha tsisy dikany ataonarô io, fa hitodiky amy* Zan̈ahary velon̈o, araiky nan̈amboatra lan̈itry ndreky tany ndreky ranomasin̈y baka iô raha jiaby amindrô io ao.
16 Taloha tan̈y, nambelany nan̈ano zay raha tiandrô aby firenena jiaby.
17 Kanefa naboakany anarô baka tamy raha tsara nataony azôvy izy. Anarô nandatsahany mahalen̈y baka an-dan̈itry ndreky namezany vokatra marobe amy fotoan̈any, baka iô anarô nataony voky hanin̈y aviô fônarô nifinoany haravoan̈a.”
18 Fa ndray irô nivolan̈a raha aby zen̈y, efa tseky tsy ho vitandrô nisakan̈a irô vahoaka aby io tsy han̈ano sôron̈o tamindrô.
19 Kanefa nisy Jiosy baka ta Antiokia ndreky Ikonioma navy, ke irô nandresy lahatra vahoaka. Irô nitaora-bato Paoly, baka iô izy nantsoritsoritindrô tambelan̈an’ny tanàna, fôtony irô nieritreritry fa izy efa naty.
20 Kanefa irô mpianatra aby io koa fa nikodidin̈y izy, izy nitsangana aviô niditry tan-tanàna tao. Amarain’izin̈y, irô roen’i Barnabasy nandeha ta Derbe.
21 Irô koa fa baka nitory vaovao tsara tamy tanàna io tao ndreky nan̈ampy olo maro hanjary mpianatra, irô nimpody ta Lystra ndreky ta Ikonioma baka iô ta Antiokia.
22 Ke tan̈y irô nankahery irô mpianatra aby io sady nampirisiky irô tsy hiala amy finoan̈a. Ho irô: “Tsy maintsy miaritry fahorian̈a maro atsika zay vo tafiditry amy Fanjakan̈an’ny Zan̈ahary.”
23 Irô roe lahy nanendry anti-pan̈ahy isaka fiangonan̈a, ke irô nivavaka ndreky nifady hanin̈y,* aviô irô io nankin̈indrô tamy Jehovah, tsy azôvy zen̈y fa araiky ninoandrô.
24 Irô roe lahy baka tiô namakivaky Pisidia aviô irô navy ta Pamfylia.
25 Irô amizay koa fa baka nan̈ambara Volan̈an’ny Zan̈ahary ta Perga, irô nijotso ta Atalia.
26 Baka tao irô niondran̈a sambo nandeha ta Antiokia. Tao baka irô rahalahy aby io nangataka tamy Zan̈ahary baka izy han̈aboaka hatsaram-pan̈ahy miavaka tamindrô roe lahy, tamin’irô vo nanomboko asa io, fa asa io iziô efa vitandrô.
27 Irô koa fa navy tao, irô namory fiangonan̈a. Ke nitantaraindrô raha maro nataon’ny Zan̈ahary, izy koa fa nampiasa irô, ndreky karakôry nataon’ny Zan̈ahary nan̈abian̈a lalan̈a tamindrô hafa firenena aby io baka irô hino izy.
28 Ke irô nidôko elaela niaraka tamindrô mpianatra aby io.
Lamariky amy Pazy Ambany
^ Na: “fahifan̈a.”
^ Na: “Zipitera.”
^ Na: “Merkira.”
^ Na: “fehiloha vita amy ravin-draha; koraony vita amy ravin-draha.”
^ Na: “Olombelon̈o manan̈a fahalimian̈a miran̈a amy ninarô.”
^ Na: “fa han̈aton̈o.”
^ Na: “ndreky nifehy.”
