Asan’ny Apostoly 15:1-41
-
Ta Antiokia nisy adihevitry momba famosiran̈a (1, 2)
-
Adihevitry io nindesin̈y ta Jerosalema (3-5)
-
Irô apôstôly ndreky irô anti-pan̈ahy aby io niaraka nivory (6-21)
-
Taratasy baka tamy filan-kevi-pitantan̈ana (22-29)
-
Mila fady lio (28, 29)
-
-
Taratasy nankahery fiangonan̈a (30-35)
-
Paoly ndreky Barnabasy nisara-dia (36-41)
15 Nisy olo sasany nijotso baka ta Jodia ke nampianatra irô rahalahy aby io karaha ty: “Anarô koa tsy vosirin̈y eraka raha takin’ny Lalàn̈an’i Mosesy, anarô tsy ho voavonjy.”
2 Ke nimalo mare ndreky niady hevitry tamindrô i Paoly ndreky Barnabasy. Tafaran’izen̈y, ty raha tapaka: Paoly ndreky Barnabasy aviô sasany tamindrô halefa manonga amindrô apôstôly ndreky anti-pan̈ahy a Jerosalema an̈y hitondra adihevitry* io.
3 Nateterin’ny fiangonan̈a lavidavitry hely irô lelahy aby io, aviô irô nanohy diandrô ke namakivaky Fenisia ndreky Samaria, sady nitantara tamin’ny an-tsipiriany fa nisy olo hafa firenena nanjary nanompo* Zan̈ahary, ke ravoravo mare rahalahy jiaby.
4 Irô koa fa navy ta Jerosalema, irô niraisin’ny fiangonan̈a ndreky apôstôly aviô anti-pan̈ahy aby io tsarabe, baka iô irô nitantara raha jiaby nataon’ny Zan̈ahary, izy koa fa nampiasa irô.
5 Fa sasany tamindrô olo aby an̈isan’ny sektin’ny Fariseo kanefa efa nanjary mpino aby io ndraiky nitsangana,* aviô ho irô: “Irô olo aby zen̈y mila vosirin̈y ndreky irahan̈a man̈araka Lalàn̈an’i Mosesy.”
6 Ke irô apôstôly ndreky irô anti-pan̈ahy aby io niaraka nivory misy handinihandrô afaira io.
7 Irô koa fa baka niady hevitry* mare, Petera nitsangana baka iô ho izy tamindrô: “Rahalahy aby, hainarô tsarabe fa zaho efa nifidin’ny Zan̈ahary taminarô tiô rango tamy voanalohany, amy zen̈y baka amy vavako harin̈esandrô olo hafa firenena aby io hafatra momba vaovao tsara, ke irô hino.
8 Aviô Zan̈ahary, araiky mahay raha an̈atin’ny fô, nan̈aboaka fa irô io nikeny ke namezany fan̈ahy masin̈y, karaha nataony tamintsika in̈y koa.
9 Tsy nasiany fan̈avahan̈a foeky atsika ndreky irô, fôtony fôndrô koa mba efa nidioviny nohon’irô nan̈aboaka finoan̈a.
10 Nan̈ino basy anarô ziô mitsapa jery Zan̈ahary, ke faorsenarô hasian̈a lazòko vozon̈ondrô mpianatra aby io, kanefa na atsika na irô dadilahibentsika aby io samby tsisy nahatondra raha zen̈y?
11 Fa atsika ndraiky mino fa karaha ataony atsika voavonjy baka amin’ny hatsaram-pan̈ahy miavaka naboakan’i Jesosy Tômpo, voavonjy karaha zen̈y koa irô.”
12 Ke irô jiaby nangin̈y, aviô irô nitandren̈y Barnabasy ndreky Paoly nitantara famantaran̈a ndreky fahagagan̈a maro nataon’ny Zan̈ahary tamindrô hafa firenena aby io, izy koa fa nampiasa irô.
13 Izikoa fa tapitry volan̈andrô, karaha ty ho Jakoba: “Rahalahy aby, tandrin̈esanarô zaho.
14 Efa nitantarain’i Simeona* tamintsika tamin’ny an-tsipiriany karakôry somilany nan̈ikian’ny* Zan̈ahary irô hafa firenena aby io, misy hangalany olo baka amindrô io ao hitondra an̈aran̈anany.
15 Sady mifan̈araka amy zen̈y tsarabe volan̈andrô Mpaminan̈y aby io, eraka raha voasoratra ty:
16 ‘Afaran’izen̈y, zaho himpody ke hatsangako ndraiky tran̈olain’i* Davida efa ravan̈a in̈y. Hamboariko ndraiky raha tavela tsy ravan̈a ke hampodiko amy plasiny,
17 amy zen̈y hitsakaraka Jehovah tsarabe irô olo tavela aby io, miaraka amin’olo baka amy firenena jiaby, tsy azôvy zen̈y fa irô olo kahian̈a amin’ny an̈aran̈anaka aby io, ho Jehovah. Zaho man̈ano raha aby zen̈y,
18 ary zaho efa tapa-kevitry han̈ano raha aby zen̈y rango efa ela.’
19 Ke ty hevitrinaka:* Sitrany atsika tsy han̈ano raha hampisy prôblemo irô olo aby hafa firenena mitodiky amy Zan̈ahary,
20 fa atsika hanoratra amindrô baka irô hifady raha voaloto baka amy fanompoan-tsampy,* ndreky hifady fijangajangan̈a* baka iô biby nikindain̈a* aviô lio.
21 Fôtony efa rango taloha ela be tan̈y nisy olo nitory momba Mosesy eraka tanàna jiaby, baka iô raha nisoratiny* vakian̈a mare amy synagoga isaka sabata.”
22 Irô apôstôly ndreky anti-pan̈ahy aby io aviô fiangonan̈a jiaby nanapa-kevitry hifidy lelahy tamindrô tiô ndreky handefa irô io a Antiokia, miaraka amy Paoly ndreky Barnabasy. Irô nandefa Jodasy, araiky kahian̈a Barsabasy, baka iô Silasy. Irô io samby nitana andraikitry maventy tamindrô rahalahy aby io.
23 Ty raha voasoratra tamy taratasy nampitondrasindrô irô:
“Handeha amindrô rahalahy hafa firenena a Antiokia ndreky Syria aviô Kilikia. Zahay, apôstôly ndreky anti-pan̈ahy rahalahinarô, man̈ano mbalatsara anarô.
24 Ren̈inay fa sasany taminay navy taminarô tan̈y, ke irô nivolan̈a raha nampikorontan̈a anarô, sady nan̈aohatra nan̈ozongozon̈o finoan̈anarô, kanefa zahay tsy nan̈iraka irô nan̈ano raha zen̈y.
25 Ke zahay jiaby nanapa-kevitry handefa olo aminarô an̈y miaraka amy Barnabasy ndreky Paoly rahalahy tianay mare,
26 irô roe lahy io samby nirisiky fahin̈anandrô nohon’ny finoan̈a an̈aran̈an’i Jesosy Kristy Tômpontsika.
27 Zahay koa nan̈iraka Jodasy ndreky Silasy, amy zen̈y koa vavandrô lastiô hivolan̈a raha zen̈y mivantan̈a aminarô.
28 Fôtony fan̈ahy masin̈y ndreky zahay tsy tihampitondra entan̈a mavesatra anarô, izikoa tsy raha tsy maintsy tandreman̈a aby ty fo:
29 Anarô mila fady raha natao sôron̈o tamy sampy, lio, biby nikindain̈a,* aviô fijangajangan̈a.* Izikoa anarô mifen̈y fo mifady raha aby io, anarô hahazo hatsaran̈a. Tsaratsara aby ay!”*
30 Lôso irô lelahy aby io, ke irô nijotso ta Antiokia. Navorindrô aby mpianatra jiaby, baka iô namezandrô irô taratasy in̈y.
31 Izikoa fa voavakindrô taratasy io, irô ravoravo mare fôtony izio nankahery irô.
32 Jodasy ndreky Silasy baka mpaminan̈y, ke irô roe lahy nan̈ano kabaro maro hankahirezan̈a irô rahalahy aby io.
33 Irô koa fa baka nidôkodôko tao, irô nalefandrô rahalahy aby io nimpody soa aman-tsara tamindrô olo aby nan̈iraka irô tan̈y.
34 ——
35 Fa Paoly ndreky Barnabasy ndraiky nidôko ta Antiokia, ke irô nampianatra ndreky nan̈ambara vaovao tsara momba volan̈an’i Jehovah. Nisy olo maro koa niaraka tamindrô.
36 Andra vitsivitsy tafaran’izen̈y, karaha ty ho Paoly tamy Barnabasy: “Alô amizay atsika ziô* himpody handeha hitsidiky irô rahalahy tamy tanàna jiaby nan̈ambarantsika volan̈an’i Jehovah, misy hahitantsika akôry nanindrô.”
37 Barnabasy tapa-kevitry hitondra Jaona, araiky kahian̈a Marka in̈y.
38 Fa Paoly ndraiky tsy tihitondra izy miaraka amindrô, fôtony izy niala irô ta Pamfylia tan̈y sady tsy nandeha niaraka tamindrô nanohy asa in̈y.
39 Irô nimalo mare aviô samby neloko, ke irô nisaraka. Marka nindesin’i Barnabasy ke irô niondran̈a sambo nandeha a Sipra.
40 Fa Paoly ndraiky nifidy Silasy, baka iô tafaran’irô rahalahy aby io nivavaka baka Jehovah han̈aboaka hatsaram-pan̈ahy miavaka taminany,* lôso izy.
41 Izy namakivaky Syria ndreky Kilikia, ke nankafatatra irô fiangonan̈a aby tan̈y.
Lamariky amy Pazy Ambany
^ Na: “malo.”
^ Na: “nitodiky tamy.”
^ Na: “niala tamy sezindrô ke nitsangana.”
^ Na: “baka nimalo.”
^ Na: “Simona.” Izio Petera.
^ Na: “nitsinjovan’ny.”
^ Na: “tran̈o rantsakazon’i; tran̈on’i.”
^ Na: “Ke ty fanapahan-kevitrinaka:”
^ Na: “raha voaloton’ny sampy.”
^ Na: “nivonen̈a kanefa tsy nalatsaka lio; tsy voalenta.”
^ Abt: “baka iô izy.”
^ Na: “nivonen̈a kanefa tsy nalatsaka lio; tsy voalenta.”
^ Na: “Veloma!”
^ Na mety ho: “Alô antsendriky atsika.”
^ Na: “baka Jehovah hikarakara izy.”
