Asan’ny Apostoly 16:1-40
16 Ke izy navy ta Derbe aviô ta Lystra. Tao nisy mpianatra araiky zay, Timoty an̈arany. Izio zanakan’ny man̈angy jiosy mpino, fa babany ndraiky Griky.
2 Timoty tsara laza tamindrô rahalahy aby ta Lystra ndreky ta Ikonioma.
3 Paoly tihitondra izy hiaraka aminany, ke izy nalainy baka iô nivosiriny, fôtony Jiosy jiaby nipetraka tamy faritry io nahay fa Griky babany.
4 Tamy tanàna jiaby nititezindrô, nampitaindrô tamindrô rahalahy aby io raha tapakandrô apôstôly ndreky anti-pan̈ahy aby ta Jerosalema tan̈y, misy han̈arehandrô izio.
5 Ke nahainatanjaka fo finoan̈andrô fiangonan̈a aby io, aviô nahainaro fo irô isan’andra.
6 Irô baka tiô nandeha namakivaky Frijia ndreky Galatia, fôtony irô tsy nimboan’ny fan̈ahy masin̈y han̈ambara volan̈an’ny Zan̈ahary tamy faritanin’i Azia.
7 Irô koa fa navy* ta Mysia, irô nan̈aohatra nandeha ta Bitynia, kanefa irô tsy nimboan’ny fan̈ahin’i Jesosy.*
8 Ke irô namakivaky ta* Mysia, aviô irô nijotso ta Troasy.
9 Baka iô tamin’ny alin̈y, Paoly nahita fahitan̈a. Nisy lelahy makedonianin̈y araiky nitsangana nan̈oloan̈a izy, ke niangavy izy karaha ty: “Mitsakà a Makedonia atỳ, ke ampia zahay.”
10 Niaraka izy nahita fahitan̈a io, zahay nitady fomba handihanan̈a a Makedonia, fôtony zahay nino fa Zan̈ahary nikaiky* zahay han̈ambara vaovao tsara amindrô.
11 Ke zahay niondran̈a sambo baka ta Troasy baka iô nan̈itsy nandeha ta Samotrakia, aviô amarain’izin̈y zahay nandeha ta Neapolia.
12 Baka tao zahay nandeha ta Filipỳ, izio zanatany salakady tanàna farany malaza* tamy faritrin’i Makedonia. Zahay nidôko tamy tanàna io tao andra vitsivitsy.
13 Tamin’ny andra sabata, zahay niboaka baka tamy barôn’ny tanàna io aviô zahay nandeha tamy ten̈arano zay, fôtony zahay nieritreritry fa tiô nisy toeran̈a fivavahan̈a. Ke zahay nipetraka, baka iô zahay nanomboko nikoran̈a tamindrô man̈angy aby nivory tiô.
14 Tamindrô tiô nisy man̈angy araiky kahian̈a Lydia, izio mpivarotro lamba* viôlé. Viavy io baka amy tanànan’i Tyatira, aviô izy mpivavaka amy Zan̈ahary. Izy nitandren̈y zahay, ke nibiafin’i Jehovah tsarabe fônany baka izy han̈eky raha nivolan̈in’i Paoly.
15 Izy ndreky olo tran̈o araiky taminany koa fa vita batisa, izy niangavy zahay karaha ty: “Izikoa anarô mihevitry fa zaho tsy mivadiky amy* Jehovah, mavia han̈ano vahiny an-tran̈onaka an̈y.” Ke tsy napetrany foeky zahay izikoa tsy nan̈an̈y.
16 Tandraraiky, tamy zahay nandeha tamy toeran̈a fivavahan̈a in̈y, zahay fanôjy mpanompovavy araiky nisazaohan’ny fan̈ahy maloto, na demony mpan̈ambara raha mbala ho avy. Nanjary nanam-bola mare irô tômpon’ny mpanompovavy io baka tamy fahaizany nan̈ambara raha mbala ho avy.*
17 Tsaiky viavy io tsy vôly nan̈araka zahay jiabin’iry Paoly aviô izy nandronton̈o karaha ty: “Irô lelahy aby io mpanompon’ny Zan̈ahary Farany An̈abo, baka iô irô man̈ambara anarô raha tôkony hatao baka anarô ho voavonjy.”*
18 Izy tsy vôly nan̈ano zen̈y tan̈atin’ny andra maromaro. Farany, Paoly empaka, ke izy nitodiky aviô ho izy tamy fan̈ahy io: “Amin’ny an̈aran̈an’i Jesosy Kristy, zaho man̈iraka anao hiboaka baka aminany ao.” Ke tiô ny iô,* izio niboaka.
19 Izikoa fa hitandrô tômpon’ny tsaiky man̈angy io fa erany iô fan̈antinan̈andrô hahazo vola be, Paoly ndreky Silasy nisambôrindrô, baka iô irô nantsoritsorintindrô ta bazary handeha amindrô manam-pahifan̈a aby io.
20 Irô roe lahy nindesindrô tamy tômpin’andraiki-panjakan̈a tan̈y, aviô ho irô: “Lelahy aby ty man̈akorontan̈a tanànantsika mare. Irô io Jiosy,
21 baka iô irô mampianatra fomba tsy mety amintsika salakady tsy mety arehantsika, fôtony atsika Romanin̈y.”
22 Irô vahoaka aby io niaraka nanohitry irô roe lahy, aviô irô tômpin’andraiki-panjakan̈a aby io koa fa baka nan̈amia beko olo han̈adoso lambandrô roe lahy, irô nirahandrô nipopòn̈a tamy kakazo.
23 Irô roe lahy koa fa baka nipopòndrô impirimpiry, irô nigadraindrô. Aviô irô nan̈amia beko mpiambin̈y hiambin̈y irô tsarabe.
24 Ke nohon’ny mpiambin̈y io nahazo beko zen̈y, nigadrainy tamin’ny efitry farany an̈aty tamy prizon tao irô roe lahy, baka iô vitindrô nisireny tamy gadra kakazo.
25 Fa kadiriny tamy sasakalin̈y, Paoly ndreky Silasy nivavaka sady nan̈ano hira hideran̈a* Zan̈ahary. Irô gadra hafa aby io nitandren̈y irô.
26 Tiô fo nisy hôrohôron-tany maventy ke fôtotron’ny prizon io nihozongozon̈o. Direkty niaraka nibian̈a koa varavaran̈a jiaby, baka iô nivaha fehy tamy gadra jiaby.
27 Mpiambin̈y prizon io koa fa taitry tamy tôromasonany ke hitany fa varavaran̈an’ny prizon nibian̈a, nalainy sabatranany aviô izy tseky hamono ten̈a, fôtony izy nieritreritry fa irô gadra aby io nilefa.
28 Kanefa Paoly nandronton̈o mare karaha ty: “Anao aza mamono ten̈a,* fa zahay jiaby ato!”
29 Ke mpiambin̈y io nan̈iraka olo hitondra jiro* baka iô izy niraparapa niditry. Nangôrohôro izy sady nankôhoko nan̈oloan̈a Paoly ndreky Silasy.
30 Nindesiny niboaka irô roe lahy, baka iô nan̈ontaniany: “A tômpoko aby, ino raha tsy maintsy ataoko baka zaho ho voavonjy?”
31 Ho irô: “Minoa Jesosy Tômpo, amy zen̈y anao ndreky olo jiaby tran̈o araiky aminao ho voavonjy.”
32 Ke irô nan̈ambara volan̈an’i Jehovah taminany ndreky tamin’olo jiaby tan-tran̈onany tao.
33 Alin̈y io fo, nindesin’ny mpiambin̈y io irô roe lahy, baka iô nisasany baindrô. Aviô izy ndreky olo jiaby tan-tran̈onany tao tsy nijijy tamban̈a foeky fa direkty natao batisa.
34 Irô roe lahy baka tiô nindesiny tan-tran̈onany tan̈y, ke namezany hanin̈y tan̈abon’ny latabatra. Ravoravo mare izy ndreky olo jiaby tran̈o araiky taminany fôtony irô nanjary nino Zan̈ahary.
35 Andra koa fa kiaka, irô tômpin’andraiki-panjakan̈a aby io nan̈iraka olo mpiambin̈y irô aby io hivolan̈a tamy mpiambin̈y prizon in̈y karaha ty: “Votsaora irô lelahy aby in̈y.”
36 Nambaran’ny mpiambin̈y prizon io tamy Paoly volan̈andrô zen̈y, ke ho izy: “Irô tômpin’andraiki-panjakan̈a aby io nan̈iraka olo hivolan̈a fa anarô roe lahy zen̈y votsaoran̈a. Ke anarô mety miboaka sady mety mandeha soa aman-tsara.”
37 Fa ho Paoly: “Zahay mbala tsendriky voaheloko,* zahay efa nipopòndrô tamason’olo baka iô nigadraindrô, kanefa zahay Romanin̈y. Ke zahay ziô ndraiky haboakandrô mangingin̈y? Zahay baka tsy han̈eky zen̈y ay! Ambilà irô tômpin’ain̈y foeky mandeha atỳ man̈aboaka zahay.
38 Ke irô mpiambin̈y nalefandrô tômpin’andraiki-panjakan̈a aby in̈y nitatitry volan̈a aby zen̈y tamindrô tan̈y. Irô amizay navozo izikoa fa naharen̈y fa kaiky irô roe lahy in̈y Romanin̈y.
39 Navy irô ke nilafidafiky* tamindrô roe lahy, aviô irô io nindesindrô niboaka ke niangaviandrô hiala amy tanàna io.
40 Kanefa irô koa fa niboaka baka tamy prizon io, irô nandeha tan-tran̈on’i Lydia tan̈y. Nankahirezindrô irô rahalahy aby io koa fa hitandrô, baka iô irô lôso.
Lamariky amy Pazy Ambany
^ Na: “nijotso.”
^ Izio fan̈ahy masin̈y nazon’i Jesosy baka tamy Zan̈ahary.
^ Na: “irô nandalo narikitry.”
^ Na: “nan̈iraka.”
^ Na mety ho: “farany tsara.”
^ Na: “kolera.”
^ Na: “zaho mafatoky man̈oloan̈a.”
^ Na: “fahaizany naminan̈y.”
^ Na: “man̈ambara anarô lalan̈an’ny famonjian̈a.”
^ Na: “Ke tamy lera zen̈y.”
^ Na: “sady nihira han̈amezan̈a voninahitry.”
^ Abt: “Aza ratravin̈y ain̈inao.”
^ Na: “mpiambin̈y io nampangala jiro.”
^ Na: “nitsarain̈a.”
^ Na: “nan̈ano azafady.”
