Asan’ny Apostoly 18:1-28
18 Tafaran’izen̈y, Paoly niala ta Atena ke nandeha ta Korinto.
2 Tao izy nahita Akoila, lelahy jiosy araiky baka a Ponto. Mbala vo tsy ela fo izio ndreky Prisila vadiny navy baka tan’Italy, fôtony Klaodio nan̈aboaka didy fa Jiosy jiaby mila miala a Roma. Paoly nandeha tamindrô tan̈y,
3 baka iô izy nidôko tamindrô tao ke niaraka niasa tamindrô, fôtony nitovy asandrô. Mpan̈amboatra tran̈olay baka velon-ten̈andrô.
4 Isaka sabata, Paoly nan̈ano kabaro* tamy synagoga tao salakady nandresy lahatra irô Jiosy ndreky Griky aby io.
5 Silasy ndreky Timoty koa fa nijotso baka ta Makedonia, Paoly nanomboko nifantoko angôvo jiaby tamy fitorian̈a volan̈an’ny Zan̈ahary, ke izy nan̈amia porofo irô Jiosy aby io fa Jesosy io Kristy.
6 Kanefa irô nanohitry izy fo ndreky nanihitihy izy, ke nahifiny lambanany, baka iô ho izy: “Anarô tômpiny fo ho tômpin’andraikitry amy fahafatesanarô.* Afaka* zaho. Manomboko ziô, zaho handeha amindrô olo hafa firenena aby io.”
7 Izy niala tao,* aviô izy nandeha tan-tran̈on’ny lelahy araiky mpivavaka amy Zan̈ahary. Titosy Josto an̈aran̈an’ny lelahy io. Narikitry synagoga tran̈onany.
8 Kanefa Krispo mpiandraikitry synagoga ndreky olo jiaby tan-tran̈onany tao nanjary nino Tômpo. Maro tamindrô Korintianin̈y naharen̈y hafatra io koa nanjary mpino ke natao batisa.
9 Aviô tamin’ny alin̈y araiky, karaha ty ho Tômpo tamy Paoly tan̈atin’ny fahitan̈a: “Aza mavozo, fa mitoria* fo aviô aza mangin̈y,
10 fôtony zaho miaraka aminao. Tsisy olo handeha hanafiky anao ke han̈isy ratsy anao. Zaho baka manan̈a olo maro amy tanàna ty.”
11 Ke izy nidôko tao tan̈atin’ny taon̈o araiky sy tapany, aviô izy nampianatra irô volan̈an’ny Zan̈ahary.
12 Tamy Galio governeram-paritrin’i* Akaia, irô Jiosy aby io nan̈ano jery araiky hanohitry Paoly, ke izy nindesindrô tamy tribinaly,*
13 baka iô ho irô: “Lelahy ty mitaon̈o olo hanompo Zan̈ahary amy fomba tsy man̈ara-dalàn̈a.”
14 Kanefa egy Paoly hivolan̈a in̈y, karaha ty ho Galio tamindrô Jiosy aby io: “Izikoa lelahy io nan̈ano raha tsy manjary na nan̈ano raha mifanohitry amy lalàn̈a, normaly tsarabe zaho koa maharitry mitandren̈y anarô.
15 Fa izikoa izy ty adihevitry momba volan̈a ndreky an̈aran̈a aviô lalàn̈anarô tômpiny, anjaranarô tômpiny mandamin̈y izy. Zaho tsy tihitsara raha aby zen̈y.”
16 Irô baka tiô nitoravany niala tamy tribinaly tiô.
17 Ke irô jiaby samby nanambotro Sostena, tsy azôvy zen̈y fa mpiandraikitry synagoga, aviô irô nanomboko namopoko izy nan̈oloan̈a tribinaly tiô. Fa Galio ndraiky tsy niditry tamin’ny afaira io foeky.
18 Paoly koa fa baka nidôko tao andra vitsivitsy, izy nan̈ano veloma irô rahalahy aby io aviô izy niondran̈a sambo nandeha a Syria, niaraka tamy Prisila ndreky Akoila. Nirahany nitapahan̈a fôhiky fan̈evanany ta Kenkrea tan̈y, fôtony nisy vava nataony.
19 Irô baka tiô navy ta Efesosy. Nambelany tao irô fa izy ndraiky niditry tamy synagoga ke niady hevitry tamindrô Jiosy aby io.
20 Irô niangavy izy hidôko elaela, fa izy fo tsy nan̈eky.
21 Nataony veloma irô, ke ho izy tamindrô: “Mbala himpody aminarô atỳ ndraiky zaho, izikoa sitrapôn’i Jehovah.” Izy baka tiô niondran̈a sambo baka ta Efesosy,
22 aviô izy nijotso ta Kaisaria. Izy baka iô nanonga* ke nan̈ano mbalatsara fiangonan̈a, aviô izy nandeha nijotso ta Antiokia.
23 Izy koa fa baka nidôkodôko tao, lôso izy nitety faritr’i Galatia ndreky Frijia ke nankahery mpianatra jiaby.
24 Nisy Jiosy araiky manan̈a an̈aran̈a Apolosy zay navy ta Efesosy tao. Izio teraka ta Aleksandria, baka iô izio lelahy ten̈a nahay nan̈ano kabaro sady nahay Soratra Masin̈y tsarabe.
25 Izy nampianarin̈y* lalan̈an’i* Jehovah, aviô fan̈ahy* nahavy izy nafana fô mare ke izy nitory ndreky nampianatra raha momba Jesosy tamy fomba marin̈y tsarabe. Kanefa batisan’i Jaona fo hainy.
26 Tsy nivakavaka foeky izy nitory tamy synagoga tao, ke Prisila ndreky Akoila koa fa naharen̈y izy, izy nindesindrô niaraka tamindrô. Aviô nazavaindrô roe fivadiany taminany marin̈y tsarabe lalan̈an’ny* Zan̈ahary.
27 Kanefa, fôtony Apolosy tihandeha a Akaia, irô rahalahy aby io nanoratra tamindrô mpianatra aby io baka izy hiraisindrô tsarabe. Izy koa fa navy tan̈y, nampiany mare irô olo aby nanjary mpino baka tamin’ny hatsaram-pan̈ahy miavaka naboakan’ny Zan̈ahary.
28 Nafana fô mare izy nan̈amia porofo mazava tamason’olo tiô fa diso irô Jiosy aby io, salakady naboakany irô tsarabe baka tamy Soratra Masin̈y tao fa Jesosy io Kristy.
Lamariky amy Pazy Ambany
^ Na: “Paoly nifanakalo hevitry tamin’olo.”
^ Abt: “Anò ho an̈abon’ny lohanarô tômpiny fo lionarô.”
^ Abt: “Madio.”
^ Tsy taia izio fa tamy synagoga.
^ Na: “mivolàn̈a.”
^ Mety ta Jerosalema izio.
^ Fampianaran̈a am-bava izy tiany koran̈iny eto.
^ Na: “fampianaran̈an’i.”
^ Na: “fan̈ahy masin̈y.”
^ Na: “fampianaran̈an’ny.”
