Asan’ny Apostoly 19:1-41
19 Tafaran’izen̈y, tamin’i Apolosy mbala ta Korinto, Paoly nandeha namakivaky faritry tan̈ivon-tany,* baka iô izy nandeha nijotso ta Efesosy. Tao izy nahita mpianatra vitsivitsy,
2 ke ho izy tamindrô: “Anarô ma nahazo fan̈ahy masin̈y tamin’ny anarô nanjary mpino?” Ho irô taminany: “Zahay kony tsiary naharen̈y raha momba fan̈ahy masin̈y zen̈y ay!”
3 Ke ho izy: “Ino fo batisa nan̈anaovan̈a batisa anarô?” Ho irô: “Batisan’i Jaona.”
4 Ho Paoly: “Jaona nan̈ano batisa misy han̈aboahan’olo fa irô efa nibebaka. Baka iô izy nivolan̈a tamin’olo fa irô tôkony hino araiky ho avy afaranany, tsy azôvy zen̈y fa Jesosy.”
5 Irô koa fa naharen̈y zen̈y, irô natao batisa tamin’ny an̈aran̈an’i Jesosy Tômpo.
6 Aviô Paoly koa fa nametra-tan̈ana tamindrô, irô nilatsahan’ny fan̈ahy masin̈y, ke irô nanomboko nivolan̈a tamy volan̈a isan-karazany baka iô naminan̈y.
7 Kadiriny 12 lahy tiô irô jiaby.
8 Tan̈atin’ny telo fanjava, Paoly niditry tamy synagoga tao salakady nasaky nitory. Izy nan̈ano kabaro ndreky nifen̈y nandresy lahatra olo momba Fanjakan̈an’ny Zan̈ahary.
9 Kanefa olo sasany tsy nety nino foeky,* aviô irô nankaratsy Lalan̈a* io nan̈oloan̈a vahoaka tiô. Ke izy niala tamindrô tiô, salakady nindesiny niaraka taminany irô mpianatra aby io. Isan’andra izy nan̈ano kabaro tan̈atin’ny efitry malalaka tamy lekaolin’i Tyrano tao.
10 Raha zen̈y nahadin̈y taon̈o aroe, ke naharen̈y volan̈an’ny Tômpo aby lan̈iany olo nipetraka tamy faritanin’i Azia tan̈y, na Jiosy zen̈y na Griky.
11 Aviô, baka tamy tan̈anan’i Paoly,* Zan̈ahary tsy vôly nan̈ano fahagagan̈a miavaka.
12 Ke ndray lamba na tablie nikasiky vatan̈anany fo nindesin̈y tamin’olo marary, direkty irô janga tamin’ny aretin̈indrô baka iô koa niboaka irô fan̈ahy ratsy aby io.
13 Kanefa sasany tamindrô Jiosy nandehandeha nan̈aboaka demony aby io nan̈aohatra nampiasa an̈aran̈an’i Jesosy Tômpo tamindrô olo nisazaohan’ny fan̈ahy ratsy aby io. Ho irô: “Amin’ny an̈aran̈an’i Jesosy araiky torian’i Paoly in̈y, zaho man̈iraka anarô hiboaka!”
14 Nisy fito tamindrô olo aby nan̈ano raha zen̈y, zanakalahin’ny lohandohan’ny mpisôron̈o jiosy araiky kahian̈a Skeva.
15 Kanefa ho fan̈ahy ratsy io tamindrô: “Zaho mahay Jesosy aviô haiko koa Paoly, fa anarô fo azôvy?”
16 Ke lelahy nisazaohan’ny fan̈ahy ratsy io nantaoraka tamindrô, baka iô resiny aby irô tsiaraikiaraiky; ke tsy amy sikiny irô nilefa baka tamy tran̈o io tao sady naratra.
17 Nanjary hain’olo jiaby nipetraka ta Efesosy tao raha zen̈y, na Jiosy zen̈y na Griky. Ke olo jiaby navozo, aviô nahainahazo voninahitry fo an̈aran̈an’i Jesosy Tômpo.
18 Maro tamindrô olo nanjary mpino aby io navy, ke tamason’olo tiô irô namaosa ndreky nitantara raha nataondrô.
19 Ia, maro tamindrô mpan̈ano aody aby io namory bokindrô ndreky nan̈ôro irô io nan̈oloan̈a olo jiaby tiô. Izikoa fa natao kônty, valerandrô io nandeha 50 000 vola volafotsy.
20 Baka tamin’ny angôvon’i Jehovah, nahainiparitaka fo volan̈an’ny Zan̈ahary aviô nahainaro fo olo nino izio.
21 Tafaran’ny raha aby zen̈y niboaka, Paoly tapa-kevitry fa izy koa fa baka mamakivaky Makedonia ndreky Akaia, izy handeha a Jerosalema. Ho izy: “Zaho koa fa baka an̈y, zaho tsy maintsy mandeha a Roma koa.”
22 Ke aroe tamindrô olo nikarakara izy aby io, tsy azôvy zen̈y fa Timoty ndreky Erasto, nirahiny nandeha ta Makedonia, fa izy ndraiky nidôkodôko tamy faritanin’i Azia tao.
23 Tamy fotoan̈a zen̈y, nisy korontan̈a be ta Efesosy momba Lalan̈a* io.
24 Nisy lelahy mpanefy volafotsy zay, Demetrio an̈arany, mpan̈amboatra tempoly helin’i Artemisy tamy volafotsy. Raha zen̈y nazahoandrô mpan̈ano asa tan̈ana aby io vola be.
25 Ke navorin’i Demetrio irô lelahy aby io ndreky irô olo hafa man̈ano asa karaha zen̈y koa, aviô ho izy: “A anarô, hainarô tsarabe fa baka amin’ny asa ty mahavy atsika manan-draha.
26 Kanefa hitanarô ndreky ren̈inarô ziôty fa i Paoly in̈y nandresy lahatra olo marobe sady nampiova hevitry irô, ary tsy a Efesosy eto fo raha zen̈y fa presky amy faritry jiaby amy faritanin’i Azia foeky. Izy baka mivolan̈a fa zan̈ahary namboarin’ny tan̈ana zen̈y tsy zan̈ahary.
27 Ke tsy velon-ten̈antsika ty fo atahaoran̈a ho ratsy laza fa, firaka amy tempolin’i Artemisy zan̈aharivavintsika matanjaka io koa handeha hiritriretin’olo fa tsisy dikany. Izy araiky ivavahan’olo man̈eran̈a faritanin’i Azia salakady man̈eran-tany* foeky, kanefa izy ho very hasin̈y.”
28 Neloko mare irô olo aby io izikoa fa naharen̈y zen̈y, ke irô nandronton̈o karaha ty: “Matanjaka Artemisin’ny Efesianin̈y!”
29 Ke nialamboetry irô tanàna araiky tao, aviô gorodobe irô jiaby niditry tamy teatra tao, sady nantsoritsoritindrô niaraka tamindrô koa i Gaio ndreky Aristarko, Makedonianin̈y aroe lahy dia araiky tamy Paoly.
30 Paoly ndraiky tihiditry tamy teatra tao hikoran̈a amindrô vahoaka aby io, fa izy fo tsy nimboandrô mpianatra aby io.
31 Ary ndray sasany tamindrô olo aby mpikarakara fety ndreky saoma mba nandefa hafatra tamy Paoly ke niangavy izy tsy hiditry amy teatra ao, tsao fo izy hidiran’andra. Irô io baka kamaradiny.
32 Tan̈atin’ny fotoan̈a zen̈y, sasany tamindrô olo aby tamy teatra tao nandronton̈o raha araiky, sasany ndraiky nandronton̈o raha hafa. Nialamboetry vahoaka vory tao. Tsy hain’ny ankamaraozandrô aby ino antony naviandrô tao.
33 Naposiposindrô Jiosy aby io handeha aloha arỳ i Aleksandra, ke izy nindesin’olo niala tamy vahoaka tiô. Izy nan̈ano fihetsika tamy tan̈ananany hampangin̈ana vahoaka, fôtony izy tihivolan̈a fiaraovan-ten̈anany.
34 Kanefa izikoa fa haindrô fa izy Jiosy, irô jiaby nandronton̈o mare karaha ty tan̈atin’ny lera aroe tiô: “Matanjaka Artemisin’ny Efesianin̈y!”
35 Fa tamy farany, izikoa fa vitan’ny ben’ny tanàna nampangin̈y vahoaka, ho izy: “A anarô Efesianin̈y, azôvy ma olo tsy mahay fa tanànan’ny Efesianin̈y ty mpiambin̈y tempolin’i Artemisy zan̈aharivavy matanjaka ndreky mpiambin̈y sary latsaka baka tan-dan̈itry in̈y?
36 Ke nohon’ny raha aby zen̈y tsy mety famaran̈a, anarô tôkony ho kalma fo ndreky tsy ho mekimeky han̈ano raha.
37 Anarô nitondra irô lelahy aby ty eto, kanefa irô io salakady tsy mpangalatra mamaky tempoly baka iô tsy nanihitihy zan̈aharivavintsika koa.
38 Ke izikoa Demetrio ndreky irô mpan̈ano asa tan̈ana miaraka aminany aby io tihitory olo, efa misy andra natao hitsaran̈a aviô iô koa governeram-paritry;* ke an̈y irô tôkony hifampitory.
39 Fa izikoa ndraiky anarô mitady raha ankoatran’izen̈y, amy fivorian̈a mahazatra* an̈y tsy maintsy hangalan̈a fanapahan-kevitry momba zen̈y.
40 Fôtony, baka tamy raha nandalo niany in̈y, atsika mety hitorian̈a fa nitaon̈o olo hanohitry fanjakan̈a. Atsika baka tsisy antony mari-pôtotro mety amezantsika han̈azavan̈a antony mahavy atsika mivorivory sady mikorontan̈a eto io.”
41 Izy koa fa baka nivolan̈a zen̈y, vahoaka io niravan̈iny.
Lamariky amy Pazy Ambany
^ Izio tan̈ivon-tanin’ny faritrin’i Azia.
^ Na: “olo sasany mbala nankamafy fôndrô fo sady tsy nino.”
^ Dikan’izio: Paoly nampiasain̈a na natao fitaovan̈a.
^ Na: “amy tany jiaby misy olo.”
^ Na: “ara-dalàn̈a.”
