Asan’ny Apostoly 20:1-38
20 Izikoa fa vôly korontan̈a in̈y, Paoly nampangala irô mpianatra aby io. Nankahireziny irô baka iô nataony veloma, aviô izy nandeha ta Makedonia.
2 Izy koa fa baka namakivaky irô faritry aby io ndreky nankahery mare irô mpianatra aby tan̈y, izy navy ta Gresy.
3 Izy nidôko tan̈y telo fanjava. Fa irô Jiosy aby io nan̈ano tetiky hamonoan̈a izy tamin’izy hiondran̈a sambo handeha Syria, ke izy nanapa-kevitry himpody hamakivaky Makedonia ndraiky.
4 Ty aby olo niaraka taminany: Sopatera zanakalahin’i Pyro baka a Beria; Aristarko ndreky Sekondo, irô io samby baka a Tesalonika; Gaio baka a Derbe; Timoty; aviô Tykiko ndreky Trofimo, irô io samby baka amy faritanin’i Azia.
5 Irô lelahy aby io nandeha talohanay ke niambin̈y zahay ta Troasy,
6 fa zahay ndraiky niondran̈a sambo baka ta Filipỳ, tafaran’ny Fetin’ny Môfo Tsisy Levira. Baka iô afaka dimy andra zahay navy tamindrô ta Troasy tan̈y. Zahay nidôko tao fito andra.
7 Tamin’ny andra voanalohany tamin’ny herin̈iandra, zahay niaraka nivory hihina. Paoly nan̈ano kabaro tamindrô, fôtony kiaka andra izy handeha. Nitohizany firaka sasakalin̈y kabaronany.
8 Nisy lalampon̈o maro nan̈azava efitry an̈abo etazy nivorianay.
9 Nisy manafo lahy kahian̈a Eotyka zay nipetraka tamy lafenaitra tiô. Tafandry mare izy an̈atiny Paoly mbala nan̈ano kabaro in̈y. Lalin̈y mare tôromasonany, ke izy latsaka baka tamin’ny etazy faharoe. Izy koa fa nahangan̈a in̈y, kaiky izy efa maty.
10 Kanefa Paoly nijotso baka iô izy nantaoraka taminany ke nitolon̈o izy, aviô ho izy: “Anarô aza mialamboetry eky, fôtony izy efa velon̈o.”
11 Paoly baka tiô nanonga, aviô izy nanapaka môfo baka iô izy nanomboko nihina. Izy mbala nanohy nikoran̈a elaela firaka andra nipiriaka, aviô izy lôso.
12 Manafo lahy efa velon̈o in̈y nindesindrô olo aby io; irô ravoravo mare.*
13 Zahay nandeha tsialohaloha ke niondran̈a sambo nandeha ta Aso. Tan̈y baka zahay nieritreritry hangala Paoly. Nirahiny nan̈ano zen̈y zahay fôtony izy tihandeha vity handeha an̈y.
14 Ke zahay koa fa tatrany ta Aso tao, izy naondran̈anay tan̈atin’ny sambo tao aviô zahay nandeha ta Mitylena.
15 Nandeha ndraiky koa zahay amarain’izin̈y, ke zahay navy tamy sisin’ny nôsy Kiô. Nidôkodôko ta Samo tao zahay kiaka andran’izin̈y, baka iô zahay navy ta Mileto andra fan̈araka zin̈y.
16 Paoly nanapa-kevitry tsy hijanon̈o ta Efesosy baka izy tsy hidôko ela amy faritanin’i Azia. Neky mare baka izy, fôtony izy tiho avy a Jerosalema amin’ny andran’ny Fetin’ny Pantekaoty, izikoa tatrany.
17 Fa ndray zen̈y, ta Mileto tao izy nandefa hafatra tamindrô anti-pan̈ahin’ny fiangonan̈a ta Efesosy tan̈y baka irô ho avy aminany ao.
18 Irô koa fa navy taminany tiô, karaha ty ho izy tamindrô: “Hainarô tsarabe karakôry nataoko tamy zaho niaraka taminarô rango tamin’ny andra voanalohany nandiavako faritanin’i Azia.
19 Zaho nanompo Tômpo, ke nanetry ten̈a mare zaho izikoa fa nan̈ano zen̈y, salakady latsaka ranomaso aviô navoa fitsapan̈a marobe fôtony irô Jiosy aby io nan̈ano tetiky hamonoan̈a zaho.
20 Tsy nivakavaka foeky zaho nivolan̈a taminarô raha mahatsara anarô, ndreky nampianatra anarô tamason’olo ndreky isaka tran̈o.
21 Fa zaho nan̈amia fan̈azavan̈a feno* tamy Jiosy ndreky tamy Griky momba fibibahan̈a amy Zan̈ahary ndreky finoan̈a Jesosy Tômpontsika.
22 Hitanarô amizay ziô, zaho io handeha a Jerosalema, fôtony zaho tsy maintsy man̈araka fitaritan’ny* fan̈ahy masin̈y, natà tsy haiko aby ino raha havoa zaho avy an̈y.
23 Ny raha haiko fo, fan̈ahy masin̈y tsy mety vôly man̈ambara zaho fa figadran̈a ndreky fahorian̈a raha miambin̈y zaho isaka tanàna.
24 Kanefa, fahin̈ananaka io tsy raha maventy aminaka,* fa ny raha maventy aminaka: Hankefa lomoainaka ndreky fanompoan̈a nankin̈in’i Jesosy Tômpo taminaka, tsy ino zen̈y fa hitory* amy fomba feno vaovao tsara momba hatsaram-pan̈ahy miavaka naboakan’ny Zan̈ahary.
25 “Aviô, haiko ziôty fa anarô jiaby nitoriako vaovao tsara momba Fanjakan̈an’ny Zan̈ahary io efa tsisy hahita zaho* eky.
26 Fa zaho niany ty mangala anarô ho vavolombelon̈o fa zaho afaka* amy lion’olo jiaby,
27 fôtony zaho tsy nivakavaka foeky nan̈ambara taminarô sitrapôn’ny* Zan̈ahary jiaby.
28 Tandrema tsarabe ain̈inarô baka iô karakarà tsarabe ôndrikôndriky jiaby, fôtony anarô nitindren’ny fan̈ahy masin̈y hiandraikitry irô io, amy zen̈y anarô hikarakara* fiangonan̈an’ny Zan̈ahary nividiny tamy lion’ny Zanakanany.
29 Haiko fa lera zaho lôso, hisy amboadỳ masiaka hiditry aminarô iô, ke irô io tsy hahinakinaka ôndrikôndriky foeky.
30 Aviô baka aminarô ao fo hiboahan’olo mampianatra raha diso misy hitahaoman̈a irô mpianatra aby io han̈araka irô.
31 “Ke miambesa fo, baka iô tsaraova fa tan̈atin’ny telo taon̈o, matsan̈a alin̈y, zaho tsy vôly nan̈anatra anarô tsiaraikiaraiky. Tomoan̈y aby zaho tamy zaho nan̈ano zen̈y.
32 Ke anarô ziôty ankin̈iko amy Zan̈ahary aviô irarian̈a volan̈a momba hatsaram-pan̈ahinany miavaka hiaro anarô. Volan̈a io baka mahavita mankahery anarô ndreky man̈ampy anarô hahazo* lova miaraka amindrô olo nankamasin̈iny aby io.
33 Zaho tsy nan̈iry volafotsy na volamena na lamban’olo foeky.
34 Hainarô tsarabe fa tan̈ananaka aby ty nazahoako raha nilaiko ndreky raha nilaindrô olo aby niaraka taminaka.
35 Naboakako anarô tamy raha jiaby fa anarô tsy maintsy miasa mare karaha zen̈y misy han̈ampianarô irô olo mila ampian̈a aby io. Aviô tsaraova fo volan̈an’i Jesosy Tômpo ty: ‘Man̈amia raha ny ten̈a mampasambatra tozay mahazo raha.’”
36 Izy koa fa baka nivolan̈a raha aby zen̈y, izy nandohaliky niaraka tamindrô jiaby baka iô izy nivavaka.
37 Nitomoan̈y mare irô jiaby, aviô Paoly nitolon̈indrô ndreky nirôfindrô* tam-pitiavan̈a.
38 Irô baka nalahelo mare azon’izy nivolan̈a fa irô efa tsy hahita izy* eky. Irô baka tiô nan̈atitry izy firaka tamy sambo tan̈y.
Lamariky amy Pazy Ambany
^ Na: “irô nahazo fankahirezan̈a maventy.”
^ Na: “zaho nitory tamy fomba feno.”
^ Abt: “zaho efa voafehin’ny.”
^ Na: “tsisy valerany aminaka foeky.”
^ Na: “han̈azava.”
^ Abt: “saoranaka.”
^ Abt: “madio.”
^ Na: “fikasan̈an’ny.”
^ Na: “hitariky.”
^ Abt: “ndreky man̈amia anarô.”
^ Na: “aviô irô nantaoraka tamy vozon̈on’i Paoly ndreky niôroko izy.”
^ Abt: “saoranany.”
