Asan’ny Apostoly 22:1-30
22 “Rahalahy ndreky raimandreny aby, tandrin̈esanarô zaho ziôty hivolan̈a fiaraovan-ten̈anaka.”
2 Izikoa fa ren̈indrô fa izy nivolan̈a tamindrô tamy teny hebreo, nahainangin̈y fo irô. Ke ho izy:
3 “Zaho Jiosy teraka ta Tarsosy a Kilikia, fa zaho fo nampianarin̈y tamy tanàna ty, ary Gamaliela lastiô nampianatra zaho.* Zaho nampianarin̈y han̈araka Lalàn̈an’ny dadilahibentsika amin’ny an-tsipiriany, ke zaho nafana fô mare tamy fanompoan̈a Zan̈ahary karaha ataonarô jiaby niany ty io.
4 Zaho nan̈enjiky olo aby man̈araka Lalan̈a* io ke naty foeky sasany tamindrô; irô nifiheziko baka iô nampidiriko prizon, na lelahy zen̈y na man̈angy.
5 Mpisôron̈obe ndreky anti-pan̈ahy jiaby afaka mankamarin̈y raha zen̈y. Zaho nahazo taratasy baka tamindrô misy hanambaoran̈a irô rahalahy aby ta Damaskosy tan̈y, aviô zaho efa tan-dalan̈a handeha hanambotro irô tan̈y ndreky hitondra irô efa avoafehy handeha a Jerosalema amy zen̈y irô hisazian̈a.
6 “Fa kadiriny midỳ tiô, tamy zaho tan-dalan̈a efa narikitry Damaskosy in̈y, tiô fo nisy hazavan̈a be baka an-dan̈itry nan̈azava nan̈odidin̈y zaho,
7 ke zaho lavo tamy tany aviô zaho naharen̈y feo nivolan̈a taminaka karaha ty: ‘Saoly, Saoly, nan̈ino ma anao man̈enjiky zaho?’
8 Ho zaho taminany: ‘Azôvy ma anao, tômpoko anao?’ Ho izy taminaka: ‘Zaho Jesosy baka a Nazareta, araiky injehinao.’
9 Irô lelahy niaraka taminaka aby io nahita hazavan̈a io, fa irô fo tsy naharen̈y feon’ny araiky nikoran̈a taminaka io.
10 Ke ho zaho: ‘Ino raha tôkony hataoko, Tômpo?’ Ho Tômpo taminaka: ‘Mitsangàna, baka iô mindao miditry a Damaskosy, fa avy an̈y hisy olo han̈azava aminao raha jiaby irahin̈y hataonao.’
11 Fa, fôtony zaho tsisy raha hitako azon’ny hazavan̈a nazava be in̈y, irô olo niaraka taminaka aby io nitantan̈a zaho firaka zaho navy ta Damaskosy.
12 “Nisy lelahy kahian̈a Ananiasy zay nan̈aton̈o zaho. Izio lelahy mavozo Zan̈ahary ndreky mitandrin̈y Lalàn̈a sady tsara laza tamy Jiosy jiaby nipetraka tan̈y.
13 Izy nitsangana narikitry zaho tiô aviô ho izy taminaka: ‘Saoly, rahalahy, mimpodiana mahita ndraiky anao!’ Niaraka tamy zen̈y zaho nisan̈andra, ke hitako izy.
14 Ho izy taminaka: ‘Zan̈aharin’ny dadilahibentsika aby io efa nifidy anao baka anao hahay sitrapônany ndreky hahita Jesosy, araiky marin̈y, aviô haharen̈y feonany,*
15 fôtony anao ho vavolombelon̈onany man̈oloan̈a olo jiaby momba raha hitanao ndreky ren̈inao.
16 Ke ino raha mbala ambesanao? Mitsangàna, aviô alô anao hatao batisa ke kahia an̈aran̈anany baka anao ho voasasa ho afaka amy fahotan̈anao.’
17 “Fa zaho koa fa nimpody ta Jerosalema teto ke nivavaka tamy tempoly tao, zaho nahita fahitan̈a.
18 Zaho nahita Tômpo nivolan̈a taminaka: ‘Malaky anao, miboaha malaky baka a Jerosalema eto, fôtony irô tsy han̈eky anao hitsangana vavolombelon̈o han̈ambara momba zaho.’
19 Ke ho zaho: ‘A Tômpo, haindrô tsarabe fa zaho nitety synagoga ke nigadraiko ndreky nibomàko lan̈iany olo nino anao;
20 aviô tamy fotoan̈a nandatsahan̈a lion’i Stefana vavolombelon̈onao, zaho mba nitsangana tiô ke nankasitraka raha zen̈y. Zaho niambin̈y lambandrô* olo namono izy aby io.’
21 Fa ho izy taminaka: ‘Mindao fa zaho han̈iraka anao handeha amindrô olo hafa firenena amy tany lavitry aby an̈y.’”
22 Irô nitandren̈y izy firaka izy nivolan̈a raha zen̈y. Baka iô irô nandronton̈o mare karaha ty: “Vonia an̈y* lelahy io, fa izio tsy vain̈y velon̈o!”
23 Azon’irô nandronton̈o ndreky nan̈atsipy lambandrô ambelan̈a aviô nan̈atsipy laposiera tamy tsiko in̈y,
24 kômandan io nan̈amia beko baka Paoly hindesin̈y amy tobin’ny maramila an̈y. Aviô Paoly nirahiny hivilezin̈y karavasy firaka izy mamaosa raha nataony, misy hahaizany tsarabe nan̈ino irô olo aby io niafatrafatra nanohitry Paoly karaha in̈y.
25 Izikoa fa nivavarindrô ain̈inany misy hamangoandrô izy karavasy, karaha ty ho Paoly tamy kapitainy nitsangana tiô: “Anarô ma mahazo mamopoko Romanin̈y* mbala tsendriky voaheloko?”*
26 Izikoa fa ren̈in’ny kapitainy io raha zen̈y, lôso izy nandeha nikoran̈a raha zen̈y tamy kômandan tan̈y, ke ho izy: “Ino raha iritriretinao hatao fa kaiky lelahy io kony Romanin̈y ay?”
27 Ke kômandan io nan̈aton̈o aviô ho izy taminany: “Ho zaho, anao ma Romanin̈y?” Ho izy: “Ia.”
28 Ho kômandan io: “Lafo mare nivangako zom-pirenena romanin̈y.” Fa ho Paoly: “Ninaka ndraiky, rango zaho vo teraka efa nanan̈a zio.”
29 Irô lelahy aby efa tseky handeha hampijaly izy ndreky han̈adikadin̈y izy in̈y direkty niala taminany tiô. Ke navozo kômandan io izikoa fa hainy fa Paoly io Romanin̈y, kanefa izy efa nirahiny nifihezin̈y silisily.
30 Ke amarain’izin̈y, Paoly nivotsaoran’ny kômandan in̈y aviô nirahiny nivory lohandohan’ny mpisôron̈o ndreky irô an̈isan’ny Fitsaran̈a An̈abo Jiosy* jiaby, fôtony tiany ho hay ino tsarabe antony nahavy irô Jiosy aby io nan̈ampanga izy. Baka iô Paoly nindesiny nijotso tamy tany nivoriandrô tan̈y aviô izy nampitsanganiny tan̈ivondrô tiô.
Lamariky amy Pazy Ambany
^ Na: “ary tam-bitin’i Gamaliela lastiô zaho nianatra.”
^ Abt: “feo baka amy vavanany.”
^ Na: “lamba ambelan̈andrô.”
^ Abt: “Adosoa miala ambony tany eto.”
^ Na: “olom-pirenena romanin̈y.”
^ Na: “mbala tsy voatsara?”
^ Na: “Synedriona.”
