Asan’ny Apostoly 24:1-27
24 Dimy andra tafara, Ananiasy mpisôron̈obe nijotso ta Kaisaria niaraka tamin’ny anti-pan̈ahy sasany ndreky avôkà* araiky kahian̈a Tertylo, ke irô nan̈ampanga Paoly tamy governera.
2 Tertylo koa fa navoakaiky, izy nanomboko nan̈ampanga Paoly nan̈oloan̈a Feliksa governera karaha ty:
“Milamin̈y tsarabe aminay eto baka aminao, aviô baka amy fahaizanao mitsinjo ny hoavy mahavy firenena ty mivoatra.
3 Amy fotoan̈a jiaby baka iô ndray aia ndray aia, zahay man̈eky raha aby zen̈y Feliksa hajain̈a, ke zahay ten̈a mankasitraka anao mare.
4 Fa baka anao tsy hitanàko ela, zaho miangavy anao han̈aboaka hatsaram-pan̈ahy aminay ke hitandren̈y zahay saraiky fo.
5 Hitanay baka fa lelahy io mpan̈akorontan̈a,* ke izy mampirisiky Jiosy jiaby eran-tany* hanohitry fanjakan̈a, aviô izy mpitariky sektindrô Nazareanin̈y aby io.
6 Nan̈aohatra tsy nan̈isy fôtiny tempoly koa izy, ke zen̈y antony nanambaoranay izy.
7 ——
8 Lera anao man̈adikadin̈y izy, ho hitanao fa marin̈y aby raha jiaby an̈ampanganay izy zen̈y.”
9 Irô Jiosy aby io koa mba nanaohan̈a fan̈ampangan̈a zen̈y, ke irô nan̈izingizin̈y fa marin̈y raha aby zen̈y.
10 Governera io koa fa nan̈ano fihetsiky tamy lohanany han̈amezan̈a fivolan̈ana i Paoly, karaha ty ho Paoly:
“Haiko tsarabe fa efa taon̈otaon̈o anao nitsara firenena ty, ke ravoravo zaho hivolan̈a fiaraovan-ten̈anaka aminao.
11 Mety hamarin̈inao fa mbala tsy mandilatran’ny 12 andra zay nanongako hivavaka ta Jerosalema.
12 Irô tsy nahita zaho nimalo tamy tempoly tao na nampirisiky vahoaka hikorontan̈a, na tamy synagoga zen̈y na tan-tanàna tao.
13 Baka iô koa irô tsy mahavita man̈aporofo irô raha han̈ampangandrô zaho ziôty io.
14 Kanefa ty ndraiky raha ikeko man̈oloan̈a anao: Eraka raha kahiandrô ‘sekty’* io han̈anaovako fanompoan̈a masin̈y amy Zan̈aharin’ny dadilahibeko aby io, fôtony zaho mino raha jiaby koran̈in’ny Lalàn̈a ndreky voasoratra amy Mpaminan̈y ao.
15 Aviô zaho man̈anten̈a, eraka raha antin̈aindrô olo aby io koa, fa Zan̈ahary hamelon̈o olo marin̈y ndreky olo tsy marin̈y.
16 Zen̈y mahavy zaho mifen̈y fo hanan̈a feon’ny fieritreretan̈a madio* man̈oloan̈a Zan̈ahary ndreky olo.
17 Efa taon̈otaon̈o zaho zay tsy ta Jerosalema, fa zaho baka tiô nimpody sady nitondra fan̈amezan̈a* han̈ampian̈a olo sahiran̈a* amy firenenanaka ndreky han̈ano fan̈atitry.
18 An̈atiny zaho man̈ano raha aby zen̈y, irô nahita zaho tamy tempoly tao sady efa nadio eraka raha takin’ny Lalàn̈a, fa zaho tsy niaraka tamin’olo marobe na nan̈ano raha nampikorontan̈a olo. Kanefa tao nisy Jiosy sasany baka tamy faritanin’i Azia,
19 ke izikoa irô io nisy antony han̈ampangan̈a zaho ankitin̈y, irô tôkony mba navy teto koa nan̈ampanga zaho man̈oloan̈a anao.
20 Na ambilà irô lelahy eto aby io hivolan̈a ino raha tsy mety nataoko tamy zaho nitsangana nan̈oloan̈a Fitsaran̈a An̈abo Jiosy,*
21 izikoa tsy momba raha araiky nironton̈iko tamy zaho nitsangana tamindrô ty edy donko: ‘Momba familaoman̈a olo maty antony hitsaran̈a zaho man̈oloan̈a anarô niany ty io.’”
22 Kanefa Feliksa, nahay tsarabe momba Lalan̈a* io, nandefa irô antsendriky ke ho izy: “Lera kômandan Lysia mijotso atỳ zaho vo mivolan̈a fanapahan-kevitrinaka momba afairanarô ty.”
23 Feliksa nan̈amia beko manamboninahitry io hitana Paoly fa izy fo nimboàny han̈ano raha sasany, aviô nambelany irô namany aby io hikarakara izy.
24 Andra vitsivitsy tafaran’izen̈y, navy Feliksa niaraka tamy Drosila vadiny; Jiosy man̈angy io. Nampaviany tamindrô tiô Paoly, ke nitandrin̈esany izy nikoran̈a momba finoan̈a Kristy Jesosy.
25 Kanefa Paoly koa fa nikoran̈a momba raha mety ndreky tsy mety baka iô fifihezan-ten̈a aviô fitsaran̈a ho avy, navozo Feliksa ke ho izy: “Mindao antsendriky anao, fa mbala hampaviako eto fo anao lera zaho misy fotoan̈a.”
26 Izy koa baka nan̈anten̈a fa Paoly han̈amia vola izy, ke zen̈y nahavy Paoly matetiky nampaviany taminany tiô hikoran̈a taminany.
27 Fa taon̈o aroe tafara tatỳ, Porsio Festosy nisoatra plasin’i Feliksa. Kanefa Paoly nadôkon’i Feliksa tamy prizon tao, fôtony izy tihamparavoravo irô Jiosy aby io.
Lamariky amy Pazy Ambany
^ Abt: “mpan̈ano kabaro.”
^ Abt: “aretin̈y mandripaka; pesty.”
^ Na: “amy tany misy olo.”
^ Na: “tsisy tsin̈iny.”
^ Izio vola.
^ Na: “Synedriona.”
