Asan’ny Apostoly 25:1-27
25 Telo andra tafaran’ny navian’i Festosy tamy faritany io ndreky nangalany fahifan̈a, izy niala ta Kaisaria baka iô nanonga ta Jerosalema.
2 Ke irô lohandohan’ny mpisôron̈o ndreky irô sefosefo tamindrô Jiosy aby io nan̈ampanga Paoly taminany. Irô amizay nanomboko niangavy Festosy
3 baka izy han̈eky fangatahan̈andrô handefa Paoly a Jerosalema. Kanefa irô efa nan̈ano tetiky hisitriky baka hanafiky Paoly ke hamono izy an-dalan̈a an̈y.
4 Fa Festosy nivolan̈a fa Paoly tôkony hitanàn̈a a Kaisaria ao fo, salakady izy lastiô efa tsy ho ela himpody an̈y.
5 Ho izy: “Alifasa mijotso miaraka aminaka irô olo aby manan̈a fahifan̈a aminarô han̈ampanga lelahy zen̈y, izikoa misy raha tsy nety ankitin̈y nataony.”
6 Izy koa fa baka nidôko tamindrô tan̈y kadiriny valo na folo andra, izy nijotso ta Kaisaria. Amarain’izin̈y, izy nipetraka tamy toeran̈a fitsaran̈a* baka iô Paoly nirahiny nindesin̈y tiô.
7 Paoly koa fa niditry, irô Jiosy nijotso baka ta Jerosalema aby in̈y nitsangana nan̈odidin̈y izy, ke maro raha nan̈ampangandrô izy ary maro matomboko koa, kanefa tsy vitandrô aby nan̈aporofo raha aby zen̈y.
8 Fa Paoly niaro ain̈inany, ke ho izy: “Zaho tsy nandika Lalàn̈an’ny Jiosy, na nanota tamy tempoly na tamy Kaisara.”
9 Festosy ndraiky tihahazo sitraka tamindrô Jiosy aby io, ke ho izy tamy Paoly: “Anao ma tihanonga a Jerosalema an̈y baka anao hitsarain̈a man̈oloan̈a zaho momba raha aby zen̈y?”
10 Kanefa ho Paoly: “Zaho mitsangana man̈oloan̈a toeran̈a fitsaran̈an’i Kaisara eto, ke eto tôkony hitsaran̈a zaho. Zaho tsy nan̈ano raha tsy manjary tamindrô Jiosy aby io, ary raha zen̈y hainao tsarabe.
11 Izikoa zaho olon-dratsy ankitin̈y aviô zaho nan̈ano raha tôkony hamonoan̈a zaho, zaho man̈eky ho foaty. Fa izikoa raha tsy marin̈y edy raha han̈ampangandrô lelahy aby ty zaho, tsisy olo manan̈a zò hanolotro zaho amindrô baka hamparavoravo irô fo. Ampanongaiko amy Kaisara afaira ty!”
12 Ke Festosy koa fa baka niaraka nandiniky tamindrô olo fangalany hevitry aby io, ho izy: “Nampanongainao amy Kaisara afaira ty, handeha amy Kaisara an̈y edy anao.”
13 Izikoa fa afaka andra vitsivitsy, Mpanjaka Agripa ndreky Berenika navy ta Kaisaria hitsidiky Festosy, eraka fomba fifan̈ajan̈a.
14 Irô nidôko andra maromaro tao, ke nikoran̈in’i Festosy tamy mpanjaka raha momba Paoly. Ho izy:
“Misy lelahy gadra nambelan’i Feliksa zay ato.
15 Tamy zaho ta Jerosalema, irô lohandohan’ny mpisôron̈o ndreky anti-pan̈ahindrô Jiosy aby io nan̈ampanga izy taminaka, ke irô nangataka baka izy hitsarain̈a ndreky ho voaheloko ho foaty.
16 Kanefa zaho nan̈ambara irô fa tsy fomban’ny Romanin̈y manolotro olo araiky amin’olo man̈ampanga izy baka hamparavoravo irô fo. Fa ambela antsendriky olo ampangain̈a io hiaro ain̈inany man̈oloan̈a irô olo man̈ampanga izy aby io.
17 Ke irô koa fa navy teto, zaho efa tsy niambikambin̈y eky, fa amarain’izin̈y fo zaho efa nipetraka tamy toeran̈a fitsaran̈a aviô lelahy in̈y nirahiko nindesin̈y taminaka tiô.
18 Irô olo aby man̈ampanga izy io koa fa nitsangana hivolan̈a, tsy arakaraka raha ratsy niritriretiko foeky raha nan̈ampangandrô izy.
19 Kaiky raha mampiady hevitry irô io raha momba fivavahandrô amy zan̈ahary* ndreky momba lelahy araiky kahian̈a Jesosy. Izio efa naty kanefa izingizin̈in’i Paoly fa velon̈o.
20 Tsy haiko foeky karakôry hatao handamin̈y adihevitry io, ke zaho nan̈ontany izy tsao izy tihandeha a Jerosalema an̈y ke an̈y izy hitsarain̈a momba raha aby zen̈y.
21 Kanefa Paoly koa fa nangataka izy hitanàn̈a amy prizon ao baka Kaisara* hanapa-kevitry amy raha momba izy, zaho nan̈amia beko hitanàn̈a izy amy prizon ao parapandifasan̈a izy amy Kaisara an̈y.”
22 Ke ho Agripa tamy Festosy: “Zaho koa mba tihitandren̈y lelahy zen̈y.” Ho izy: “Amaray anao haharen̈y izy.”
23 Amarain’izin̈y, Agripa ndreky Berenika navy tamy fomba man̈etriketriky mare. Irô niditry tamin’ny efitry fitsaran̈a tao niaraka tamy maramila, manamboninahitry, ndreky olo manan̈a plasy an̈abo tan-tanàna tao. Festosy amizay nan̈amia beko, ke Paoly nampidirin̈y.
24 Ho Festosy: “Mpanjaka Agripa ndreky anarô jiaby miaraka aminay eto, hitanarô io lelahy nampangaindrô Jiosy aby io taminaka, na ta Jerosalema tan̈y zen̈y na teto, ke irô nandronton̈o fa izio zen̈y efa tsy man̈eva ho velon̈o eky.
25 Kanefa zaho mahita fa izy tsy nan̈ano raha tôkony hamonoan̈a izy foeky. Ke izy koa fa nampanonga afaira ty amy Kaisara, zaho nanapa-kevitry handefa izy an̈y.
26 Fa tsy haiko foeky raha handeha hisoratiko momba izy amy Tômpoko* an̈y, ke zen̈y nahavy zaho nitondra izy man̈oloan̈a anarô jiaby eto, intsaka eky man̈oloan̈a anao, Mpanjaka Agripa, amy zen̈y lera vita ankaity ty, zaho mba misy raha soratin̈y.
27 Fôtony eraka fahitako izy baka, tsy mety mandefa gadra a Roma an̈y kanefa tsy mivolan̈a antony an̈ampangan̈a izy.”
Lamariky amy Pazy Ambany
^ Na: “tamy tribinaly.”
^ Na: “momba fivavahan̈andrô.”
^ Na: “Aogosto.” Izio an̈aram-boninahitry ikahian̈a amperaira romanin̈y.
^ Volan̈a “Tômpoko” eto ty manôndro Aogosto Kaisara.
