Asan’ny Apostoly 26:1-32
26 Ho Agripa tamy Paoly: “Anao mahazo mivolan̈a hiaraovanao ain̈inao.” Ke nivavarin’i Paoly tan̈anany, aviô ho izy:
2 “Ravoravo zaho, Mpanjaka Agripa, fa man̈oloan̈a anao eto zaho niany ty man̈ambara fiaraovan-ten̈anaka momba raha jiaby an̈ampangandrô Jiosy aby io zaho.
3 Fôtony baka, hainao tsarabe irô fombafomba ndreky raha jiaby mampiady hevitry Jiosy. Ke mafadiana kony, manàn̈a faharetan̈a hely hitandren̈y zaho.
4 “Ia, Jiosy jiaby mahay fomba fiainan̈anaka tamy zaho niaraka tamindrô olo firenena araiky aminaka aby io* ndreky ta Jerosalema tan̈y rango zaho mbala hely.
5 Irô efa nahay zaho rango efa ela. Ary izikoa tiandrô, irô afaka mankamarin̈y fa zaho Fariseo, ke nan̈araka tsarabe sekty* farany mentitry amy fivavahan̈anay.
6 Kanefa ziôty ndraiky, baka amy zaho man̈anten̈a fampan̈antinan̈a nataon’ny Zan̈ahary tamindrô dadilahibentsika aby io antony itsaran̈a zaho.
7 Sady zen̈y tsarabe koa fampan̈antinan̈a antin̈ain’ny foko 12 amy firenenantsika eto. Mifen̈y mare irô man̈ano fanompoan̈a masin̈y matsan̈a alin̈y amy Zan̈ahary, fôtony irô man̈anten̈a hahita raha zen̈y tanteraka. Momba fan̈antinan̈a zen̈y mahavy irô Jiosy aby io man̈ampanga zaho io, Mpanjaka.
8 “Nan̈ino ma anarô mieritreritry* fa tsy mety inoan̈a foeky fa Zan̈ahary manangana olo maty?
9 Zaho taloha ziô resy lahatra fa zaho tôkony hifen̈y han̈ano erakan’ny vitako hanoheran̈a an̈aran̈an’i Jesosy baka a Nazareta.
10 Zen̈y tsarabe raha nataoko ta Jerosalema tan̈y, aviô maro tamindrô olo masin̈y aby io koa nampidiriko tamy prizon, fôtony zaho nahazo fahifan̈a baka tamindrô lohandohan’ny mpisôron̈o aby io; baka iô irô olo aby zen̈y koa fa handeha hivonen̈a in̈y, zaho nandatsa-bato han̈ikian̈a raha zen̈y.
11 Matetiky zaho nan̈asazy irô in̈y tan̈atin’ny synagoga jiaby tan̈y, misy hiforsen̈a irô hiala amy finoan̈a. Zaho rômotro mare tamindrô, ke ndraiky lôso foeky zaho nan̈enjiky irô firaka tamy tanàna hafa tan̈y.
12 “Handeha han̈ano zen̈y antony nandihanako ta Damaskosy, fôtony zaho nahazo fahifan̈a ndreky nahazo lalan̈a baka tamindrô lohandohan’ny mpisôron̈o aby io.
13 Tamy zaho tan-dalan̈a in̈y, Mpanjaka, tamy midỳ, zaho nahita hazavan̈a baka tan-dan̈itry. Izio nazavazavan’ny masoandra sady nan̈azava nan̈odidin̈y zaho ndreky irô olo dia araiky taminaka aby io.
14 Zahay jiaby koa fa lavo tamy tany, zaho naharen̈y feo nivolan̈a taminaka tamy teny hebreo karaha ty: ‘Saoly, Saoly, nan̈ino ma anao man̈enjiky zaho? Anao tômpiny fo kony haratra izikoa anao miady amin’ny araiky mitana kira* ay!’
15 Kanefa ho zaho: ‘Azôvy ma anao, tômpoko anao?’ Ho Tômpo: ‘Zaho Jesosy, araiky injehinao.
16 Anao miangàn̈a baka iô mitsangàna. Zaho io miboaka aminao, fôtony anao fidiko hanjary mpanompo ndreky vavolombelon̈o han̈ambara raha efa hitanao ndreky raha mbala haboakako anao momba zaho.
17 Zaho han̈avotro anao amy vahoaka ty ndreky amy firenena hafa han̈irahako anao an̈y,
18 baka anao han̈abian̈a masondrô amy zen̈y irô hiala amin’ny hiziky ke handeha amin’ny hazavan̈a, aviô hiala amy fahifan̈an’i Satana ke handeha ambany fahifan̈an’ny Zan̈ahary, amy zen̈y irô hahazo familan-keloko ndreky lova miaraka amindrô olo nankamasin̈iny aby io fôtony irô mino zaho.’
19 “Narehako volan̈a nambara zaho tan̈atin’ny fahitan̈a baka tan-dan̈itry in̈y, Mpanjaka Agripa,
20 ke zaho nandeha tamindrô olo nipetraka ta Damaskosy tao antsendriky, baka iô zaho nandeha tamindrô ta Jerosalema tan̈y, aviô zaho nandeha tamy faritrin’i Jodia jiaby ndreky tamindrô firenena hafa aby io, ke ty hafatra nindesiko tamindrô: Irô mila mibebaka aviô mimpody amy Zan̈ahary ke man̈ano raha han̈aboahan̈a fa irô efa nibebaka ankitin̈y.
21 Zen̈y nahavy irô Jiosy aby io nanambotro zaho tamy tempoly tao ndreky efa tseky hamono zaho.
22 Kanefa zaho nampian’ny Zan̈ahary, ke zaho mbala mitory fo firaka niany, na amy madiniky zen̈y na amy maventy. Aviô raha nambaran’i Mosesy ndreky raha nambarandrô Mpaminan̈y aby io fa hiboaka fo raha ambarako,
23 tsy ino zen̈y fa Kristy tsy maintsy nijaly, baka iô azon’izy ho voanalohany amin’olo hatsangana amy maty, izy hitory momba hazavan̈a amy vahoaka ty ndreky amin’ny hafa firenena.”
24 Tamy Paoly nivolan̈a raha aby zen̈y misy hiaraovany ain̈inany in̈y, Festosy nivolan̈a mare karaha ty: “Anao efa nanjary adala, Paoly! Fianaran̈a be nataonao fo izy mampa adala anao io!”
25 Fa ho Paoly: “Zaho tsy nanjary adala, Festosy Governera hajain̈a, fa zaho man̈ambara raha marin̈y salakady mitombin̈y* tsarabe.
26 Hain’ny mpanjaka tsarabe baka raha aby zen̈y, ke zen̈y mahavy zaho masaky mikoran̈a raha aby zen̈y aminany. Zaho matoky tsarabe fa tsisy tsy hainy raha jiaby zen̈y, fôtony tsy nisitriky nan̈anaovan̈a raha aby zen̈y.
27 Anao ma, Mpanjaka Agripa, mino irô Mpaminan̈y aby io? Haiko fa anao mino.”
28 Fa ho Agripa tamy Paoly: “Tara hely, anao mety ho naharesy lahatra zaho hanjary Kristianin̈y.”
29 Ke ho Paoly: “Zaho mangataka amy Zan̈ahary, baka tsy niany tsy amaray, tsy anao zaraiky fo fa olo jiaby mitandren̈y zaho niany ty io koa mba hanjary karaha zaho. Fa izy fo anarô tsy ho voafehy silisily karaha ty.”
30 Ke mpanjaka io nitsangana, baka iô nitsangana koa governera ndreky Berenika aviô lelahy jiaby niaraka nipetraka tamindrô tiô.
31 An̈atiny irô miala iô in̈y, irô nifampikoran̈a karaha ty: “Lelahy io tsy nan̈ano raha tôkony hamonoan̈a izy na hahavy izy higadra.”
32 Karaha ty ho Agripa tamy Festosy: “Lelahy io ôtrizay efa nety navôsotro izikoa tsy nampanongainy tamy Kaisara tan̈y afaira io.”
Lamariky amy Pazy Ambany
^ Na: “tamy zaho tamy firenenanaka.”
^ Abt: “mitsara.”
^ Izio kakazo misy tendrony marangitry hitriberan̈a biby misy handroasan̈a izy.
^ Na: “lôzìky.”
