Asan’ny Apostoly 28:1-31
28 Zahay koa fa navy soa aman-tsara tantety, tiô zahay vo nahay fa Malta an̈aran̈an’ny nôsy io.
2 Hafa volan̈an’olo aby nipetraka tamy tany io. Tsara fan̈ahy taminay mare irô,* ke irô nandrehitry môtro aviô zahay niraisindrô tsarabe, fôtony navy mahalen̈y salakady nanintsy andra.
3 Kanefa Paoly koa fa namory hazomaty ndreky nisôron̈o môtro, nisy bibilava misy poàzon niboaka baka tao, azon’ny hafanan̈a, ke nan̈ekitry sady nisangavin̈y tamy tan̈ananany.
4 Izikoa fa hitandrô olo aby nipetraka tamy tany io bibilava misy poàzon niraviravy tamy tan̈anan’i Paoly in̈y, irô nifampikoran̈a karaha ty: “Lelahy io mpamono olo ankitin̈y. Ndray izy tsy naty tan-dranomasin̈y tan̈y, izy tsy nambelan’ny Rariny* ho velon̈o.”
5 Kanefa bibilava in̈y nahifikin’i Paoly tan̈atin’ny môtro tao, aviô izy tsy nan̈ino.
6 Fa irô olo aby io fo nan̈anten̈a fa izy hivôntovônto na ho foaty tampoko. Irô koa fa baka niambin̈y elaela, zahavandrô fa tsisy raha foeky navoa izy, ke irô niova hevitry aviô irô nanomboko nivolan̈a fa izy zan̈ahary.
7 Sefon’ny nôsy io nanan̈a tany maromaro marikitry tany nisy irô io; Poplio an̈aran̈anany. Niraisiny tsara zahay, ke zahay nataony karibo an-tran̈o tan̈atin’ny telo andra.
8 Narary mare baban’i Poplio, fôtony izy nazon’ny lafievra* salakady nivalan-dio; izy nilopaka tam-pandrian̈a. Ke Paoly nandeha taminany tao, aviô izy nivavaka ndreky nametra-tan̈ana taminany ke izy nampahivan̈iny.
9 Tafaran’izen̈y, navy tamy Paoly tiô koa marary hafa tamy nôsy io ke irô nampahivan̈iny.
10 Zahay namezandrô voninahitry ke namiandrô kadô maro. Aviô izikoa fa navy lera handihanan’ny sambo niondran̈anay, efa nataondrô pare tan̈aty tao raha jiaby nilainay.
11 Telo fanjava tafaran’izen̈y, zahay niondran̈a sambo; tamy lohan’izio nisy lamariky ty: “Zanakalahin’i Zeosy.”* Baka a Aleksandria sambo io, fa izio nidôko tamy nôsy io tamy ririn̈iny.
12 Zahay navy tamy paoron’i Syrakosa, ke zahay nidôko tao telo andra.
13 Lôso zahay nanohy dianay, ke zahay navy ta Regioma. Amarain’izin̈y, nisy tsiko naresaka nitsoko baka tatsimo, ke afak’amarain’izin̈y zahay vo navy ta Potioly.
14 Tao zahay nahita irô rahalahy aby io, aviô irô niangavy zahay hidôko tamindrô tao fito andra; zahay baka tiô nandeha ta Roma.
15 Izikoa fa haindrô rahalahy aby ta Roma tan̈y fa zahay ho avy, irô navy firaka tamy Tsenan’i Apio ndreky tamy Tran̈ombahiny Telo ke nitsena zahay. Irô koa fa tsinjon’i Paoly, izy nan̈ano mersy Zan̈ahary sady nahazo angôvo.
16 Zahay amizay koa fa navy ta Roma, Paoly nahazo lalan̈a hipetraka manaokan̈a, fa nisy maramila fo nirahan̈a niambin̈y izy.
17 Kanefa telo andra tafaran’izen̈y, izy nan̈iraka olo hikaiky irô sefosefo tamindrô Jiosy aby io. Irô io koa fa vory, ho izy tamindrô: “Rahalahy aby, ndray zaho tsy nan̈ano raha tsy mety tamin’olo sady tsy nan̈ano raha nifanohitry tamy fombandrô dadilahibentsika aby io, zaho nigadrain̈a baka ta Jerosalema tan̈y aviô natolotro tam-pelantan̈anandrô Romanin̈y aby io.
18 Zaho koa fa baka nataondrô Romanin̈y aby io ankaity, zaho efa tseky hivotsaorandrô, fôtony tsisy antony tôkony hamonoandrô zaho.
19 Kanefa raha zen̈y tsy nikendrô Jiosy aby io foeky, ke zaho voatery nampanonga afaira ty amy Kaisara, fa ndray zen̈y zaho tsisy raha tôkony han̈ampangako firenenanaka.
20 Ke zen̈y antony nahavy zaho nangataka hifanôjy aminarô ndreky hikoran̈a aminarô, fôtony baka amy fan̈antinan̈an’ny Israely mahavy zaho avoafehy silisily ty.”
21 Ho irô taminany: “Zahay tsy nahazo taratasy baka a Jodia momba anao, aviô tsisy amindrô rahalahy baka tan̈y koa nitantara na nivolan̈a raha ratsy momba anao.
22 Fa zahay fo tihaharen̈y hevitrinao, fôtony hainay tsarabe fa izikoa raha momba sekty* io, maro olo mankaratsy izio ndray aia ndray aia.”
23 Ke irô nifan̈ano fotoan̈a taminany, aviô nahainaro fo irô navy tan-tran̈onany tao. Rango maraindrain̈y firaka hariva, izy nampiasa Lalàn̈an’i Mosesy ndreky raha nivolan̈indrô Mpaminan̈y aby io, ke nazavainy tamindrô tsarabe* raha momba Fanjakan̈an’ny Zan̈ahary, amy zen̈y irô ho resy lahatra ke hino Jesosy.
24 Nisy tamindrô io nino raha nivolan̈iny, fa sasany ndraiky tsy nino.
25 Azon’irô tsy nitovy hevitry, irô niala tsihelihely, ke zisty ty fo raha nambaran’i Paoly:
“Marin̈y ankitin̈y volan̈an’ny fan̈ahy masin̈y nambaran’ny mpaminan̈y Isaia tamindrô dadilahibenarô aby io
26 karaha ty: ‘Mindao mivolan̈a amy vahoaka ty: “Anarô haharen̈y, fa tsy ho hainarô foeky dikan’ny raha zen̈y; aviô anarô hizaha, kanefa tsisy raha ho hitanarô foeky.
27 Fôtony fôn’olo aby ty efa nanjary donto, efa nitampenandrô sofin̈indrô, aviô masondrô efa nafodindrô, baka masondrô tsy hahita raha foeky aviô sofin̈indrô tsy haharen̈y raha foeky ke fôndrô tsy hahay dikan’ny raha zen̈y, tsao koa irô himpody aminaka ke zaho hampahivan̈a irô.”’
28 Ke tsara ho hainarô fa famonjian̈a baka amy Zan̈ahary io handeha hambara amin’ny hafa firenena; hay be fa irô hitandren̈y izio.”
29 ——
30 Tan̈atin’ny taon̈o aroe Paoly nipetraka tamy tran̈o nifondroeny. Niraisiny tsarabe lan̈iany olo navy taminany tao.
31 Izy nitory momba Fanjakan̈an’ny Zan̈ahary tamindrô salakady nitory momba Jesosy Kristy Tômpo, baka iô izy tsy navozovozo foeky* sady tsisy olo nanakantsakana.
Lamariky amy Pazy Ambany
^ Na: “Irô tia olo ke tsara fan̈ahy taminay.”
^ Griky: Dike; izio mety ho zan̈aharivavin’ny rariny, araiky mpamaly raha ratsy natao in̈y, na ivolan̈ana ny rariny amin’ny ankapobeny.
^ Na: “tazon̈o.”
^ Na: “Diôskora.”
^ Na: “ke nitoriany tamindrô tamy fomba feno.”
^ Na: “izy nisy korazy.”
