Asan’ny Apostoly 3:1-26
3 Petera ndreky Jaona nandeha nanonga tamy tempoly tamy lera fivavahan̈a, kadiriny troazera folakandra.*
2 Nisy lelahy nalemy vity rango izy vo teraka zay nindesin’olo tamy barôn’ny tempoly; Barô Tsara nikahian̈a izio. Isan’andra izy napetrakandrô tiô amy zen̈y izy mangataka amy zay olo niditry tamy tempoly tao.
3 Niaraka izy nahita Petera ndreky Jaona hiditry amy tempoly ao, izy nangataka vola tamindrô.
4 Fa Petera ndreky Jaona nizaha izy tsarabe, aviô ho Petera: “Zahava zahay.”
5 Ke nizahavany tsarabe irô roe, fôtony izy nan̈anten̈a hahazo raha baka tamindrô.
6 Fa ho Petera: “Zaho tsisy volafotsy ndreky volamena, fa raha misy aminaka amezako anao. Amin’ny an̈aran̈an’i Jesosy Kristy baka a Nazareta, mandihana!”
7 Lelahy io nisambôriny baka tamy tan̈anany ankavanan̈a baka iô nampitsanganiny. Tiô ny iô vitinany ndreky vozom-bitinany nanjary fatatra.
8 Ke izy nitsambokiny baka iô izy nanomboko nandeha. Izy baka tiô nandeha niditry tamy tempoly tao niaraka tamindrô roe lahy. Izy nandeha sady nisôtisôty aviô nidera Zan̈ahary.
9 Hitan’olo jiaby izy nandeha ndreky nidera Zan̈ahary.
10 Haindrô fa izy lelahy araiky nipetraka sady nangataka tamy Barô Tsara tamy tempoly in̈y. Irô gaga sady lany fan̈ahy tamy raha nandalo taminany.
11 Tamin’izy mbala nitana tan̈an’i Petera ndreky Jaona in̈y, olo jiaby nilomoay nan̈aton̈o irô tamy tany kahian̈a Lalan̈a Misy Tafony Namboarin’i Solomona. Lany fan̈ahy mare irô jiaby.
12 Petera koa fa nahita zen̈y, ho izy tamindrô: “Lelahy israelita, nan̈ino ma anarô lany fan̈ahy? Aviô nan̈ino ma anarô mizaha zahay mare karaha raha angôvo baka aminay in̈y na baka amy zahay mahafoe ten̈a amy Zan̈ahary nahavitanay nampandeha izy?
13 Zan̈aharin’i Abrahama ndreky Isàka aviô Jakoba, tsy azôvy fa Zan̈aharin’ny razambentsika, nan̈amia voninahitry Jesosy Mpanomponany, araiky natolotronarô ndreky tsy nikenarô nan̈oloan̈a Pilato in̈y, kanefa Pilato efa tapa-kevitry hankafaka izy.
14 Ia, anarô tsy nan̈eky araiky masin̈y sady marin̈y, fa lelahy mpamono olo ndraiky ny nangatahanarô hivotsaoran̈a.
15 Kanefa Mpitariky Farany Maventy man̈amia fiainan̈a ndraiky nivonenarô. Fa izy natsanganan’ny Zan̈ahary tamy maty, ary zahay vavolombelon̈on’ny raha zen̈y.
16 Baka amin’ny an̈aran̈anany ndreky baka amy zahay mino an̈aran̈anany, zen̈y nahavy lelahy hitanarô sady hainarô io nanjary natanjaka. Baka amy finoan̈a Jesosy nampajanga tanteraka lelahy io man̈oloan̈a anarô jiaby.
17 Rahalahy aby, haiko fa tsy hainarô raha nataonarô in̈y, karaha irô mpitondra anarô aby io fo.
18 Kanefa zen̈y fomba nan̈atantirahan’ny Zan̈ahary raha aby nambarany tsialohaloha baka tamy mpaminan̈y* jiaby, tsy ino zen̈y fa Kristy* tsy maintsy hijaly.
19 “Ke anarô mibibaha baka iô anarô mimpodiana,* amy zen̈y ho voafafa fahotan̈anarô, ke hisy fotoan̈a mamelombelon̈o baka amy Jehovah.
20 Izy han̈iraka Kristy voatendry han̈ampy anarô, tsy azôvy zen̈y fa Jesosy.
21 Izy tsy maintsy miambin̈y an-dan̈itry an̈y, parapavian’ny fotoan̈a han̈ampodianan̈a raha jiaby amy plasiny ndraiky, tsy ino zen̈y fa irô raha aby nirahin’ny Zan̈ahary nambarandrô mpaminan̈inany masin̈y taloha tan̈y.
22 Mosesy baka efa nivolan̈a: ‘Jehovah Zan̈aharinarô hanendry mpaminan̈y ninarô, mpaminan̈y karaha zaho, baka amy rahalahinarô. Zay raha volan̈iny tsy maintsy tandrin̈esanarô.
23 Ke zay olo tsy mitandren̈y Mpaminan̈y io handeha haripaka tsy ho an̈isan’ny vahoaka.
24 Mpaminan̈y jiaby, rango tamy Samoela ndreky irô jiaby nandimby izy, samby efa nan̈ambara mazava tsarabe momba andra ziôty io.
25 Anarô zanakandrô mpaminan̈y aby io ndreky zanakan’ny fifan̈ikian̈a nataon’ny Zan̈ahary tamy razambenarô, tamin’izy nivolan̈a tamin’i Abrahama: ‘Baka amy taranakanao hazahoan’ny fianakavian̈a jiaby ambony tany eto hatsaran̈a.’
26 Zan̈ahary koa fa baka nanangana Mpanomponany io, izy nirahiny handeha aminarô antsendriky ke han̈ampy anarô tsiaraikiaraiky hiala amy raha ratsy nataonarô. Zen̈y hatsaran̈a ho azonarô.”
Lamariky amy Pazy Ambany
^ Abt: “tamy lera fahasivy.”
^ Abt: “tamy vavandrô mpaminan̈y.”
^ Abt: “Kristinazy.”
^ Na: “mimpodiana amy Zan̈ahary.”
