Asan’ny Apostoly 4:1-37
4 Tamin’irô roe lahy mbala nikoran̈a tamy vahoaka in̈y, irô mpisôron̈o aby io ndreky sefon’ny mpiambin̈y tempoly aviô irô Sadoseo aby io navy tamindrô tiô.
2 Irô nahinihiny fôtony irô apôstôly aby io nampianatra olo ndreky nan̈ambara mazava tsarabe fa Jesosy efa natsangana tamy maty.*
3 Ke irô nisambôrindrô aviô nigadraindrô firaka amarain’izin̈y, fôtony andra efa hariva.
4 Kanefa maro tamindrô olo nitandren̈y kabaro in̈y nanjary mpino, ke nanjary kadiriny 5 000 kôntindrô lelahy aby io.
5 Amarain’izin̈y, irô mpitondra ndreky anti-pan̈ahy* aviô mpanoratra lalàn̈a aby io nivory ta Jerosalema,
6 niaraka tamin’i Anasy lohandohan’ny mpisôron̈o, Kaiafa, Jaona, Aleksandra, ndreky havan’ny lohandohan’ny mpisôron̈o io jiaby.
7 Petera ndreky Jaona nataondrô tan̈ivondrô tiô, baka iô irô nan̈ontaniandrô karaha ty: “Angôvo baka aia, na baka tamin’ny an̈aran̈an-jôvy nan̈anaovanarô raha nataonarô in̈y?”
8 Feno fan̈ahy masin̈y i Petera, ke ho izy tamindrô:
“Anarô mpitondra vahoaka ndreky anti-pan̈ahy aby,
9 izikoa momba raha tsara natao tamy lelahy nisy antsa io edy antony mahavy anarô man̈ontany zahay niany, aviô izikoa tianarô ho hay azôvy nampajanga izy,
10 tsara ho hainarô jiaby ndreky olo jiaby an’Israely eto fa baka amin’ny an̈aran̈an’i Jesosy Kristy baka a Nazareta, araiky nivonenarô tamy pôtô kanefa efa natsanganan’ny Zan̈ahary tamy maty in̈y, baka aminany mahavy lelahy io salama tsarabe mitsangana man̈oloan̈a anarô eto io.
11 Izy ‘vato tsy nasianarô mpan̈amboatra tran̈o aby io fôtiny, kanefa nanjary vato fehizoro farany maventy.’*
12 Baka iô koa tsisy olo hafa hazahoan̈a famonjian̈a, fôtony ambanin’ny lan̈itry atỳ tsisy an̈aran̈a hafa eky namian̈a olo ke hazahoantsika famonjian̈a.”
13 Lany fan̈ahy irô izikoa fa hitandrô fa Petera ndreky Jaona tsy navozovozo foeky nivolan̈a; haindrô baka fa irô io olo tsy nahita fianaran̈a* sady olo tsotra. Irô baka tiô tontohitry fa irô roe lahy io niaraka tamy Jesosy.
14 Kanefa irô tsy nahita raha koran̈iny, fôtony lelahy efa janga in̈y hitandrô nitsangana niaraka tamindrô roe lahy tiô.
15 Ke irô nirahandrô niboaka tambelan̈an’ny tran̈o nisy Fitsaran̈a An̈abo Jiosy* io, aviô irô niaraka nandiniky,
16 ke ho irô: “Hataontsika akôry lelahy aby io? Fôtony baka irô nan̈ano fahagagan̈a* miavaka, ary raha zen̈y hitan’olo jiaby mipetraka a Jerosalema eto.
17 Fa baka raha zen̈y tsy hahaihiparitaka amin’olo eky, alô irô hampitahôrintsika, baka iô volan̈intsika irô baka irô tsy hikoran̈a momba an̈aran̈a zen̈y amin’olo, na amin-jôvy zen̈y na amin-jôvy.”
18 Ke nikahiandrô irô roe lahy, baka iô irô tsy nimboandrô hivolan̈a na hampianatra amin’ny an̈aran̈an’i Jesosy eky.
19 Fa ho Petera ndreky Jaona tamindrô: “Anjaranarô mitsara asa marin̈y amason’ny Zan̈ahary izikoa anarô ny tandrin̈esan̈a fa tsy Zan̈ahary.
20 Fa izikoa zahay, tsy mety zahay koa ho vôly hikoran̈a momba raha hitanay ndreky ren̈inay.”
21 Irô roe lahy koa fa baka nampitahôrindrô ndraiky koa, irô navôsotrondrô, fôtony irô tsy nahita antony han̈asazian̈a irô. Irô lastiô navozo vahoaka, fôtony olo jiaby nan̈amia voninahitry Zan̈ahary baka tamy raha nandalo in̈y.
22 Lelahy nan̈anaovan̈a fahagagan̈a ke nanjary janga in̈y baka efa 40 taon̈o mandilatra.
23 Irô koa fa nivotsaoran̈a, irô nandeha tamindrô mpianatra hafa aby in̈y tan̈y, ke nitantaraindrô tamindrô raha nivolan̈in’ny lohandohan’ny mpisôron̈o ndreky irô anti-pan̈ahy aby io tamindrô.
24 Irô koa fa naharen̈y zen̈y, irô jiaby niaraka nivavaka mare tamy Zan̈ahary ke ho irô:
“Tômpo Farany An̈abo, anao Araiky nan̈amboatra lan̈itry ndreky tany ndreky ranomasin̈y baka iô raha jiaby amindrô io ao,
25 aviô anao koa nampivolan̈a Davida dadilahibenay sady mpanomponao karaha ty: ‘Nan̈ino ma irô firenena aby io mialamboetry, baka iô nan̈ino ma irô vahoaka aby io mandiniky raha tsisy dikany?
26 Irô mpanjakan’ny tany aby io nitsangana, aviô irô mpitondra aby io nivory ke nan̈ano jery araiky hanohitry Jehovah ndreky hanohitry voahosotronany.’*
27 Ia, tamy tanàna ty baka Heroda ndreky Pontio Pilato ndreky irô hafa firenena aby io aviô vahoakan’Israely niaraka nivory, ke nan̈ano jery araiky hanohitry Jesosy mpanomponao masin̈y, araiky voahosotronao.
28 Nan̈ano zen̈y irô baka ho tanteraka raha efa nambaranao tsialohaloha, fôtony anao manan̈a angôvo, sady efa zen̈y sitrapônao.
29 A Jehovah e, tandrin̈esa fampitahaoran̈a ataondrô zen̈y, aviô ataova raha hahavy mpanomponao tsy havozovozo foeky han̈ambara volan̈anao.
30 Anao hamavatra tan̈ananao baka hampajanga olo ndreky han̈ano fahagagan̈a ndreky famantaran̈a amin’ny anaran̈an’i Jesosy mpanomponao masin̈y.”
31 Irô koa fa baka niangavy* Zan̈ahary, nihozongozon̈o tany nivoriandrô io, aviô irô jiaby nanjary feno fan̈ahy masin̈y, ke irô tsy navozovozo foeky nan̈ambara volan̈an’ny Zan̈ahary.
32 Maro olo nanjary mpino, ke irô nanjary fô araiky ndreky jery araiky, baka iô tsisy natà araiky tamindrô nivolan̈a fa nindrô tômpiny fanan̈anandrô, fôtony raha jiaby nitambarandrô.
33 Irô apôstôly aby io tsy vôly nitory momba nananganan̈a Jesosy Tômpo, ary irô nahômby tsarabe izikoa fa nan̈ano zen̈y. Aviô maro mare hatsaram-pan̈ahy miavaka* naboaka tamindrô jiaby.
34 Tsisy olo sahiran̈a foeky tamindrô, fôtony zay olo nanan̈a tany na tran̈o nandafo zen̈y, ke nitondra vangan’ny raha lafondrô,
35 baka iô raha zen̈y naterindrô tamindrô* apôstôly aby io. Irô amizay nandrasa izio tamin’olo tsiaraikiaraiky arakaraka raha nilaindrô.
36 Ke Josefa, araiky nikahiandrô apôstôly aby io Barnabasy (“Zanakan’ny Fankahirezan̈a” dikan’izio izikoa adika), Levita sady teratany baka a Sipra,
37 nanan̈a tany. Izio nalafony, baka iô volan’izio nindesiny ke nateriny tamindrô* apôstôly aby io.
Lamariky amy Pazy Ambany
^ Na: “mazava tsarabe momba fitsanganan̈a amy maty, karaha raha nandalo tamy Jesosy in̈y.”
^ Abt: “nanjary lohan’ny zôro.”
^ Raha tian̈a havian̈a eto: Irô tsy nianatra tamy lekaoly nampianarandrô Raby aby iô, fa tsy raha oe tsy mahay mamaky teny ndreky manoratra.
^ Na: “Synedriona.”
^ Abt: “famantaran̈a.”
^ Na: “Kristinazy.”
^ Na: “nivavaka mare tamy.”
^ Zahava F.V.
^ Abt: “raha zen̈y napetrakandrô tamy vitindrô.”
^ Abt: “ke napetrany tamy vitindrô.”
