Asan’ny Apostoly 5:1-42
5 Misy lelahy kahian̈a Ananiasy zay ndreky Safira vadiny nandafo tanindrô.
2 Kanefa sasany tamy vangan’ny tany in̈y nitanàny, fa sasany fo nindesiny tamindrô* apôstôly aby io, ary hain’ny vadiny raha zen̈y.
3 Kanefa ho Petera: “Ananiasy, nan̈ino ma Satana nambelanao handrisiky anao hasaky havandy amy fan̈ahy masin̈y ndreky hitana mangingin̈y sasany amy vangan’ny tany in̈y?
4 Tamy tany io mbala tsy nalafo, tsy mbala anao fo ma tômpiny? Aviô izio koa fa lafo, tsy mbala anao fo koa ma mahay raha tianao hampiasan̈a vola nazonao baka tamy zin̈y? Ke nan̈ino fo anao nieritreritry han̈ano raha karaha zen̈y tan̈atin’ny fônao tan̈y? Tsy olo kony navandesanao fa Zan̈ahary ay!”
5 Ananiasy koa fa naharen̈y volan̈a aby zen̈y, tiô fo izy lavo ke naty. Olo jiaby naharen̈y raha nandalo io navozo mare.
6 Ke nitsangana irô manafo lahy aby io, baka iô izy nifon̈ôsindrô tan̈atin’ny lamba, aviô izy nindesindrô ke nalevin̈indrô.
7 Kadiriny telo lera tafaran’izen̈y, navy koa vadiny, fa tsy hainy foeky ino raha nandalo.
8 Ho Petera: “Ho zaho, efa ty ma vangany nandafaosanarô tany in̈y?” Ho izy: “Ia, io jiaby.”
9 Ke ho Petera: “Nan̈ino ma anarô roe fivadiany nan̈ano jery araiky hitsapa jery fan̈ahin’i Jehovah? Vitindrô olo aby nandeha nandevin̈y ramosenao iziô efa am-baravaran̈a ao, ke irô handeha hitondra anao.”
10 Tiô ny iô, izy lavo nan̈oloan̈a vitin’i Petera tiô ke naty. Irô manafo lahy aby in̈y koa fa niditry, izy hitandrô niampatra be tiô ke izy nindesindrô niboaka, aviô nalevin̈indrô tankilan’ny ramosenany tan̈y.
11 Navozo mare fiangonan̈a jiaby ndreky olo jiaby naharen̈y raha aby zen̈y.
12 Maro famantaran̈a ndreky fahagagan̈a nataondrô apôstôly aby io tamy vahoaka, aviô irô jiaby niaraka nivory tamy Lalan̈a Misy Tafony Namboarin’i Solomona.
13 Marin̈y ndraiky fa olo sasany tsy nasaky niaraka tamindrô, fa irô vahoaka aby io fo tsy vôly nikoran̈a raha tsara momba irô.
14 Tsy basin’izen̈y fa nahainisôsoko fo koa olo nino Tômpo, ke maro oe irô, na lelahy zen̈y na man̈angy.
15 Irô olo marary aby io nindesin’olo tamy lalabe ke nampandriandrô tamy fandrian̈a hely na tsihy, amy zen̈y Petera koa fa mandalo in̈y, farafaharatsiny irô mba handalaovan’ny kandindon̈onany.
16 Aviô nisy vahoaka baka amy tanàna man̈odidin̈y Jerosalema tsy vôly navy sady nitondra olo marary ndreky olo nisazaohan’ny fan̈ahy maloto, ke irô jiaby janga.
17 Kanefa mpisôron̈obe ndreky irô olo jiaby niaraka taminany aby io, tsy azôvy zen̈y fa irô an̈isan’ny sektin’ny Sadoseo, be fô irô mare. Ke irô nitsangana,
18 baka iô irô apôstôly aby io nigadraindrô tamy prizom-panjakan̈a.
19 Kanefa tamin’ny alin̈y, nibiafin’ny anjelin’i Jehovah varavaran̈an’ny prizon io, aviô irô nindesiny niboaka, ke ho izy:
20 “Mindao mitsangana amy tempoly ao, baka iô aza vôly mikoran̈a amin’olo volan̈a jiaby momba fiainan̈a zen̈y.”
21 Irô koa fa baka naharen̈y zen̈y, andra mbala vo nipiriaka in̈y, irô niditry tamy tempoly tao aviô irô nanomboko nampianatra.
Lohandohan’ny mpisôron̈o ndreky irô olo niaraka taminany aby io koa fa navy, irô olo jiaby an̈isan’ny Fitsaran̈a An̈abo Jiosy* ndreky anti-pan̈ahy jiaby tamy zanakan’Israely navorindrô. Irô baka iô nan̈iraka olo handeha hangala irô apôstôly aby io tamy prizon tan̈y ke hitondra irô in̈y man̈oloan̈a irô tiô.
22 Kanefa irô mpiambin̈y aby io koa fa navy tan̈y, irô tsy hitandrô tamy prizon tao. Ke lôso irô nimpody nandeha nivolan̈a raha zen̈y,
23 ke ho irô: “Prizon ao hitanay nigadra tsarabe, baka iô irô mpiambin̈y aby io nitsangana tamy varavaran̈a tiô, fa zahay koa fa nan̈abian̈a izio, tsisy olo hitanay tao.”
24 Sefon’ny mpiambin̈y tempoly ndreky irô lohandohan’ny mpisôron̈o aby io koa fa naharen̈y volan̈a aby zen̈y, irô very hevitry nandiniky han̈ano akôry tohin’ny tantara io.
25 Ke nisy olo navy aviô nivolan̈a tamindrô karaha ty: “Hitanarô, lelahy aby nampidirinarô tamy prizon in̈y kony amy tempoly ao, mitsangana ndreky mampianatra olo ay!”
26 Ke lôso sefon’ny mpiambin̈y io ndreky irô olo ambany fahifan̈anany aby io nandeha nangala irô apôstôly aby io tan̈y, fa irô fo tsy kafiry tamindrô fôtony irô navozo tsao vahoaka hitaora-bato irô.
27 Ke irô apôstôly aby io nindesindrô, aviô irô nirahandrô nitsangana nan̈oloan̈a Fitsaran̈a An̈abo Jiosy.* Mpisôron̈obe baka tiô nan̈ontany irô
28 karaha ty: “Zahay ma tsy efa namepetry anarô mare ke tsy nan̈aomba anarô hampianatra amin’ny an̈aran̈a zen̈y? Ke nan̈ino fo basy Jerosalema mbala nifinoanarô fampianaran̈anarô fo? Baka iô nan̈ino anarô man̈amia tsin̈y zahay ke man̈ano zahay tômpin’andraikitry amy nifatesan’ny* lelahy in̈y?”
29 Ke ho Petera ndreky irô apôstôly hafa aby io: “Zan̈ahary fo tsy maintsy arehanay volan̈a fa tsy olo, fôtony izy mpitondra zahay.
30 Jesosy, araiky nivonenarô ndreky nahanton̈onarô tamy pôtô* in̈y, efa natsanganan’ny Zan̈aharin’ny razambentsika tamy maty.
31 Zan̈ahary efa nampanonga izy ke nan̈apetraka izy ankavanan̈anany, aviô nan̈ano izy Mpitariky Farany Maventy ndreky Mpamonjy, amy zen̈y firenenan’Israely afaka hibebaka ke hahazo familan-keloko amy fahotan̈andrô.
32 Tsy zahay fo vavolombelon̈on’ny raha aby zen̈y fa fan̈ahy masin̈y koa, tsy ino izio fa raha namezan’ny Zan̈ahary lan̈iany olo man̈eky izy ho mpitondra ndreky man̈araka volan̈anany.”
33 Irô koa fa naharen̈y zen̈y, irô rômotro mare ke irô tihamono irô apôstôly aby io.
34 Kanefa nisy Fariseo araiky nitsangana nan̈oloan̈a Fitsaran̈a An̈abo Jiosy* io. Gamaliela an̈arany; izio mpampianatra Lalàn̈a najain’olo jiaby. Nirahany naboaka tambelan̈a saraiky irô lelahy aby io.
35 Ke ho izy tamindrô: “Lelahy israelita, anarô mitandrema amy raha iritriretinarô hatao amindrô lelahy aby io.
36 Nisy fotoan̈a ziô, ohatra, nisy lelahy kahian̈a Teodasy zay nitsangana, ke nan̈ano ain̈inany ho raha. Baka iô nisy lelahy kadiriny 400 nan̈araka izy. Fa izy baka tiô nivonen̈a, aviô niparitaka aby olo jiaby nan̈araka izy, ke tsisy hita foeky.
37 Tafaran’i Teodasy, tamin’ny andran’ny fanoratan̈a an̈aran̈a, Jodasy Galilianin̈y nitsangana sady nitaon̈o olo han̈araka izy. Kanefa izy koa mba nivonen’olo, aviô niparitaka aby olo jiaby nan̈araka izy aby in̈y.
38 Fa amy raha mandalo iziôty io, zaho man̈ambara anarô, banjay fo irô lelahy aby io fa aza tabatabain̈a. Fôtony baka, izikoa raha tiandrô hatao io na asandrô io baka amin’olombelon̈o, izio ho ravan̈a.
39 Fa izikoa izio baka amy Zan̈ahary, tsy ho vitanarô handravan̈a izio. Ke anarô mitandrema tsao ndraiky hiady amy Zan̈ahary ay!”
40 Narehandrô torohevitrinany zen̈y, ke nirahandrô nikahian̈a irô apôstôly aby io, baka iô irô nivilezindrô karavasy,* aviô irô nifeperindrô mare ke tsy nimboandrô hivolan̈a amin’ny an̈aran̈an’i Jesosy eky. Irô baka tiô nirahandrô nandeha.
41 Ke irô niala nan̈oloan̈a Fitsaran̈a An̈abo Jiosy* tiô sady ravoravo mare, fôtony irô natao man̈eva alain̈a baràka baka amin’ny an̈aran̈anany.*
42 Isan’andra, na tamy tempoly zen̈y na isaka tran̈o, irô tsy vôly nampianatra ndreky nitory vaovao tsara momba Kristy, tsy azôvy zen̈y fa Jesosy.
Lamariky amy Pazy Ambany
^ Abt: “sasany fo napetrany tamy vitindrô.”
^ Na: “Synedriona.”
^ Na: “Synedriona.”
^ Abt: “amy lion’ny.”
^ Na: “kakazo.”
^ Na: “Synedriona.”
^ Na: “irô nibomàndrô.”
^ Na: “Synedriona.”
^ Na: “an̈aran̈an’i Jesosy.”
