Asan’ny Apostoly 6:1-15
6 Tamin’ny andra aby zen̈y, izikoa fa nahainaro irô mpianatra aby io, irô Jiosy niteny griky aby io nin̈on̈on̈o tamindrô Jiosy niteny hebreo aby io, fôtony irô man̈angy maty vady tamindrô tao tsy navoakarakara tsara, tamy fandrasan̈a hanin̈y isan’andra.
2 Ke irô 12 Lahy nikaiky irô mpianatra jiaby, aviô ho irô: “Tsy pare* izikoa Volan̈an’ny Zan̈ahary ambelanay ke ingianay mandrasa hanin̈y amy latabatra.
3 Ke rahalahy aby, mifidiana lelahy fito manan̈a laza tsara aminarô ao, sady feno fan̈ahy masin̈y ndreky fahendrena, amy zen̈y zahay hanendry irô han̈ano asa tsy maintsy atao zen̈y.
4 Fa zahay ndraiky hifantoko amy vavaka ndreky fanompoan̈a, tsy ino zen̈y fa fampianaran̈a volan̈an’ny Zan̈ahary.”
5 Irô jiaby ravoravo izikoa fa naharen̈y raha nivolan̈indrô zen̈y, ke irô nifidy Stefana, lelahy araiky ten̈a nanan̈a finoan̈a sady feno fan̈ahy masin̈y, aviô Filipo, Prokoro, Nikanora, Timona, Parmena, aviô Nikoleo baka a Antiokia, araiky nan̈araka fivavahan̈a jiosy in̈y.*
6 Nindesindrô tamindrô apôstôly aby io irô, baka iô irô apôstôly aby io koa fa baka nivavaka, irô nametra-tan̈ana tamindrô lelahy voafidy aby io.
7 Ke nahainiparitaka fo volan̈an’ny Zan̈ahary, aviô nahainaro fo kôntindrô mpianatra aby io ta Jerosalema tao. Naro mare koa mpisôron̈o nanjary nan̈eky finoan̈a.
8 Stefana ten̈a nahazo sitraka tamy Zan̈ahary; izy namezan’ny Zan̈ahary angôvo maventy, ke izy nahavita fahagagan̈a ndreky famantaran̈a maro maventy tamy vahoaka.
9 Nisy lelahy sasany baka tamy Synagogan’olo aby Nahazo Fahafahan̈a aby io, niaraka tamy Kyrenianin̈y ndreky Aleksandrianin̈y sasany, aviô nisy koa baka ta Kilikia ndreky Azia, navy hiady hevitry tamy Stefana.
10 Fa irô tsy natohitry izy, fôtony hita baka tamy volan̈anany fa izy nanan̈a fahendrena aviô fan̈ahy masin̈y nan̈ampy izy.
11 Ke irô nandresy lahatra olo tamy mangingin̈y tan̈y hivolan̈a karaha ty: “Zahay naharen̈y izy tsy nan̈isy fôtiny Mosesy ndreky Zan̈ahary.”
12 Nataondrô raha nampialamboetry vahoaka ndreky irô anti-pan̈ahy aby io aviô irô mpanoratra lalàn̈a aby io, ke tiô fo irô nitsetaka tamy Stefana tiô. Nisambôrindrô forse izy, baka iô izy nindesindrô tamy Fitsaran̈a An̈abo Jiosy* tan̈y.
13 Irô nitondra vavolombelon̈o mavandy hivolan̈a karaha ty: “Lelahy io tsy vôly mankaratsy toeran̈a masin̈y ty ndreky Lalàn̈a.
14 Ohatra ziô, ren̈inay izy nivolan̈a fa i Jesosy baka a Nazareta in̈y zen̈y handeha handrongana toeran̈a ty ndreky han̈aova fomba aby nampitain’i Mosesy tamintsika.”
15 Olo jiaby nipetraka tamy Fitsaran̈a An̈abo Jiosy* io nizaha izy mare, ke hitandrô saoranany karaha saoran’ny anjely.
