Asan’ny Apostoly 7:1-60
7 Kanefa ho mpisôron̈obe: “Marin̈y ma raha aby zen̈y?”
2 Ho Stefana: “Rahalahy ndreky raimandreny aby, tandrin̈esanarô zaho. Tamin’i Abrahama dadilahibentsika ta Mezopotamia, talohan’izy nipetraka ta Harana, Zan̈aharin’ny voninahitry niboaka taminany.
3 Ke ho izy taminany: ‘Ialà taninao ndreky ry havanao, aviô mindao amy tany handeha haboakako anao.’
4 Ke izy niala tamy tanin’ny Kaldeanin̈y, baka iô izy nandeha nipetraka ta Harana. Tafaran’ny nifatesan’ny babany, Zan̈ahary nan̈iraka izy hifindra amy tany ipitrahanarô ziôty io.
5 Kanefa tamy fotoan̈a zen̈y, Zan̈ahary tsy nan̈amia izy lova tamy tany io, natà môrsô hely karaha habezan’ny felam-bitinany. Fa Izy nampan̈anten̈a fa tany io handeha hamezany izy ndreky taranakanany, ndray izy tamy zen̈y mbala tsendriky nanan-janaka.
6 Aviô koa Zan̈ahary nivolan̈a taminany fa taranakanany hanjary vahiny amy tany tsy nindrô, ke irô olo aby an̈y han̈andevo irô ndreky hampijaly* irô an̈atin’ny 400 taon̈o.
7 ‘Zaho hitsara firenena han̈andevo irô’, ho Zan̈ahary, ‘aviô afaran’ny raha aby zen̈y, irô hiala an̈y ke han̈ano fanompoan̈a masin̈y ninaka amy toeran̈a ty.’
8 “Izy baka tiô namezany fifan̈ikian̈a momba famosiran̈a. Aviô Abrahama niteraka Isàka, baka iô izy nivosiriny tamin’ny andra fahavalo. Isàka niteraka* Jakoba, baka iô Jakoba niteraka irô lohan’ny fianakavian̈a 12 lahy.
9 Be fô Josefa irô lohan’ny fianakavian̈a aby io, ke izy nalafondrô aviô nindesin̈y ta Ezipty. Kanefa Zan̈ahary niaraka taminany,*
10 ndreky nan̈avotro izy tamy raha sarotro jiaby nandalaovany, baka iô izy namezany fahendrena, aviô nataony raha nazahoany sitraka tamy Faraon mpanjakan’Ezipty. Ke mpanjaka io nanendry izy hiandraikitry Ezipty ndreky raha jiaby tan-tran̈onany tao.
11 Kanefa nisy mosary nan̈eran̈a Ezipty jiaby ndreky Kanana. Ia, naresaka mare jaly, ke irô dadilahibentsika aby io tsy nahita raha hoanin̈y foeky.
12 Fa Jakoba koa fa naharen̈y fa nisy hanin̈y* ta Ezipty, izy nan̈iraka irô dadilahibentsika aby io nandeha tan̈y tamy voanalohany.
13 Tamy fan̈indroeny irô nandeha tan̈y, nambaran’i Josefa tamindrô rahalahiny aby io azôvy izy; ke nanjary hain’i Faraon lafamìn’i Josefa.
14 Ke Josefa nan̈iraka olo hangala Jakoba babany ndreky ry havany jiaby tan̈y; 75 irô jiaby.
15 Ke lôso Jakoba nandeha nijotso ta Ezipty; tan̈y izy naty, aviô tan̈y koa irô dadilahibentsika aby io naty.
16 Irô nindesin̈y ta Sekema, baka iô irô nalevin̈y tan̈atin’ny fasana nivangain’i Abrahama vola sekely volafotsy tamindrô zanakalahin’i Hamora aby io ta Sekema tan̈y.
17 “Izikoa fa nahainarikitry fotoan̈a hampatanteraka fampan̈antinan̈a nataon’ny Zan̈ahary tamin’i Abrahama in̈y, nitombo ndreky nahainaro irô Israelita aby io ta Ezipty tan̈y.
18 Baka iô nisy mpanjaka hafa nanomboko nitondra ta Ezipty. Izio tsy nahay Josefa.
19 Izy nampiasa hafitsian̈a hamangoan̈a irô dadilahibentsika aby io, ke irô niforseny han̈ary zanakandrô vo teraka, amy zen̈y irô io tsy ho velon̈o.
20 Tamy zen̈y Mosesy teraka. Zay tsaiky nampatsaratsara ay!* Tan̈atin’ny telo fanjava izy nikarakarain̈a* tan-tran̈on’ny babany.
21 Fa izy koa fa narian̈a, izy nalain’ny zanakavavin’i Faraon aviô nitarimìny karaha zanany naterany.
22 Ke Mosesy nampianarin̈y fahendrena jiaby ta Ezipty tan̈y. Tsy tamy raha nivolan̈iny fo izy niavaka fa firaka tamy raha nataony koa.*
23 “Izy koa fa feno 40 taon̈o, izy nanapa-kevitry* handeha hamangy irô* rahalahiny aby io, tsy azôvy zen̈y fa irô zanakan’Israely aby io.
24 Izy koa fa nahita araiky tamindrô io nampijalian̈a tsy amy rariny, izio naraovany; namaly faty izy ke nivoneny Ezipsianin̈y in̈y.
25 Izy baka nieritreritry fa takatran’ny jerindrô rahalahiny aby io fa izy handeha hampiasain’ny Zan̈ahary hamonjy irô, kanefa tsy takatran’ny jerindrô raha zen̈y.
26 Amarain’izin̈y, izy nimpody nandeha tamindrô tan̈y, ke izy nahita olo aroe lahy niady. Izy nan̈aohatra hampihavan̈a irô, ke ho izy: ‘E anarô, anarô kony mpirahalahy ay! Ke nan̈ino fo anarô miady?’
27 Kanefa araiky nampijaly namany in̈y nan̈aposy izy sady nivolan̈a karaha ty: ‘Azôvy ma nanendry anao ho mpitondra ndreky mpitsara zahay?
28 Anao ma tihamono zaho karaha nataonao namono Ezipsianin̈y nomoaly in̈y?’
29 Izikoa fa ren̈in’i Mosesy raha zen̈y, izy nandeha nilefa ta Midianin̈y. Tan̈y izy nipetraka ke niteraka zanany aroe lahy.
30 “Afaka 40 taon̈o, nisy anjely niboaka taminany tamy tany paiky tamy Bongo Sinay tan̈y, tan̈atin’ny lèlan’ny môtro tamy raha maniry feno fatsiky nirehitry zay.
31 Fa izy koa fa nan̈aton̈o baka hizaha izio marikidrikitry, izy naharen̈y feon’i Jehovah nivolan̈a karaha ty:
32 ‘Zaho Zan̈aharin’ny razambenao, Zan̈aharin’i Abrahama ndreky Isàka aviô Jakoba.’ Ke Mosesy nangôrohôro baka iô izy efa tsy nasaky nan̈aton̈o eky.
33 Ho Jehovah taminany: ‘Adosoa savaty amy vitinao, fôtony tany masin̈y tany itsangananao io.
34 Efa hitako tsarabe fampijalian̈a mahazo vahoakanaka an’Ezipty, aviô efa ren̈iko tretrendrô, ke zaho nijotso han̈avotro irô. Ke karaha ty: Anao hirahako handeha a Ezipty an̈y.’
35 Io i Mosesy araiky tsy nikendrô tamin’irô nivolan̈a: ‘Azôvy ma nanendry anao ho mpitondra ndreky mpitsara zahay?’ in̈y. Kanefa izy tsarabe nirahin’ny Zan̈ahary ho mpitondra ndreky mpan̈avotro, tamy Zan̈ahary nan̈iraka anjely hiboaka taminany tamy raha maniry feno fatsiky in̈y tao.
36 Lelahy zen̈y nitondra irô niala baka ta Ezipty, sady nan̈ano fahagagan̈a ndreky famantaran̈a maro tan̈y, ndreky tamy Ranomasin̈y Mena, aviô tamy tany paiky tan̈y tan̈atin’ny 40 taon̈o.
37 “Io koa i Mosesy araiky nivolan̈a tamindrô zanakan’Israely aby io karaha ty: ‘Zan̈ahary hanendry mpaminan̈y ninarô, mpaminan̈y karaha zaho, baka amy rahalahinarô.’
38 Izy araiky niaraka tamy fiangonan̈a tamy tany paiky tan̈y in̈y; tan̈y izy niaraka tamin’ny anjely nikoran̈a taminany tamy Bongo Sinay in̈y, ndreky niaraka tamindrô dadilahibentsika aby io. Izy nahazo volan̈a masin̈y sady velon̈o hamezan̈a atsika.
39 Kanefa irô dadilahibentsika aby io tsy nan̈eky han̈araka volan̈anany, ke izy nahifikindrô, aviô irô nan̈iry tihimpody ta Ezipty tan̈atin’ny fôndrô tan̈y,
40 ke ho irô tamin’i Arona: ‘Atsika han̈amboara zan̈ahary hitariky atsika, fôtony tsy hay foeky ino raha navoa Mosesy araiky nitondra atsika niala ta Ezipty in̈y.’
41 Tamin’ny andra aby zen̈y, irô nan̈amboatra zanaka aomby, aviô irô nan̈ano sôron̈o tamy sampy io salakady ravoravo nankalaza asan’ny tan̈anandrô.
42 Ke irô nialan’ny Zan̈ahary, baka iô irô nambelany han̈ano sôron̈o masin̈y tamy tafikin’ny lan̈itry, eraka raha voasoratra amy bokindrô Mpaminan̈y aby io ty: ‘A taranakan’Israely, zaho ma nan̈anaovanarô fan̈atitry ndreky sôron̈o tan̈atin’ny 40 taon̈o tamy tany paiky tan̈y in̈y?
43 Tsy taminaka aby, fa tamy tran̈olain’i Moloka ndreky tamy lakintan̈an’ny zan̈ahary Refana nindesinarô in̈y, tsy ino irô io fa sarivongana namboarinarô salakady ivavahanarô. Ke anarô halefako sesitany lavidavitrin’i Babylony.’
44 “Irô dadilahibentsika tamy tany paiky tan̈y in̈y nanan̈a tran̈olain’ny vavolombelon̈o. Zan̈ahary nan̈iraka Mosesy nan̈ano izio, eraka modely naboakany izy.
45 Ke izio nilovaindrô dadilahibentsika aby io, baka iô nindesindrô niditry tamy tanindrô firenena niroasin’ny Zan̈ahary aby io. Irô tamy zin̈y niaraka tamy Josoa. Nidôko tao fo izio firaka tamin’ny andran’i Davida.
46 Izy nahazo rady tamy Zan̈ahary, aviô izy nangataka hamezan̈a voninahitry han̈amboatra tran̈on’ny Zan̈aharin’i Jakoba.
47 Fa tsy izy niasa izio fa Solomona.
48 Kanefa araiky Farany An̈abo tsy mipetraka amy tran̈o niasain’ny tan̈ana, eraka raha nivolan̈in’ny mpaminan̈y ty:
49 ‘Lan̈itry sezy fiandrianan̈anaka, aviô tany raha fasiako vitinaka. Ke tran̈o karakôry ma handeha hamboarinarô ninaka?, ho Jehovah. Na, aia tany handeha hangalako kajo?
50 Tsy tan̈ananaka ma nan̈amboatra raha jiaby io?’
51 “Anarô olo misy mokon-doha, sady tsy avoavositry fô ndreky sofin̈y. Anarô tsy mety vôly manohitry fan̈ahy masin̈y. Karaha raha nataondrô dadilahibenarô aby io fo raha ataonarô.
52 Mba azôvy tamindrô mpaminan̈y aby io ma tsy ninjehin’ny dadilahibenarô? Ia, nivonendrô aby zay olo nan̈ambara tsialohaloha momba favian’olo marin̈y io. Fa anarô ndraiky ziôty ny namadiky ndreky namono izy,
53 kanefa anarô edy namezan’ny Zan̈ahary Lalàn̈a tamin’izy nampiasa anjely han̈ambara izio taminarô, fa tsy narehanarô fo.”
54 Irô koa fa naharen̈y zen̈y, irô neloko mare taminany ke irô tihikasi-tan̈ana izy.*
55 Kanefa Stefana feno fan̈ahy masin̈y, ke izy koa fa nizaha lan̈itry elaela, izy nahita voninahitrin’ny Zan̈ahary ndreky Jesosy nitsangana tankavanan̈an’ny Zan̈ahary tiô,
56 ke ho izy: “Indriô hitako lan̈itry mibian̈a, aviô Zanak’olo mitsangana ankavanan̈an’ny Zan̈ahary.”
57 Ke irô niafatrafatra angôvo jiaby sady irô nanampin-tsofin̈y, aviô irô niaraka gorodobe nandeha taminany tiô.
58 Irô koa fa baka nan̈atsipy izy tambelan̈an’ny tanàna tan̈y, izy nitorahandrô vato. Irô vavolombelon̈o nan̈ampanga izy aby io nan̈apetraka lambandrô ambelan̈a tamy vitin’ny manafo lahy araiky kahian̈a Saoly.
59 Tamin’irô nitaora-bato Stefana in̈y, Stefana niangavy karaha ty: “Jesosy Tômpo ô, raisa fahin̈ananaka.”*
60 Ke izy nandohaliky baka iô izy nandronton̈o mare karaha ty: “A Jehovah e, aza konten̈a ho fahotan̈andrô raha ty.” Izy koa fa baka nivolan̈a raha zen̈y, izy naty.*
Lamariky amy Pazy Ambany
^ Na: “hampiôry.”
^ Na mety ho: “nan̈ano karaha zen̈y tamy.”
^ Na: “nan̈ampy izy.”
^ Na: “varimbazaha.”
^ Na: “Izy nampatsaratsara tamason’ny Zan̈ahary.”
^ Na: “nitarimin̈a.”
^ Na: “Izy nanan̈a angôvo tamy raha nivolan̈iny ndreky raha nataony.”
^ Na: “nitsiry tan̈atin’ny fônany tao fan̈irian̈a.”
^ Na: “handeha hizaha akôry nanindrô.”
^ Abt: “irô nampan̈ena nifindrô taminany.”
^ Abt: “fan̈ahinaka.”
^ Abt: “nandry tan̈atin’ny fahafatesan̈a.”
