Asan’ny Apostoly 9:1-43
9 Kanefa Saoly efa tapa-kevitry hampijaly irô mpianatran’ny Tômpo aby io ndreky hamono irô. Ke izy nandeha tamy mpisôron̈obe tan̈y,
2 aviô izy nangataka taratasy taminany handeha haboaka olo tamy synagoga a Damaskosy, amy zen̈y izy afaka hamehy ndreky hitondra zay olo an̈isan’ny Lalan̈a* io handeha a Jerosalema an̈y, na lelahy zen̈y na man̈angy.
3 Tamin’izy tan-dalan̈a, efa narikitry Damaskosy in̈y, tiô fo nisy hazavan̈a baka tan-dan̈itry nan̈azava nan̈odidin̈y izy,
4 ke izy lavo tamy tany, aviô izy naharen̈y feo nivolan̈a taminany karaha ty: “Saoly, Saoly, nan̈ino ma anao man̈enjiky zaho?”
5 Ke izy nan̈ontany: “Azôvy ma anao, tômpoko anao?” Ho izy: “Zaho Jesosy, araiky injehinao.
6 Fa anao mitsangàna baka iô midira an-tanàna ao, fa hambara anao raha tôkony hataonao.”
7 Irô lelahy dia araiky taminany aby io nitsangana be tiô fa tsy tafivolan̈a. Ren̈indrô ndraiky feo in̈y fa irô fo tsy nahita olo.
8 Ke Saoly niarin̈y baka tamy tany tiô. Kanefa ndray masonany nibelaka, izy tsisy raha hitany foeky. Ke izy nitantan̈indrô baka iô nindesindrô niditry ta Damaskosy.
9 Tan̈atin’ny telo andra izy tsisy raha hitany foeky, aviô izy tsy nihinan̈a na nigiaka.
10 Ta Damaskosy tao nisy mpianatra araiky kahian̈a Ananiasy. Ke karaha ty ho Tômpo taminany tan̈atin’ny fahitan̈a: “Ananiasy!” Ho izy: “Indriô zaho, Tômpo!”
11 Ho Tômpo taminany: “Mitsangàna, ke mindao amy lalan̈a kahian̈a Mahitsy. Mindao amy tran̈on’i Jodasy, aviô an̈ontania aia Saoly, lelahy baka a Tarsosy. An̈atiny mbala mivavaka izy iziô.
12 Tan̈atin’ny fahitan̈a izy nahita lelahy kahian̈a Ananiasy nan̈aton̈o izy ndreky nametra-tan̈ana taminany baka izy mimpody mahita.”
13 Kanefa ho Ananiasy: “Tômpo, maro olo ren̈iko nikoran̈a raha momba lelahy zen̈y, ndreky momba raha ratsy nataony tamindrô olonao masin̈y ta Jerosalema tan̈y.
14 Aviô izy ziô efa nahazo fahifan̈a baka tamindrô lohandohan’ny mpisôron̈o aby io hanambotro* olo jiaby mikaiky an̈aran̈anao.”
15 Kanefa ho Tômpo taminany: “Mindao, fa lelahy zen̈y efa fitaovan̈a nifidiko hitondra an̈aran̈anaka amin’ny hafa firenena ndreky amy mpanjaka baka iô amy zanakan’Israely.
16 Fa haboakako izy tsarabe raha maro tsy maintsy hiaretany baka amin’ny an̈aran̈anaka.”
17 Ke Ananiasy lôso, baka iô izy niditry tamy tran̈o nidokoan’i Saoly, aviô izy nametra-tan̈ana taminany ke ho izy: “Saoly, rahalahiko, Jesosy Tômpo araiky niboaka taminao tamin’ny anao tan-dalan̈a han̈atỳ in̈y nandefa zaho amy zen̈y anao himpody hahita ndraiky baka iô ho feno fan̈ahy masin̈y.”
18 Tiô ny iô, nisy raha karaha hisikisikin’ny laoko in̈y latsaka baka tamy masonany, ke izy nimpody nahita ndraiky. Izy baka tiô nitsangana aviô natao batisa.
19 Izy amizay nihinan-kanin̈y ke nahazo angôvo.
Izy nidôko andra vitsivitsy niaraka tamindrô mpianatra ta Damaskosy tan̈y,
20 baka iô tsy nirekireky izy nandeha tamindrô synagoga aby io, ke nitory momba Jesosy. Nivolan̈a izy fa Jesosy io Zanakan’ny Zan̈ahary.
21 Kanefa lany fan̈ahy olo jiaby naharen̈y izy, ke ho irô: “Tsy io ma lelahy nan̈enjiky mare lan̈iany olo nikaiky an̈aran̈a zen̈y ta Jerosalema tan̈y? Aviô tsy handeha hanambotro irô ndreky hanolotro irô* amindrô lohandohan’ny mpisôron̈o aby io ma diany atỳ?”
22 Kanefa Saoly nahainahazo angôvo fo, ke very hevitry irô Jiosy nipetraka ta Damaskosy tao, izy koa fa nan̈amia porofo mazava tsarabe fa Jesosy io Kristy.
23 Izikoa fa nandeha andra maromaro, irô Jiosy aby io niaraka nitady hevitry hamonoan̈a izy.
24 Kanefa nanjary hain’i Saoly tetikindrô zen̈y. Niambesandrô tsarabe koa barôn’ny tanàna io matsan̈a alin̈y, misy hahavitandrô hamono izy.
25 Ke tamin’ny alin̈y, izy nalaindrô mpianatranany aby io, baka iô izy nataondrô tan̈atin’ny antômby maventy ke najotsondrô baka tamy lafenaitra tamy riban’ny tanàna io.
26 Niaraka izy navy ta Jerosalema, izy nifen̈y hifandray tamindrô mpianatra aby io. Kanefa irô jiaby navozo izy, fôtony irô tsy nino fa izy efa nanjary mpianatra.
27 Ke Barnabasy nan̈ampy izy ndreky nitondra izy tamindrô apôstôly aby io. Nitantarainy tamindrô tamin’ny an-tsipiriany akôry fomba nahitan’i Saoly i Tômpo tan-dalan̈a ndreky nikoran̈an’ny Tômpo taminany, aviô akôry nataon’i Saoly tsy navozovozo foeky nitory momba an̈aran̈an’i Jesosy ta Damaskosy tan̈y.
28 Ke Saoly nidôko niaraka tamindrô, baka iô izy nafaka nandeha tamy zay tany tiany nimboan̈a* ta Jerosalema, aviô izy tsy navozovozo foeky* nitory tamin’ny an̈aran̈an’ny Tômpo.
29 Ke izy nikoran̈a ndreky niady hevitry tamindrô Jiosy miteny griky aby io, fa irô ndraiky nitady hamono izy.
30 Izikoa fa haindrô rahalahy aby io raha zen̈y, izy nindesindrô nijotso ta Kaisaria baka iô izy nalefandrô ta Tarsosy.
31 Ke nilamin̈y aby fiangonan̈a jiaby nan̈eran̈a Jodia ndreky Galilia baka iô Samaria fôtony tsisy fan̈injehan̈a. Nahainatanjaka koa irô fiangonan̈a aby io. Aviô nahainaro koa irô mpianatra aby io fôtony fiangonan̈a aby io navozo Jehovah ndreky nankahirezin’ny fan̈ahy masin̈y.
32 Tamy Petera nitety faritry jiaby io in̈y, izy koa nandeha nijotso* tamindrô olo masin̈y nipetraka ta Lyda tan̈y.
33 Tao izy nahita lelahy araiky kahian̈a Enea. Nandry tan̈abon’ny fandrian̈a fo izio tan̈atin’ny valo taon̈o fôtony izy nalemy.
34 Ho Petera taminany: “Enea, Jesosy Kristy mampajanga anao. Mitsangàna baka iô amboara fandrian̈anao.”
35 Ke olo jiaby nipetraka ta Lyda ndreky tamy Lemakan’i Sarôna koa fa nahita izy, irô nanjary nino* Tômpo.
36 Ta Jopa tao nisy mpianatra araiky nanan̈a an̈aran̈a Tabita. “Dorkasy”* dikan’izio izikoa adika. Maro asa soa nataony aviô koa maro raha namezany olo masikiny.
37 Kanefa tamin’ny andra aby zen̈y izy narary baka iô naty. Ke fatinany nampisehandrô, aviô izio napetrakandrô tamin’ny efitry araiky an̈abo etazy.
38 Lyda io tsy lavitry Jopa. Ke izikoa fa ren̈indrô mpianatra aby io fa Petera tamy tanàna io tao, irô nan̈iraka aroe lahy handeha aminany an̈y ke hiangavy izy karaha ty: “Mafadiana kony e, mavia aminay atỳ malaky anao!”
39 Ke Petera nitsangana baka iô izy niaraka tamindrô. Izy koa fa navy tan̈y, izy nindesindrô tamin’ny efitry tan̈abo etazy in̈y. Nan̈aton̈o izy aby man̈angy maty vady jiaby salakady nitomoan̈y aviô nan̈aboaka lamba maro ndreky rôbo* nizahirin’i Dorkasy nindrô tamin’izy mbala velon̈o.
40 Nirahin’i Petera niboaka aby olo jiaby, aviô izy nandohaliky ke nivavaka. Izy baka tiô nitodiky tamy faty io, aviô ho izy: “A Tabita, mitsangàna!” Nibiafin’i Tabita masonany; izy baka iô koa fa nahita Petera, izy nipetraka.
41 Natôndron’i Petera taminany tan̈anany, aviô izy nampitsanganiny. Izy baka tiô nikaiky irô olo masin̈y ndreky man̈angy maty vady aby io, aviô naboakany irô fa velon̈o Tabita.
42 Raha zen̈y nanjary hain’olo jiaby nan̈eran̈a Jopa, ke naro olo nanjary nino Tômpo.
43 Petera nidôko andra vitsivitsy ta Jopa, tamy Simona, lelahy mpan̈amboatra raha baka amin’ny angôzy.
Lamariky amy Pazy Ambany
^ Abt: “hamehy.”
^ Na: “hanolotro irô mifehy.”
^ Abt: “izy nidi-niboaka.”
^ Na: “izy nasaky.”
^ Na: “nandalo.”
^ Abt: “irô nitodiky tamy.”
^ Dorkasy io an̈aran̈a griky aviô Tabita io an̈aran̈a aramianin̈y. Mitovy fo dikan’ny an̈aran̈a aby io: “Gazely.”
^ Na: “lamba ambelan̈a.”
