Vaovao Tsara Nisoratin’i Jaona 1:1-51
1 Tamy voanalohany tan̈y Volan̈a.* Volan̈a niaraka tamy Zan̈ahary, baka iô Volan̈a io zan̈ahary.*
2 Tamy voanalohany tan̈y izy efa niaraka tamy Zan̈ahary.
3 Izy nampiasain̈a hampisy raha jiaby, aviô tsy ho nisy foeky na raha araiky izikoa tsy baka taminany.
Ke raha nisy
4 baka taminany io fiainan̈a, baka iô fiainan̈a io hazavan̈a nin’olombelon̈o.
5 Hazavan̈a io mangilangilatra an̈atin’ny hiziky, kanefa hiziky io tsy maharesy izy.
6 Misy lelahy araiky nirahin̈y ho solonten̈an’ny Zan̈ahary; Jaona an̈aran̈anany.
7 Ke lelahy io navy han̈ambara amin’olo momba hazavan̈a io, amy zen̈y baka aminany hahavy karazan̈an’olo jiaby hino.
8 Tsy izy hazavan̈a io, fa izy raha zisty nirahin̈y han̈ambara amin’olo momba hazavan̈a io fo.
9 Araiky ten̈a hazavan̈a man̈azava karazan̈an’olo jiaby efa ho avy amy donia ty.
10 Tamy donia ty izy, aviô izy nampiasain̈a hampisy donia ty. Kanefa donia ty tsy nahay izy.
11 Izy navy tamy tany faviany, kanefa olo tao tsy nandray izy.
12 Fa ndray zen̈y, lan̈iany olo nandray izy namezany lalan̈a hanjary zanakan’ny Zan̈ahary, fôtony naboakandrô fa irô nino an̈aran̈anany.
13 Ke irô teraka, tsy baka tamy lio na baka tamy sitrapôn’ny nôfotro na baka tamy sitrapôn’olombelon̈o, fa baka tamy Zan̈ahary.
14 Ke Volan̈a nanjary nôfotro baka iô izy niaraka nipetraka taminay. Hitanay voninahitrinazy, voninahitry karaha nin’ny zanaka lahitaokan̈an’ny baba; izy nahazo sitraka tamy Zan̈ahary fo* aviô izy nampianatra fahamarin̈ana.
15 (Jaona vavolombelon̈o nan̈ambara momba izy, ia, izy nandronton̈o karaha ty: “Momba izy raha nivolan̈iko karaha ty in̈y: ‘Araiky ho avy afaranaka handeha alohanaka, fôtony izy efa nisy talohanaka.’”)
16 Izy feno hatsaram-pan̈ahy miavaka,* ke nan̈aboahan̈a hatsaram-pan̈ahy miavaka fo koa atsika.
17 Baka tamy Mosesy nan̈amezan̈a Lalàn̈a, fa baka tamy Jesosy Kristy ndraiky nan̈aboahan̈a hatsaram-pan̈ahy miavaka ndreky fahamarin̈ana.
18 Mbala tsiary nisy olo nahita Zan̈ahary; fa araiky kaihany zan̈ahary nateraka, araiky mipetraka ankilan’ny Baba,* nan̈azava momba Izy.
19 Ty raha nambaran’i Jaona, irô Jiosy aby io koa fa nan̈iraka mpisôron̈o ndreky Levita baka ta Jerosalema han̈ontany izy karaha ty: “Azôvy ma anao?”
20 Tsy nisalasala foeky izy nivolan̈a:* “Zaho tsy Kristy.”
21 Ke irô nan̈ontany izy: “Azôvy fo basy? Anao Elia?” Izy namaly: “Zaho tsy izy.” “Sa anao Mpaminan̈y araiky ho avy?” Ho izy: “Ehe!”
22 Ke ho irô taminany: “Azôvy fo basy anao? Ambarà zahay misy hahaizanay raha volan̈iny amindrô olo nan̈iraka zahay aby io. Volàn̈a aminay raha momba anao.”
23 Ho izy: “Zaho feon’olo mandronton̈o baka amy tany paiky an̈y: ‘Ataova mahitsy lalan̈an’i Jehovah’, eraka raha nivolan̈in’ny mpaminan̈y Isaia.”
24 Irô io irakandrô Fariseo aby io.
25 Ke irô nan̈ontany izy karaha ty: “Nan̈ino basy anao man̈ano batisa izikoa anao sady tsy Kristy, tsy Elia, aviô tsy Mpaminan̈y in̈y?”
26 Ho Jaona tamindrô: “Zaho man̈ano batisa anarô amy rano. Fa aminarô iô ndraiky misy olo araiky tsy hainarô;
27 izy araiky ho avy afaranaka. Zaho tsy man̈eva hamaha tadin’ny savatinany foeky!”
28 Raha aby zen̈y niboaka ta Betania, tandaforehin’ny Ten̈aranon’i Jordany, tamy tany nan̈anaovan’i Jaona batisa.
29 Amarain’izin̈y, izy nahita Jesosy navy han̈aton̈o izy, ke ho izy: “Indriô Zanaka Ôndrikôndrikin’ny Zan̈ahary, araiky man̈adoso fahotan̈an’ny donia ty!
30 Momba izy raha nivolan̈iko karaha ty in̈y: ‘Misy olo ho avy afaranaka kanefa izy lôso alohanaka, fôtony izy efa nisy talohanaka.’
31 Ndray zaho koa mba tsy nahay izy, fa zaho man̈ano batisa amy rano misy hahaizan’Israely izy.”
32 Jaona koa vavolombelon̈o nan̈ambara: “Hitako fan̈ahy masin̈y karaha pizon in̈y nijotso baka tan-dan̈itry, aviô izio nidôko tan̈abonany.
33 Ndray zaho koa mba tsy nahay izy, fa Araiky nan̈iraka zaho han̈ano batisa amy rano nivolan̈a taminaka: ‘Lan̈iany olo hitanao hijotsoan’ny fan̈ahy masin̈y ke hidokoan’izio, izy araiky man̈ano batisa amy fan̈ahy masin̈y.’
34 Zaho nahita raha zen̈y, ke zaho masaky mivolan̈a* fa izy Zanakan’ny Zan̈ahary.”
35 Amarain’izin̈y koa, Jaona nitsangana niaraka tamy mpianatranany aroe lahy.
36 Izy nahita Jesosy nandalo, ke ho izy: “Indriô Zanaka Ôndrikôndrikin’ny Zan̈ahary!”
37 Irô mpianatra aroe lahy io koa fa naharen̈y izy nivolan̈a zen̈y, irô nan̈araka Jesosy.
38 Ke Jesosy nitodiky; izy koa fa nahita irô nan̈araka izy, ho izy tamindrô: “Ino ma raha tadiavinarô?” Ho irô taminany: “Raby (“Mpampianatra” dikan’izio izikoa adika), aia ma anao mipetraka?”
39 Ho izy tamindrô: “Mavia, fa ho hitanarô edy.” Ke irô nandeha, aviô hitandrô tany pitrahany. Irô nidôko niaraka taminany tamin’ny andra in̈y. Kadiriny katrera folakandra* tamy zen̈y.
40 Andrea araiky tamindrô roe lahy naharen̈y raha nivolan̈in’i Jaona ke nan̈araka Jesosy in̈y. Izio rahalahin’i Simona Petera.
41 Izy antsendriky nandeha tamy Simona rahalahiny tan̈y, baka iô ho izy taminany: “Hitanay Mesia” (“Kristy” dikan’izio izikoa adika).
42 Aviô izy nindesiny tamy Jesosy tan̈y. Jesosy koa fa nahita izy, ho izy: “Anao Simona, zanakan’i Jaona. Manomboko iziô, Kefasy ikahian̈a anao” (“Petera” dikan’izio izikoa adika).
43 Amarain’izin̈y, Jesosy tihandeha a Galilia. Izy nahita Filipo, ke ho izy: “Alô han̈araka zaho.”
44 Filipo io olo baka a Betsaïda, tanàna favian’i Andrea ndreky Petera.
45 Filipo nandeha tamy Natanaela tan̈y, ke ho izy taminany: “Hitanay araiky nikoran̈in’i Mosesy amy Lalàn̈a ao ndreky nisoratindrô Mpaminan̈y aby io in̈y. Izio Jesosy zanakan’i Josefa, baka a Nazareta.”
46 Fa ho Natanaela taminany: “Mba misy raha tsara ma baka a Nazareta?” Ke ho Filipo taminany: “Mavia baka zahava.”
47 Jesosy nahita Natanaela nan̈aton̈o izy, ke ho izy taminany: “Zay Israelita ankitin̈y, sady olo tsisy fitaka foeky!”
48 Ho Natanaela taminany: “Karakôry ma nahaizanao zaho?” Ho Jesosy taminany: “Talohan’i Filipo nikaiky anao, tamin’ny anao nipetraka tambanin’ny kakazo aviavy in̈y, anao hitako.”
49 Ho Natanaela: “Raby, anao Zanakan’ny Zan̈ahary, anao Mpanjakan’Israely.”
50 Ho Jesosy taminany: “Anao ma mino fôtony zaho nivolan̈a taminao fa anao hitako tambanin’ny kakazo aviavy in̈y? Anao mbala hahita raha beben’izen̈y.”
51 Baka iô koa ho izy: “Ankitikitin̈y, ambarako anarô marin̈y tsarabe fa, anarô hahita lan̈itry mibian̈a ndreky irô anjelin’ny Zan̈ahary aby io manonga mijotso mandeha amy Zanak’olo atỳ.”
Lamariky amy Pazy Ambany
^ Eto, “Volan̈a” io manôndro Jesosy, araiky farany be amy mpitondra volan̈an’ny Zan̈ahary.
^ Na: “mitovy amy Zan̈ahary.”
^ Abt: “izy feno hatsaram-pan̈ahy miavaka.”
^ Na: “amy tratran’ny Baba”, dikan’izio: Ten̈a ankasitrahin̈y sady mifandray marikitry aminany.
^ Na: “Izy nivolan̈a ny marin̈y fa tsy nifamatra, ho izy:”
^ Na: “man̈amarin̈y; mitsangana vavolombelon̈o man̈ambara.”
^ Abt: “Kadiriny tamy lera fahafolo.”
