Vaovao Tsara Nisoratin’i Jaona 10:1-42
10 Ho Jesosy: “Ankitikitin̈y, ambarako anarô marin̈y tsarabe fa, lan̈iany olo tsy miditry baka amy varavaran̈an’ny varion’ny ôndrikôndriky fa man̈aniky baka an-tany hafa, izy mpangalatra ndreky mpandrava.*
2 Fa zay olo miditry baka amy varavaran̈a ndraiky tsiman̈ajan’ny ôndrikôndriky.
3 Biafin’ny mpiambin̈y varavaran̈a izy, aviô irô ôndrikôndriky aby io mitandren̈y feonany. Irô ôndrikôndrikinany aby io kahiany amin’ny an̈aran̈andrô, baka iô irô indesiny miboaka.
4 Ôndrikôndrikinany jiaby koa fa navoaboakany, lôso izy nandeha talohandrô io, aviô irô io nan̈araka izy fôtony feonany haindrô.
5 Irô tsy mety han̈araka olo tsy haindrô; ndray irô aby hilefa izy, fôtony feon’olo io tsy haindrô.”
6 Jesosy nivolan̈a fan̈oharan̈a zen̈y tamindrô, kanefa tsy nazava tamindrô foeky raha nivolan̈iny.
7 Ke ho Jesosy ndraiky koa: “Ankitikitin̈y, ambarako anarô marin̈y tsarabe fa, zaho varavaran̈a idiran’ny ôndrikôndriky.
8 Mpangalatra ndreky mpandrava* aby zay olo nangala plasinaka; kanefa irô ôndrikôndriky aby io tsy nitandren̈y irô.
9 Zaho varavaran̈a. Lan̈iany olo miditry baka aminaka ho avotro, aviô izy hiditry ndreky hiboaka ke hahita tany misy bozaka.
10 Mpangalatra tsy avy izikoa tsy raha hangalatra, hamono, ndreky handravan̈a. Fa zaho ndraiky navy baka irô hahazo fiainan̈a, ke ho velon̈o fo.
11 Zaho tsiman̈aja farany tsara. Tsiman̈aja farany tsara zen̈y mahafoe ain̈inany han̈avaotan̈a ôndrikôndriky.
12 Lelahy karamain̈a ndraiky sady tsy tsiman̈aja baka iô tsy tômpin’ny ôndrikôndriky, ke izy koa fa mahita amboadỳ man̈aton̈o, hialàny iô irô ôndrikôndriky aby io ke lôso izy milefa. Alain’ny amboadỳ io sasany amindrô ke lambiny miparitaka.
13 Nilefa lelahy in̈y fôtony izy raha olo karamain̈a fo, baka iô izy tsy miasalohan’ny ôndrikôndriky.
14 Zaho tsiman̈aja farany tsara. Haiko ôndrikôndrikinaka, aviô ôndrikôndrikinaka mahay zaho,
15 karaha ataon’ny Baba mahay zaho, aviô zaho mahay Baba. Zaho mahafoe ain̈inaka han̈avaotan̈a irô ôndrikôndriky aby io.
16 “Zaho manan̈a ôndrikôndriky hafa tsy an̈atin’ny vario ty; irô koa tsy maintsy taritiko, ke irô hitandren̈y feonaka. Irô hanjary andiany araiky, baka iô araiky fo tsiman̈ajandrô.
17 Zaho tian’ny Baba, fôtony zaho mahafoe ain̈inaka, baka hazahoako izio ndraiky.
18 Tsisy olo man̈adoso izio aminaka, fôtony zaho mahafoe izio an-tsitrapô. Zaho manan̈a fahifan̈a hafoe izio, aviô zaho manan̈a fahifan̈a hahazo izio ndraiky. Zen̈y didy nazoko baka tamy Babako.”
19 Nimpody tsy nitovy hevitry ndraiky koa irô Jiosy aby io baka tamy volan̈a aby zen̈y.
20 Maro tamindrô nivolan̈a: “Izio misy demony aviô izio lefaka. Nan̈ino anarô mitandren̈y izy?”
21 Ho sasany: “Zen̈y tsy volan̈an’olo misy demony. Demony ma mahavita mampahita* mason’olo gila?”
22 Ta Jerosalema tamy zen̈y nisy Fetin’ny Fitokanan̈a. Ririnin̈y andra,
23 Jesosy nandeha tamy tempoly tao, tamy lalan̈a misy tafony namboarin’i Solomona.
24 Nikodidin̈andrô Jiosy aby io izy, ke ho irô taminany: “Ziska ombian̈a ma zahay ambelanao misalasala? Volàn̈a aminay mazava tsarabe izikoa anao Kristy.”
25 Ho Jesosy tamindrô: “Raha zen̈y efa nivolan̈iko taminarô, fa anarô tsy mino. Asa ataoko amin’ny an̈aran̈an’ny Baba porofo mankamarin̈y zaho.
26 Kanefa anarô tsy mino, fôtony anarô tsy ôndrikôndrikinaka.
27 Ôndrikôndrikinaka mitandren̈y feonaka; irô haiko aviô irô man̈araka zaho.
28 Irô amezako fiainan̈a tsisy farany, baka iô tsisy andra hamparipaka irô sady tsisy olo handrava irô amy tan̈ako.
29 Raha namezan’ny Babako zaho mbala beben’ny raha hafa jiaby, aviô tsisy olo mahavita mandrava irô io amy tan̈an’ny Babako.
30 Araiky fo* zaho ndreky Baba.”
31 Nimpody nangala vato ndraiky koa irô Jiosy aby io hitorahan̈a izy.
32 Ho Jesosy tamindrô: “Anarô nan̈aboahako asa maro tsara baka tamy Baba. Ke aia amindrô asa aby io hitorahanarô vato zaho?”
33 Ho irô Jiosy aby io taminany: “Tsy baka amin’ny asa tsara hitorahanay vato anao, fa baka amin’ny anao tsy man̈isy fôtiny Zan̈ahary. Aia ke anao olombelon̈o, kanefa anao man̈ano anao zan̈ahary!”
34 Ho Jesosy tamindrô: “Tsy ty ma raha efa voasoratra amy Lalàn̈anarô ao: ‘Zaho nivolan̈a: “Anarô zan̈ahary”’?*
35 Izikoa ‘zan̈ahary’ nikahiany irô olo aby nivolan̈in’ny volan̈an’ny Zan̈ahary fa diso aby io (kanefa Soratra Masin̈y tsy mety foan̈ana),
36 nan̈ino basy zaho, araiky namasin̈in’ny Zan̈ahary sady nalefany amy donia ty, ataonarô fa tsy man̈isy fôtiny izy fôtony zaho nivolan̈a: ‘Zaho Zanakan’ny Zan̈ahary’?
37 Izikoa zaho tsy man̈ano asan’ny Baba, aza mino zaho.
38 Fa izikoa zaho man̈ano irô io, ndray anarô tsy mino zaho, inòa asa aby io, amy zen̈y anarô hahay sady tsy vôly hahay fa Baba tafikamban̈a aminaka, aviô zaho tafikamban̈a amy Baba.”
39 Irô nan̈aohatra nanambotro izy ndraiky koa, fa izy fo nilefa ke tsy nazondrô.
40 Lôso ndraiky koa izy nandeha tandaforehin’ny Ten̈aranon’i Jordany, tamy tany somilany nan̈anaovan’i Jaona batisa in̈y, ke izy nidôko tan̈y.
41 Maro olo nan̈aton̈o izy, ke ho irô: “Jaona tsiary nan̈ano fahagagan̈a, fa marin̈y aby raha jiaby nivolan̈iny momba lelahy io.”
42 Maro tamin’olo tan̈y nino izy.
Lamariky amy Pazy Ambany
^ Na: “mpangalatra mandroba-draha.”
^ Na: “mpangalatra mandroba-draha.”
^ Abt: “man̈abian̈a.”
^ Na: “Tafikamban̈a.”
^ Na: “karaha Zan̈ahary.”
