Vaovao Tsara Nisoratin’i Jaona 11:1-57
11 Nisy lelahy araiky kahian̈a Lazarosy narary. Izy nipetraka ta Betania, tanàna nisy Maria ndreky Marta anabaviny.
2 Io Maria araiky nandraraka menaka man̈itry tamy Tômpo in̈y ndreky namafa vitinany tamy fan̈evanany; Lazarosy narary io anadahiny.
3 Ke irô anabaviny aby io nandefa hafatra tamy Jesosy karaha ty: “Tômpo, hitanao, kamaradinao tianao be in̈y marary.”
4 Fa Jesosy koa fa naharen̈y zen̈y, ho izy: “Tsy hamono izy anton’ny aretin̈y io, fa han̈amezan̈a voninahitry Zan̈ahary, amy zen̈y Zanakan’ny Zan̈ahary hahazo voninahitry baka amy zio.”
5 Jesosy tia Marta ndreky rahavaviny aviô Lazarosy.
6 Kanefa, Lazarosy koa fa ren̈iny narary, izy mbala nidôko tamy tany nisy izy tan̈y andra aroe.
7 Tafaran’izen̈y, karaha ty ho izy tamindrô mpianatranany aby io: “Alô atsika himpody a Jodia an̈y ndraiky.”
8 Ho irô mpianatra aby io taminany: “Raby, vo tsy ela kony irô Jodianin̈y aby io nitady hitaora-bato anao ay! Ke anao mbala handeha himpody an̈y ndraiky koa?”
9 Ho Jesosy: “Tsy 12 lera ma andra mazava? Izikoa olo araiky mandeha andra mazava, tsisy raha hampavoatsikon̈o izy, fôtony hitany hazavan̈an’ny donia ty.
10 Fa olo araiky koa mandeha andra alin̈y, izy ho voatsikon̈o, fôtony tsisy hazavan̈a aminany ao.”
11 Izy koa fa baka nivolan̈a raha aby zen̈y, ho izy: “Mandry Lazarosy namantsika, fa zaho handeha an̈y hamaoha izy.”
12 Ke ho irô mpianatra aby io taminany: “Tômpo, izikoa izy mandry, ho janga izy.”
13 Kanefa Jesosy tamin’io tihivolan̈a fa Lazarosy maty. Fa irô fo nihevitry fa Lazarosy nangala kajo, ke nandry.
14 Ke nivolan̈in’i Jesosy mazava tsarabe tamindrô: “Maty Lazarosy.
15 Nakiry zaho tsy tan̈y fa mahatsara anarô raha zen̈y, amy zen̈y anarô mino. Fa alô atsika handeha aminany an̈y.”
16 Ke karaha ty ho Tomasy, araiky kahian̈a i Amba in̈y, tamindrô mpianatra hafa aby io: “Alô koa atsika handeha, amy zen̈y atsika hiaraka maty aminany.”
17 Jesosy koa fa navy, efa efatra andra nandiven̈ana Lazarosy tam-pasan̈a tao.
18 Marikitry Jerosalema tany misy Betania io, kadiriny telo kilômetra* iô.
19 Maro tamindrô Jiosy aby io navy tamy Marta ndreky Maria tan̈y nankahery irô, fôtony anadahindrô naty.
20 Izikoa fa ren̈in’i Marta fa Jesosy navy, lôso izy nitsena izy; fa Maria ndraiky nipetraka tan-tran̈o tao fo.
21 Ke ho Marta tamy Jesosy: “Tômpo, izikoa anao teto, anadahiko in̈y tsy naty.
22 Ary haiko tsarabe fa ndray ziô, zay raha hangatahanao amy Zan̈ahary amezany anao.”
23 Ho Jesosy taminany: “Hitsangana anadahinao.”
24 Ho Marta taminany: “Haiko fa hitsangana izy lera olo maty hivilômin̈y amin’ny andra farany.”
25 Ho Jesosy taminany: “Zaho familaoman̈a olo maty ndreky fiainan̈a. Zay olo man̈aboaka fa mino zaho, ndray izy maty, izy ho velon̈o ndraiky;
26 aviô zay olo velon̈o ke man̈aboaka fa mino zaho, izy tsy ho foaty foeky. Anao ma mino zen̈y?”
27 Ho izy taminany: “Ia, Tômpo! Zaho mino fa anao Kristy, Zanakan’ny Zan̈ahary, araiky ho avy amy donia ty.”
28 Izy koa fa baka nivolan̈a zen̈y, lôso izy nandeha nikaiky Maria rahavaviny. Ke izy nibisibisiky taminany karaha ty:* “Ao Mpampianatra mitady anao.”
29 Niaraka Maria naharen̈y zen̈y, nitsangana nalaky izy baka iô lôso izy nandeha tamy Jesosy tan̈y.
30 Jesosy mbala tsendriky navy tan-tanàna, fa izy mbala tamy tany nitsinan’i Marta izy in̈y fo.
31 Irô Jiosy nankahery Maria tan-tran̈o tao koa fa nahita fa izy nitsangana nalaky aviô nandeha, irô nan̈araka izy. Irô baka nieritreritry fa izy handeha hitomoan̈y am-pasan̈a an̈y.
32 Maria koa fa navy tamy tany nisy Jesosy, izy nankôhoko tamy vitinany baka iô ho izy: “Tômpo, izikoa anao teto, anadahiko in̈y tsy naty.”
33 Jesosy koa fa nahita Maria ndreky irô Jiosy niaraka taminany aby io nitomoan̈y, izy nihaimbe aviô izy nalahelo mare.
34 Ho izy: “Aia tany nan̈apitrahanarô izy?” Ho irô taminany: “Tômpo, avia zahava!”
35 Ke latsaka ranomason’i Jesosy.
36 Ke ho irô Jiosy aby io: “Mba tiany mare izy in̈y ay!”
37 Fa ho sasany tamindrô: “Lelahy io nahavita nampahita* mason’olo gila, ke tsy vitany foeky nisakana araiky io tsy ho foaty?”
38 Jesosy koa fa baka nihaimbe ndraiky, izy nandeha tamy fasan̈a io. Izio lava-bato nitampenan̈a vato.
39 Ho Jesosy: “Adosoanarô vato io.” Ho Marta anabavin’ny lelahy naty io taminany: “Tômpo, efa mantsin̈y izy zay, fôtony efa efatra andra kony zay ay!”
40 Ho Jesosy taminany: “Zaho ma tsy efa nivolan̈a taminao fa anao koa mino, anao hahita voninahitrin’ny Zan̈ahary?”
41 Ke nadosondrô vato io. Jesosy baka tiô nisan̈andra lan̈itry aviô ho izy: “Baba, man̈ano mersy anao zaho fôtony anao mitandren̈y zaho.
42 Haiko tsarabe fa anao mitandren̈y zaho fo; fa nohon’ny vahoaka mitsangana man̈odidin̈y zaho aby ty mahavy zaho mivolan̈a zen̈y, baka irô hino fa anao nan̈iraka zaho.”
43 Izy koa fa baka nivolan̈a raha aby zen̈y, izy nandronton̈o mare karaha ty: “Lazarosy, miboaha!”
44 Ke lelahy efa naty io niboaka, tan̈ananany ndreky vitinany nifihezin̈y tamy lamba, aviô saoranany navoafôn̈o lamba. Ho Jesosy tamindrô: “Vahà izy, baka iô ambilà izy mandeha.”
45 Maro tamindrô Jiosy navy tamy Maria tao ke nahita raha nataon’i Jesosy io nanjary nino izy.
46 Fa sasany ndraiky nandeha tamindrô Fariseo aby io tan̈y nitantara raha nataon’i Jesosy.
47 Ke irô lohandohan’ny mpisôron̈o ndreky irô Fariseo aby io namory irô olo aby an̈isan’ny Fitsaran̈a An̈abo Jiosy,* aviô ho irô: “Ino raha handeha hataontsika, fôtony maro fahagagan̈a ataon’ny lelahy in̈y?
48 Izikoa izy banjaintsika karaha io fo, hino izy aby olo jiaby, ke ho avy irô Romanin̈y aby io hangala tempolintsika* ndreky firenenantsika.”
49 Fa araiky tamindrô, tsy azôvy zen̈y fa Kaiafa, mpisôron̈obe tamy taon̈o io, nivolan̈a tamindrô: “Anarô tsisy raha hainarô foeky!
50 Aviô tsy azon’ny dinikinarô ma fa hahita ny meva anarô izikoa olo araiky maty baka hahatsara vahoaka, tozay firenena jiaby ho ripaka?”
51 Tsy baka tamin’ny hevitrinany tômpiny nivolan̈any zen̈y, fa fôtony izy mpisôron̈obe tamy taon̈o io, izy naminan̈y fa Jesosy ho foaty baka hahatsara firenena io,
52 ary tsy hahatsara firenena io fo fa hamorian̈a irô zanakan’ny Zan̈ahary miparitaka aby an̈y koa, amy zen̈y irô hitambatra ke hanjary araiky.
53 Ke nanomboko tamin’ny andra in̈y, irô nan̈ano jery araiky hamono Jesosy.
54 Ke Jesosy tsy nandeha tamy tany mety hahitandrô Jiosy aby io izy eky. Fa izy niala tiô, baka iô izy nandeha tamy faritry marikitry tany paiky tan̈y, tamy tanàna araiky kahian̈a Efraima, ke izy nidôko tan̈y niaraka tamindrô mpianatra aby io.
55 Efa narikitry Paskindrô Jiosy aby io tamy zen̈y, ke maro olo baka tambanivolo nanonga ta Jerosalema talohan’ny Pasky, baka irô hanasa ain̈y eraka raha takin’ny Lalàn̈a.
56 Irô nitady Jesosy, aviô irô nifampikoran̈a karaha ty tamin’irô nitsangana tamy tempoly tao: “Akôry hevitrinarô? Izy ma tsy ho avy amy fety atỳ foeky?”
57 Fa irô lohandohan’ny mpisôron̈o ndreky irô Fariseo aby io efa nan̈amia beko fa izikoa misy olo mahay tany misy Jesosy, izy tôkony hivolan̈a, misy hanambaorandrô izy.
Lamariky amy Pazy Ambany
^ Abt: “kadiriny 15 stadio.”
^ Na: “Ke ho izy taminany mangingin̈y.”
^ Abt: “nampibian̈a.”
^ Na: “Synedriona.”
^ Abt: “toeran̈antsika.”
