Vaovao Tsara Nisoratin’i Jaona 13:1-38
13 Hain’i Jesosy talohan’ny fetin’ny Pasky fa efa navy lera hialany amy donia ty ndreky handihanany amy Baba. Izy tia mpianatranany* aby amy donia ty, ia, irô io tiany firaka tamy farany.
2 Irô tamy zen̈y nihinan̈a hanin̈y hariva. Efa nataon’ny Devoly tan̈atin’ny fôn’i Jodasy Iskariota, zanakan’i Simona, fan̈irian̈a hamadiky izy.
3 Efa hain’i Jesosy fa namezan’ny Baba izy tam-pelantan̈ananany raha jiaby, aviô izy baka amy Zan̈ahary ke handeha amy Zan̈ahary.
4 Irô mbala tam-pihinanan̈a in̈y, izy nitsangana baka iô nambelany lambanany ambelan̈a. Izy aviô nangala serviety, izio baka tiô nifiheziny tamy vanian̈anany.*
5 Izy amizay nan̈idin̈y rano tan̈atin’ny kovety, ke nanasa vitin’ny mpianatranany aby io, aviô vitindrô io nifafany tamy serviety nifehy tamy vanian̈anany.
6 Izy baka tiô navy tamy Simona Petera. Ho Petera taminany: “Tômpo, anao handeha hanasa vitinaka?”
7 Ho Jesosy taminany: “Mbala tsy azonao antsendriky raha ataoko ziôty io, fa mbala hazava aminao fo izio afarafara an̈y.”
8 Ho Simona Petera taminany: “Mba tsy anao eky hanasa vitinaka e!” Ho Jesosy taminany: “Zaho koa tsy manasa vitinao, anao tsy afaka hiaraka aminaka.”
9 Ho Simona Petera taminany: “Tômpo, alô basy tsy vitinaka fo sasanao fa mboany tan̈ananaka ndreky lohanaka koa.”
10 Ho Jesosy taminany: “Zay olo efa niseky efa madio tanteraka, ke vitinany fo ny raha tavela mila sasan̈a. Anarô efa madio, fa izy fo tsy anarô jiaby.”
11 Hainy baka azôvy olo handeha hamadiky izy, ke zen̈y antony nahavy izy nivolan̈a: “Tsy anarô jiaby madio.”
12 Izy koa fa baka nanasa vitindrô, nimpody nisikininy ndraiky lambanany ambelan̈a, aviô izy nimpody nipetraka tamy latabatra tiô ndraiky. Ke ho izy tamindrô: “Hainarô dikan’ny raha nataoko taminarô tiô in̈y?
13 Anarô mikaiky zaho ‘Mpampianatra’ ndreky ‘Tômpo’, ary marin̈y tsarabe zen̈y fôtony zen̈y ankitin̈y zaho.
14 Ke izikoa zaho Tômpo ndreky Mpampianatra nanasa vitinarô, anarô koa mba tôkony hifanasa* vity.
15 Anarô namezako môdely, ke karaha raha nataoko taminarô raha tôkony hataonarô koa.
16 Ankitikitin̈y, ambarako anarô marin̈y tsarabe fa, mpanompo tsy be mandilatra tômponany, aviô olo irahin̈y tsy be mandilatra olo nan̈iraka izy.
17 Izikoa hainarô raha aby zen̈y, sambatra anarô izikoa man̈ano irô io.
18 Tsy anarô jiaby izy koran̈iko zen̈y; efa haiko azôvy aby olo nifidiko. Fa miboaka raha zen̈y baka ho tanteraka raha koran̈in’ny Soratra Masin̈y ty: ‘Nan̈ainga hôtrombitinany hamango zaho* araiky nihina môfonaka.’
19 Manomboko ziô, efa sakavy ambarako anarô tsialohaloha raha hiboaka, amy zen̈y lera raha io mandalo, anarô hino fa zaho izy.
20 Ankitikitin̈y, ambarako anarô marin̈y tsarabe fa, zay olo mandray olo nirahako, mandray zaho; aviô zay olo mandray zaho, mandray Araiky nan̈iraka zaho koa.”
21 Jesosy koa fa baka nivolan̈a raha aby zen̈y, niasaloha mare izy, ke izy nivolan̈a: “Ankitikitin̈y, ambarako anarô marin̈y tsarabe fa, araiky aminarô io hamadiky zaho.”
22 Irô mpianatra aby io nifampizahazaha, ke irô very hevitry sady lôso diniky asa azôvy amindrô izy koran̈iny io.
23 Araiky tamindrô mpianatra aby io, tsy azôvy zen̈y fa araiky tian’i Jesosy in̈y, nipetraka narikitry* Jesosy.
24 Ke izy nisin̈ialen’i Simona Petera,* baka iô ho izy taminany: “Ambarà zahay azôvy izy volan̈iny zen̈y.”
25 Ke mpianatra io somary nan̈afara hely narikitry tratran’i Jesosy, aviô ho izy taminany: “Tômpo, azôvy ma zen̈y?”
26 Ho Jesosy: “Izy araiky hamezako tapaka môfo ajoboko an̈atin’ny kapila.” Izy koa fa baka nan̈ajobo môfo io tan̈atin’ny kapila, izio namezany i Jodasy zanakan’i Simona Iskariota.
27 Jodasy koa fa baka nangala tapaka môfo io, Satana niditry taminany. Ke ho Jesosy taminany: “Ataova malaky raha handeha hataonao.”
28 Kanefa tsisy tamindrô olo nipetraka* nan̈odidin̈y latabatra tiô nahay nan̈ino izy nivolan̈a zen̈y taminany.
29 Sasany tamindrô nieritreritry fa, fôtony Jodasy nitana boatim-bola, Jesosy tihivolan̈a taminany fa izy mila mandeha mivanga raha ilaindrô amy fety, na izy tôkony han̈amia raha olo masikiny.
30 Izy koa fa baka nahazo tapaka môfo in̈y, direkty izy lôso niboaka. Alin̈y andra tamy zen̈y.
31 Jodasy koa fa tafiboaka, Jesosy nivolan̈a: “Ziôty Zanak’olo amezan̈a voninahitry, aviô baka aminany an̈amezan̈a voninahitry Zan̈ahary.
32 Zan̈ahary lastiô han̈amia voninahitry izy, sady Izy han̈amia voninahitry izy iô ny iô.
33 Zanako tiako aby, efa hely fotoan̈a tavela hiarahako aminarô. Anarô hitady zaho, fa ambaka raha nivolan̈iko tamindrô Jiosy aby in̈y koa raha ambarako anarô ziô: ‘Tany handihanako tsy afaka andihananarô.’
34 Ty didy vaovao hamezako anarô: Anarô mifankatiava; ke karaha nitiavako anarô koa tôkony mba hifankatiavanarô.
35 Ke izikoa anarô mifankatia, zen̈y hahaizan’olo jiaby fa anarô mpianatranaka.”
36 Ho Simona Petera taminany: “Tômpo, handeha aia ma anao?” Ho Jesosy: “Anao ziôty mbala tsendriky afaka man̈araka zaho amy tany handihanako, fa afarafara an̈y anao han̈araka zaho.”
37 Ke ho Petera: “Tômpo, nan̈ino ma zaho ziô mbala tsy afaka man̈araka anao? Zaho kony vôn̈ono hafoe ain̈inaka ninao ay!”
38 Ho Jesosy: “Anao ma ten̈a vôn̈ono hafoe ain̈inao ninaka tsarabe? Ankitikitin̈y, ambarako anao marin̈y tsarabe fa, akôholahy mbala tsendriky man̈ena, intelo aby anao han̈ano sary tsy hahay zaho.”
Lamariky amy Pazy Ambany
^ Na: “ninany.”
^ Na: “izio baka tiô nisikininy.”
^ Na: “mba tsy maintsy mifanasa.”
^ Na: “Nanjary nanohitry zaho.”
^ Abt: “nandry nandriran̈a narikitry tratran’i.”
^ Na: “izy nan̈anaovan’i Simona Petera fihetsiky tamy loha.”
^ Abt: “nandry nandriran̈a.”
