Vaovao Tsara Nisoratin’i Jaona 14:1-31
14 Karaha ty koa ho Jesosy: “Aza ambela hialamboetry fônarô. Aboaha fa anarô mino Zan̈ahary, aviô aboaha fa anarô mino zaho koa.
2 Amy tran̈on’ny Babako ao misy plasy maro mety hipitrahan̈a. Izikoa tsy zen̈y baka, zaho tsy nivolan̈a raha zen̈y taminarô. Zaho io handeha han̈amboatra plasy ninarô.
3 Ke zaho koa fa lôso, zaho han̈amboatra plasy ninarô, baka iô zaho himpody ndraiky ke hangala anarô handeha aminaka an̈y. Amy zen̈y zay tany misy zaho, ho hisy anarô koa.
4 Aviô hainarô lalan̈a mandeha amy tany imboako.”
5 Ke ho Tomasy taminany: “Tômpo, tsy hainay kony tany handihananao ay! Akôry hahaizanay lalan̈a man̈an̈y?”
6 Ho Jesosy taminany: “Zaho lalan̈a ndreky fahamarin̈ana aviô fiainan̈a. Tsisy olo mandeha amy Baba izikoa tsy baka aminaka.
7 Izikoa anarô nahay zaho, tôkony ho hainarô koa Babako; manomboko ziô anarô mahay izy sady efa nahita izy.”
8 Ho Filipo taminany: “Tômpo, aboaha zahay Baba, fa efa ampy zahay edy zen̈y.”
9 Fa ho Jesosy taminany: “A Filipo, ahilan-draha jiaby niarahako taminarô zay ke, mbala tsy hainao fo zaho? Lan̈iany olo nahita zaho, nahita Babako koa. Ke nan̈ino anao mivolan̈a: ‘Aboaha zahay Baba’?
10 Anao ma tsy mino fa zaho tafikamban̈a amy Baba, aviô Baba tafikamban̈a aminaka? Tsy hevitrinaka tômpiny raha volan̈iko aminarô, fa Baba tafikamban̈a aminaka fo man̈ano asanany.
11 Minoa zaho fa zaho tafikamban̈a amy Baba, aviô Baba tafikamban̈a aminaka. Fa izikoa tsy zen̈y, minoa baka amin’ny anarô mahita asa ataoko aby io.
12 Ankitikitin̈y, ambarako anarô marin̈y tsarabe fa, zay olo man̈aboaka fa mino zaho man̈ano asa ataoko koa; ndray izy aby han̈ano asa beben’irô io, fôtony zaho handeha amy Baba an̈y.
13 Baka iô zay raha angatahanarô amin’ny an̈aran̈anaka, hataoko, amy zen̈y Baba hahazo voninahitry baka amy Zanaka.
14 Izikoa anarô mangataka raha amin’ny an̈aran̈anaka, izio hataoko.
15 “Izikoa anarô tia zaho, anarô han̈araka didinaka.
16 Aviô zaho hangataka amy Baba baka izy han̈amia anarô mpan̈ampy* hafa hiaraka aminarô mandrakizay,
17 tsy ino izio fa fan̈ahin’ny fahamarin̈ana. Donia ty tsy afaka mahazo izio, fôtony izio tsy hitandrô sady tsy haindrô. Anarô ndraiky mahay izio, fôtony izio midôko aminarô sady an̈atinarô ao.
18 Anarô tsy hambelako manaokan̈a.* Zaho himpody aminarô atỳ.
19 Hely tavela donia ty efa tsy hahita zaho eky; fa anarô hahita zaho, fôtony zaho velon̈o baka iô anarô ho velon̈o.
20 Amin’ny andra zen̈y, ho hainarô fa zaho tafikamban̈a amy Babako, baka iô anarô tafikamban̈a aminaka, aviô zaho tafikamban̈a aminarô.
21 Zay olo man̈eky didinaka ke man̈araka irô io, izy tia zaho. Baka iô, zay olo tia zaho ho tian’ny Babako. Aviô zaho ho tia izy, ke haboakako izy tsarabe azôvy zaho.”
22 Jodasy (tsy araiky Iskariota) nivolan̈a taminany: “Tômpo, ino ma raha nandalo ke mahavy* anao han̈aboaka tsarabe aminay azôvy anao, fa tsy amy donia ty?”
23 Ho Jesosy taminany: “Izikoa misy olo tia zaho, izy han̈araka volan̈anaka, ke Babako ho tia izy. Zahay handeha aminany an̈y ke hiaraka hipetraka aminany.
24 Zay olo tsy tia zaho, tsy man̈araka volan̈anaka. Volan̈a ren̈inarô io tsy ninaka, fa nin’ny Baba araiky nan̈iraka zaho.
25 “Efa sakavy volan̈iko aminarô raha aby zen̈y diany zaho mbala aminarô eto.
26 Fa mpan̈ampy io, tsy ino zen̈y fa fan̈ahy masin̈y halefan’ny Baba amin’ny an̈aran̈anaka io, handeha hampianatra anarô raha jiaby. Aviô izio hampahatsiaro anarô raha jiaby nambarako anarô.
27 Ambelako aminarô fiadanan̈a. Amezako anarô fiadanan̈anaka. Tsy miran̈a amy fomba an̈amezan’ny donia ty izio fomba an̈amezako izio anarô. Ke aza ambela hialamboetry na havozo fônarô.
28 Efa ren̈inarô zaho nivolan̈a raha ty taminarô: ‘Zaho handeha, baka iô zaho himpody aminarô atỳ ndraiky.’ Izikoa anarô tia zaho, ho ravoravo anarô mahay fa zaho handeha amy Baba, fôtony Baba bebe tozay zaho.
29 Efa nambarako anarô tsialohaloha raha zen̈y, amy zen̈y anarô hino lera raha zen̈y mandalo.
30 Zaho efa tsy hivolan̈a raha maro aminarô eky, fôtony mpitondra donia ty efa avy, fa izy fo tsy manan̈a fahifan̈a aminaka.
31 Fa baka ho hain’ny donia ty fa zaho tia Baba, eraka raha nan̈irahan’ny Baba zaho raha ataoko. Mitsangàna, alô atsika hiala eto.
