Vaovao Tsara Nisoratin’i Jaona 15:1-27
15 “Zaho rezain ten̈a izy, baka iô Babako mpambôly.
2 Zay sampan̈a tsy mamoa aminaka adosony, fa zay mamoa ndraiky rantsan̈any baka hadio, amy zen̈y hahaimaro fo voany.
3 Anarô efa madio fôtony anarô nitandren̈y volan̈a nivolan̈iko taminarô.
4 Mifen̈a ho tafikamban̈a aminaka fo, fa zaho ho tafikamban̈a aminarô fo koa. Karaha ataon’ny sampan̈an’ny rezain tsy mamoa izikoa tsy tafikamban̈a amy vodin’ny rezain, anarô koa tsy hamoa izikoa anarô tsy tafikamban̈a aminaka fo.
5 Zaho rezain, baka iô anarô sampan̈an’izio. Izikoa olo araiky tafikamban̈a aminaka fo aviô zaho tafikamban̈a aminany, izy hamoa mare; fôtony izikoa tsy baka aminaka anarô tsisy raha vita foeky.
6 Izikoa misy olo miala aminaka, izy karaha sampan̈a hatsipy ambelan̈a an̈y ke malazo. Avorin’olo irô sampan̈a aby io, baka iô hatsipindrô an̈atin’ny môtro ke may.
7 Izikoa anarô tafikamban̈a aminaka fo, aviô volan̈anaka tsy adôsonarô an̈atin’ny fônarô ao, angataha zay raha tianarô fa izio hamian̈a anarô edy.
8 Babako hahazo voninahitry izikoa anarô tsy vôly mamoa mare sady man̈aboaka fa anarô mpianatranaka.
9 Karaha itiavan’ny Baba zaho hitiavako anarô; ke ataova fo raha itiavako anarô.
10 Izikoa anarô man̈araka didinaka, anarô man̈ano raha itiavako anarô fo, karaha ataoko man̈araka didin’ny Baba ke man̈ano raha itiavany zaho fo.
11 “Nambarako anarô raha zen̈y amy zen̈y anarô ho ravoravo karaha zaho, baka iô haravoan̈anarô ho feno.
12 Ty didinaka: Anarô mifankatiava, karaha nitiavako anarô.
13 Tsisy olo manan̈a fitiavan̈a be mandilatran’ny mahafoe ain̈inany baka hahatsara namany.
14 Anarô namako izikoa anarô man̈araka didy amezako anarô.
15 Tsy mpanompo eky ikahiako anarô, fôtony mpanompo tsy mahay raha ataon’ny tômponany. Fa naman̈a ikahiako anarô, fôtony nambarako anarô raha jiaby ren̈iko baka tamy Babako.
16 Tsy anarô nifidy zaho, fa zaho nifidy anarô. Zaho nanendry anarô tsy ho vôly hamokatra voa, aviô voa vokarinarô tôkony hahadin̈y fo; amy zen̈y zay raha angatahanarô amy Baba amin’ny an̈aran̈anaka, hamezany anarô.
17 “Amezako anarô didy aby zen̈y, amy zen̈y anarô mifankatia.
18 Izikoa anarô halan’ny donia ty, tsaraova fa zaho efa halany talohanarô.
19 Izikoa anarô an̈isan’ny donia ty, anarô ho tian’ny donia ty fôtony anarô ninany. Fa fôtony anarô tsy an̈isan’ny donia ty, azon’ny zaho efa nifidy anarô baka tamy donia ty, anarô halan’ny donia ty.
20 Alaiva onon̈o volan̈a nivolan̈iko taminarô ty: Mpanompo tsy be mandilatra tômponany. Izikoa irô nan̈enjiky zaho, irô han̈enjiky anarô koa; aviô izikoa irô nan̈araka volan̈anaka, irô han̈araka volan̈anarô koa.
21 Fa baka amin’ny an̈aran̈anaka an̈anaovandrô raha jiaby zen̈y aminarô, fôtony tsy haindrô Araiky nan̈iraka zaho.
22 Izikoa ohatran-draha zaho tsy navy sady tsy nikoran̈a tamindrô, irô tsy ho voaheloko nan̈ano fahotan̈a. Fa irô ziô tsisy fialan-tsin̈y amy fahotan̈andrô.
23 Lan̈iany olo mankahala zaho, mankahala Babako koa.
24 Izikoa zaho tsy nan̈ano irô fahagagan̈a tsiary ndraiky nisy olo nan̈ano aby io nan̈oloan̈a irô, irô tsy ho voaheloko nan̈ano fahotan̈a. Fa ziôty, irô tsy basiny nahita zaho fa mbala mankahala zaho ndreky Babako koa.
25 Kanefa niboaka raha zen̈y baka ho tanteraka volan̈a voasoratra amy Lalàn̈andrô ty: ‘Irô nankahala zaho tsy amin’ny antony.’
26 Lera avy mpan̈ampy irahako aminarô baka amy Baba, tsy ino zen̈y fa fan̈ahin’ny fahamarin̈ana, izio han̈amia porofo momba zaho;
27 fa anarô ndraiky hitsangana vavolombelon̈o han̈ambara momba zaho, fôtony anarô efa niaraka taminaka rango tamy voanalohany.
