Vaovao Tsara Nisoratin’i Jaona 17:1-26
17 Jesosy koa fa baka nivolan̈a raha aby zen̈y, izy nisan̈andra lan̈itry aviô ho izy: “Baba, navy lera. Ameza voninahitry zanakanao, amy zen̈y zanakanao han̈amia voninahitry anao,
2 karaha nataonao nan̈amia fahifan̈a izy amin’olo* jiaby, amy zen̈y izy afaka han̈amia fiainan̈a tsisy farany olo jiaby namezanao izy.
3 Izikoa irô tihahazo fiainan̈a tsisy farany, irô mila mianatra baka hahay* anao, Zan̈ahary taokan̈a sady marin̈y, ndreky Jesosy Kristy, araiky nirahanao.
4 Zaho efa nan̈amia voninahitry anao tambony tany teto, fôtony efa vitako asa nan̈irahanao zaho.
5 Ke ziôty, Baba, ameza voninahitry ankilanao zaho, karaha voninahitry efa nanan̈ako tankilanao talohan’ny nisian’ny donia ty in̈y.
6 “An̈aran̈anao efa nataoko haindrô olo aby namezanao zaho tamy donia ty. Irô io ninao, aviô irô namezanao zaho, ke irô nan̈araka volan̈anao.
7 Ziôty haindrô fa baka taminao aby raha jiaby namezanao zaho,
8 fôtony volan̈a nambaranao zaho efa nambarako* irô, ke raha zen̈y nikendrô. Nanjary haindrô tsarabe fa zaho solonten̈anao, aviô irô nino fa zaho irakanao.
9 Zaho mivavaka aminao momba irô. Zaho tsy mivavaka nin’ny donia ty, fa nindrô olo namezanao zaho aby io, fôtony irô io ninao.
10 Raha jiaby anan̈ako, ninao; aviô raha jiaby anan̈anao, ninaka; baka tamindrô io nan̈amezan̈a voninahitry zaho.
11 “Zaho efa tsy ho amy donia ty, fôtony zaho handeha aminao an̈y, fa irô ndraiky amy donia ty. A Baba Masin̈y, araova irô nohon’ny an̈aran̈anao namezanao zaho, baka irô hanjary araiky* karaha ataontsika araiky.*
12 Tamy zaho mbala tankilandrô, zaho niaro irô nohon’ny an̈aran̈anao namezanao zaho. Naraovako irô, ke tsisy ndray araiky tamindrô ripaka, izikoa tsy zanakan’ny fandripahan̈a fo, amy zen̈y ho tanteraka raha volan̈in’ny Soratra Masin̈y.
13 Fa zaho iziô handeha aminao an̈y, ke ambarako donia ty raha aby zen̈y, amy zen̈y ho tsapandrô tsarabe haravoan̈anaka.
14 Volan̈anao efa namezako irô, fa irô halan’ny donia ty, fôtony irô tsy an̈isan’ny donia ty, karaha zaho tsy an̈isan’ny donia ty.
15 “Zaho tsy mangataka aminao han̈adoso irô amy donia ty, fa araova amin’ny araiky ratsy in̈y irô.
16 Irô tsy an̈isan’ny donia ty karaha zaho tsy an̈isan’ny donia ty.
17 Ankamasìn̈a* baka amy fahamarin̈ana irô,* fôtony volan̈anao fahamarin̈ana.
18 Karaha nataonao nan̈iraka zaho amy donia ty, zaho koa nan̈iraka irô amy donia ty.
19 Baka amindrô ankamasin̈ako ain̈inaka, amy zen̈y irô koa hankamasin̈iny baka amy fahamarin̈ana.
20 “Tsy nindrô ty fo ivavahako, fa nin’olo hafa mino zaho baka amy volan̈andrô koa.*
21 Baka irô hanjary araiky, karaha anao Baba tafikamban̈a aminaka ndreky zaho tafikamban̈a aminao, amy zen̈y irô koa tafikamban̈a amintsika, ke donia ty hino fa anao nan̈iraka zaho.
22 Namezako irô voninahitry namezanao zaho, amy zen̈y irô hanjary araiky karaha atsika araiky.
23 Zaho tafikamban̈a amindrô, aviô anao tafikamban̈a aminaka, amy zen̈y irô ho tafikamban̈a* tsarabe ke ho hain’ny donia ty fa anao nan̈iraka zaho, aviô anao tia irô karaha nitiavanao zaho.
24 Baba, tiako hiaraka aminaka amy tany misy zaho irô olo namezanao zaho aby io, amy zen̈y ho hitandrô voninahitry namezanao zaho, fôtony anao efa tia zaho talohan’ny nan̈oren̈ana donia ty.
25 A Baba man̈ano ny rariny,* donia ty tsy mahay anao, fa zaho mahay anao, baka iô irô ty koa mahay fa anao nan̈iraka zaho.
26 Efa nataoko haindrô an̈aran̈anao, aviô izio mbala hataoko haindrô ndraiky koa, amy zen̈y karaha nitiavanao zaho hitiavandrô olo hafa, baka iô zaho ho tafikamban̈a amindrô.”
Lamariky amy Pazy Ambany
^ Na: “amy nôfotro.”
^ Na: “mila mahay.”
^ Abt: “namezako.”
^ Na: “ho tafikamban̈a.”
^ Na: “tafikamban̈a.”
^ Na: “Asintaha.”
^ Na: “Ataova raha hampamasin̈y irô baka amy fahamarin̈ana.”
^ Izio volan̈andrô apôstôly 11 aby io.
^ Na: “araiky.”
^ Na: “ny marin̈y.”
