Vaovao Tsara Nisoratin’i Jaona 18:1-40
-
Jodasy namadiky Jesosy (1-9)
-
Petera nampiasa sabatra (10, 11)
-
Jesosy nindesin̈y tamin’i Anasy (12-14)
-
Somilany Petera nan̈ano sary tsy nahay Jesosy (15-18)
-
Jesosy nan̈oloan̈a Anasy (19-24)
-
Fan̈indroeny ndreky fan̈intelon’i Petera nan̈ano sary tsy nahay Jesosy (25-27)
-
Jesosy nan̈oloan̈a Pilato (28-40)
-
“Fanjakan̈anaka tsy an̈isan’ny donia ty” (36)
-
18 Jesosy koa fa baka nivolan̈a raha aby zen̈y, izy ndreky irô mpianatranany aby io nitsaka tandaforehin’ny Vavasahan’i Kidrona.* Tan̈y nisy zaridain zay, ke izy ndreky irô mpianatranany aby io niditry tao.
2 Jodasy, araiky namadiky izy in̈y, mba nahay plasy io koa, fôtony Jesosy ndreky irô mpianatranany aby io natetiky nandeha tao.
3 Ke Jodasy nitondra andian’ny maramila ndreky mpiambin̈y baka tamindrô lohandohan’ny mpisôron̈o ndreky Fariseo aby io. Irô navy tan̈y niaraka tamy taorsy ndreky lalampon̈o aviô raha findesin̈y miady.
4 Efa hain’i Jesosy raha jiaby handeha hahazo izy. Izy nan̈aton̈o, baka iô ho izy tamindrô: “Azôvy ma tadiavinarô?”
5 Ho irô taminany: “Jesosy baka a Nazareta.” Ho izy tamindrô: “Zaho zen̈y.” Jodasy, araiky namadiky izy io, mba nitsangana niaraka tamindrô tiô koa.
6 Kanefa, Jesosy koa fa nivolan̈a tamindrô: “Zaho zen̈y”, irô nimpody afara ke lavo tamy tany.
7 Fa izy nimpody nan̈ontany irô ndraiky: “Azôvy tadiavinarô ay?” Ho irô: “Jesosy baka a Nazareta.”
8 Ho Jesosy: “Efa nambarako anarô tiô fa zaho zen̈y. Ke izikoa zaho tadiavinarô, ambilà irô olo aby ty mandeha.”
9 Niboaka raha zen̈y baka ho tanteraka volan̈anany ty: “Tsy nambelako hisy ho very foeky irô olo namezanao zaho aby io, ndray araiky.”
10 Simona Petera nisy sabatra. Nitsoahany sabatra io, aviô nifirainy tamy zio mpanompon’ny mpisôron̈obe, ke tapaka sofin̈inany ankavanan̈a. Malkô an̈aran̈an’ny mpanompo io.
11 Kanefa ho Jesosy tamy Petera: “Ampodiana amy tran̈ony sabatra io. Zaho ma tsy tôkony higiaka amy kôpy namezan’ny Baba zaho?”
12 Ke nanambotro Jesosy irô maramila aby io ndreky sefon’ny maramila aviô irô mpiambin̈y nalefandrô Jiosy aby io, baka iô izy nivahaorandrô.*
13 Nindesindrô tamin’i Anasy tan̈y antsendriky izy, fôtony izio rafozandahin’i Kaiafa, mpisôron̈obe tamy taon̈o io.
14 Kaiafa io baka araiky nan̈amia soso-kevitry irô Jiosy aby io fa hahita ny meva irô izikoa olo araiky maty baka hahatsara vahoaka.
15 Simona Petera ndreky mpianatra araiky hafa zay nan̈araka Jesosy. Mpianatra io hain’ny mpisôron̈obe, ke izy niaraka tamin’i Jesosy niditry tan-dakoron’ny mpisôron̈obe tao,
16 fa Petera ndraiky nitsangana tambelan̈a, tamy varavaran̈a.* Ke mpianatra araiky hafa hain’ny mpisôron̈obe io niboaka, aviô izy nikoran̈a tamy mpiambin̈y varavaran̈a, ke Petera nampidiriny.
17 Karaha ty ho mpanompovavy niambin̈y varavaran̈a io tiô tamy Petera: “Anao koa tsy ndraiky mpianatran’ny lelahy io?” Ho izy: “Ehe, zaho tsy mpianatranany.”
18 Irô mpanompo ndreky maramila aby io nitsangana nan̈odidin̈y môtron’ny sharbon nirihetindrô. Andra baka nanintsy, ke irô namindro. Petera koa nitsangana niaraka tamindrô tiô sady namindro.
19 Ke lohandohan’ny mpisôron̈o io nan̈ontany Jesosy momba irô mpianatranany aby io ndreky momba raha nampianariny.
20 Ho Jesosy taminany: “Zaho koa fa nivolan̈a, izio nataoko tamason’olo. Baka iô zaho nampianatra tamy synagoga ndreky tamy tempoly fo, tsy aia zen̈y fa tamy tany nivorian’ny Jiosy jiaby. Zaho tsy nisitrisitriky foeky izikoa fa nivolan̈a.
21 Ke nan̈ino fo anao man̈ontany zaho? Irô olo aby naharen̈y raha nivolan̈iko tamindrô aby io an̈ontania. Irô mahay raha nivolan̈iko.”
22 Jesosy koa fa baka nivolan̈a raha aby zen̈y, araiky tamindrô mpiambin̈y nitsangana narikitry tiô nan̈amia tefan-tsofin̈y izy, aviô ho izy: “Karaha zen̈y ataonao mamaly lohandohan’ny mpisôron̈o?”
23 Ho Jesosy taminany: “Izikoa diso raha nivolan̈iko, ameza porofo zaho ahitan̈a fa diso raha nivolan̈iko. Fa izikoa ndraiky marin̈y raha nivolan̈iko, nan̈ino anao namango zaho?”
24 Izy nalefan’i Anasy tamy Kaiafa mpisôron̈obe tan̈y. Tan̈anany nifehy.
25 Simona Petera nitsangana tiô sady namindro, ke ho irô taminany: “Anao koa tsy ndraiky mpianatranany edy va?” Izy nifamatra, ke ho izy: “Zaho tsy mpianatranany.”
26 Araiky tamy mpanompon’ny mpisôron̈obe, tsy azôvy zen̈y fa havan’ny lelahy araiky nitapahan’i Petera sofin̈y in̈y nivolan̈a taminany: “Tsy anao hitako tamy zaridain tan̈y niaraka taminany in̈y?”
27 Kanefa Petera mbala nifamatra fo, aviô tiô ny iô nisy akôholahy nan̈ena.
28 Ke Jesosy nindesindrô baka tamy Kaiafa handeha amy tran̈on’ny governera. Maraindrain̈y be andra tamy zen̈y. Fa irô fo tsy niditry tamy tran̈on’ny governera tao fôtony irô tsy tihaloto. Irô baka tihihina hanin̈in’ny Pasky.
29 Ke Pilato niboaka tan-tany tamindrô tao, aviô ho izy: “Ino ma raha ratsy nataon’ny lelahy io?”
30 Ho irô taminany: “Izikoa lelahy ty tsy mpan̈ano raha tsy manjary,* zahay tsy mety nanolotro izy taminao tatỳ.”
31 Ke ho Pilato: “Indesa izy, baka iô tsaray eraka lalàn̈anarô.” Ho irô Jiosy aby io taminany: “Zahay tsy mahazo mamono olo.”
32 Niboaka raha zen̈y baka ho tanteraka raha nambaran’i Jesosy momba fomba hifatesany.
33 Ke Pilato nimpody niditry tamy tran̈on’ny governera tao ndraiky, baka iô izy nikaiky Jesosy, aviô ho izy taminany: “Anao ma Mpanjakan’ny Jiosy?”
34 Ho Jesosy: “Anao tômpin’ain̈y ma tihahay raha zen̈y, sa nisy olo nikoran̈a raha momba zaho taminao?”
35 Ho Pilato taminany: “Zaho kony tsy Jiosy ay! Firenenanao ndreky irô lohandohan’ny mpisôron̈o aby io nanolotro anao taminaka tatỳ. Ino ma raha nataonao?”
36 Ho Jesosy: “Fanjakan̈anaka tsy an̈isan’ny donia ty. Izikoa Fanjakan̈anaka an̈isan’ny donia ty, ôtrizay irô mpan̈ara-dia zaho aby io niady baka zaho tsy natolotro tamindrô Jiosy aby io. Kanefa, Fanjakan̈anaka tsy baka amy donia ty.”
37 Ke ho Pilato taminany: “Dikan’izen̈y anao Mpanjaka?” Jesosy nivolan̈a: “Efa izy edy raha volan̈inao zen̈y: Zaho mpanjaka. Ty antony nahavy zaho teraka, ndreky antony naviako tamy donia ty: Han̈ambara ny marin̈y. Ke zay olo milan̈y amy ny marin̈y mitandren̈y feonaka.”
38 Ho Pilato taminany: “Ino ma ny marin̈y?”
Izy koa fa baka nivolan̈a zen̈y, izy niboaka tamindrô Jiosy aby io tao ndraiky koa, ke ho izy tamindrô: “Tsy hitako hadisovan̈an’ny lelahy io.
39 Sady eraka fombanarô zay, zaho tôkony hankafaka olo araiky amy Pasky. Ke tianarô hivotsaorako ma Mpanjakan’ny Jiosy?”
40 Fa irô nimpody nandronton̈o mare karaha ty: “Tsy lelahy io fa Barabasy!” Kanefa Barabasy io dahalo.
Lamariky amy Pazy Ambany
^ Izikoa tsy efa avy mare mahalen̈y, maiky fo vavasaha io ndray efa ririn̈iny andra.
^ Na: “nifihezindrô.”
^ Na: “fidiran̈a.”
^ Na: “Izikoa lelahy ty tsy olon-dratsy.”
