Vaovao Tsara Nisoratin’i Jaona 19:1-42
19 Ke Jesosy nalain’i Pilato baka iô izy nivileziny karavasy.
2 Aviô irô maramila aby io nan̈amboatra* satroboninahitry vita tamy fatsiky, baka iô izio nataondrô tamy lohanany. Izy baka tiô nampisikinindrô lamba viôlé matoe.
3 Ke irô nan̈aton̈o izy aviô ho irô: “Mbalatsara,* Mpanjakan’ny Jiosy e!” Izy baka tiô nivangovangoandrô tefan-tsofin̈y.
4 Niboaka ndraiky koa Pilato, ke ho izy tamindrô: “Indesiko miboaka aminarô atỳ izy, misy ahaizanarô fa tsy hitako foeky raha mahadiso izy.”
5 Ke Jesosy niboaka. Izy navoa satroboninahitry vita tamy fatsiky ndreky rôbo viôlé matoe. Aviô ho Pilato tamindrô: “Indriô lelahy zen̈y!”
6 Kanefa irô lohandohan’ny mpisôron̈o ndreky irô maramila aby io koa fa nahita izy, irô nandronton̈o karaha ty: “Antaon̈a amy pôtô* an̈y izy! Antaon̈a amy pôtô* an̈y izy!” Ho Pilato tamindrô: “Indesanarô izy baka iô vonia,* fa zaho tsy mahita hadisovan̈anany.”
7 Ho irô Jiosy aby io taminany: “Zahay manan̈a lalàn̈a, ke izikoa lalàn̈a zahavan̈a, izy tôkony ho foaty fôtony izy nan̈ano ain̈inany zanakan’ny Zan̈ahary.”
8 Izikoa fa ren̈in’i Pilato raha nivolan̈indrô, izy nahainavozo fo.
9 Ke niditry tamy tran̈on’ny governera tao ndraiky izy, aviô ho izy tamy Jesosy: “Baka aia ma anao?” Fa Jesosy tsy namaly foeky.
10 Ke ho Pilato taminany: “Anao tsy mamaly volan̈anaka? Tsy hainao ma fa zaho manan̈a fahifan̈a hankafaka anao ndreky manan̈a fahifan̈a hamono anao?”*
11 Ho Jesosy taminany: “Anao tsy ho nanan̈a fahifan̈a taminaka foeky izikoa tsy raha namezan̈a anao baka tan̈abo tan̈y raha zen̈y. Ke olo nanolotro zaho taminao ny ten̈a mahery diso.”
12 Zen̈y nahavy Pilato nitady fomba fo hamotsaoran̈a izy. Kanefa irô Jiosy aby io nandronton̈o karaha ty: “Izikoa votsaoranao lelahy io, anao tsy naman’i Kaisara, fôtony manohitry Kaisara zay olo man̈ano ain̈inany ho mpanjaka.”
13 Pilato koa fa naharen̈y volan̈a aby zen̈y, Jesosy nindesiny tambelan̈a. Aviô izy nipetraka tamy sezy fitsaran̈a tamy tany araiky kahian̈a Haramanja Vato, na Gabata amy teny hebreo.
14 Andra Fan̈oman̈ana Pasky tamy zen̈y, kadiriny midỳ* tiô. Ho izy tamindrô Jiosy aby io: “Io mpanjakanarô!”
15 Kanefa irô nandronton̈o mare: “Vonia* an̈y izy! Vonia an̈y izy! Antaon̈a amy pôtô* an̈y izy!” Ho Pilato tamindrô: “Ke hivoneko mpanjakanarô?” Ho irô lohandohan’ny mpisôron̈o aby io: “Zahay tsisy mpanjaka ankoatran’i Kaisara.”
16 Ke izy natôndrony tamindrô baka izy hahanton̈o amy pôtô.*
Jesosy amizay nindesindrô.
17 Izy tômpiny fo nilanja hazofijalian̈anany,* ke izy nandeha tamy tany kahian̈a Babakindoha, na Golgota amy teny hebreo.
18 Tan̈y izy nahanton̈o tamy pôtô niaraka tamy lelahy aroe hafa, ke araiky tankavanan̈anany fa araiky ndraiky tankavianany, Jesosy amizay tan̈ivondrô tiô.
19 Nisy soratra nataon’i Pilato baka iô napetany tamin’ny hazofijalian̈a.* Ty soratra io: “Jesosy baka Nazareta, Mpanjakan’ny Jiosy.”
20 Maro tamindrô Jiosy aby io namaky soratra io, fôtony tany nan̈antaon̈ana Jesosy io narikitry tanàna. Aviô soratra io nisoratin̈y tamy teny hebreo, latin ndreky griky.
21 Kanefa ho irô lohandohan’ny mpisôron̈ondrô Jiosy aby io tamy Pilato: “Aza soratin̈y: ‘Mpanjakan’ny Jiosy’, fa izy nivolan̈a: ‘Zaho Mpanjakan’ny Jiosy.’”
22 Fa ho Pilato: “Zay raha voasoratrako, voasoratrako.”
23 Maramila aby io amizay koa fa baka namantsiky Jesosy tamy pôtô, lambanany ambelan̈a nalaindrô aviô nirasaindrô efatra, ke irô samby nahazo araikiaraiky. Nalaindrô koa lambanany an̈atiny, fa izio fo tsisy zaitry foeky rango an̈abo firaka ambany.
24 Ke irô nifampikoran̈a karaha ty: “Tsy hitriarintsika izy ty fa, alô izy ty hataontsika antsapaka misy ahaizantsika azôvy hahazo izy.” Niboaka raha zen̈y baka ho tanteraka raha nambaran’ny Soratra Masin̈y ty: “Nirasaindrô samby irô lambanaka, aviô lamba nisikiniko nataondrô antsapaka.” Ary zen̈y ankitin̈y raha nataondrô maramila aby io.
25 Nitsangana narikitry hazofijalian̈an’i* Jesosy tiô mamany ndreky rahavavin’ny mamany, aviô Maria vadin’i Klopasy ndreky Maria Magdalena.
26 Ke Jesosy koa fa nahita mamany ndreky mpianatra araiky tiany in̈y nitsangana narikitry tiô, ho izy tamy mamany: “A man̈angy, io zanakanao!”
27 Baka iô ho izy tamy mpianatra io: “Io mamanao!” Ke nanomboko tamy lera zen̈y, man̈angy io nindesiny mpianatra io tan-tran̈onany tan̈y.
28 Tafaran’izen̈y, izikoa fa hain’i Jesosy fa raha jiaby efa ho tanteraka, ty raha nivolan̈iny baka ho tanteraka raha volan̈in’ny Soratra Masin̈y: “Zaho tihigiaka.”
29 Tiô nisy sajoa feno divain matsiko. Nisy olo nan̈ajobo eponzy tan̈atin’ny divain matsiko io aviô izio nataony tamy tahon’ny hysopa,* ke natôndrony tamy vavan’i Jesosy.
30 Jesosy koa fa baka nan̈andran̈a divain matsiko io, ho izy: “Vita.” Izy baka iô niôndriky, ke nafaka fahin̈ananany.
31 Andra Fan̈oman̈ana tamy zen̈y, ke baka faty aby io tsy tavela amin’ny hazofijalian̈a aby io amin’ny andra sabata (fôtony Sabata be tamy zen̈y), irô Jiosy aby io nangataka tamy Pilato baka hitapahan̈a pekindrô olo nahanton̈o tamin’ny hazofijalian̈a aby io, baka iô faty aby io hadoso.
32 Ke navy irô maramila aby io nanapaka pekin’ny lelahy araiky voanalohany ndreky nin’ny lelahy araiky hafa nahanton̈o tamy pôtô tankilan’i Jesosy tiô.
33 Fa irô koa fa navy tamy Jesosy tiô, zahandrô izy efa maty ke pekinany tsy nitapahandrô.
34 Araiky tamindrô maramila aby io nitomboko tritrinany tamy saboa, ke tiô ny iô nisy lio ndreky rano niboaka.
35 Vavolombelon̈on’izen̈y araiky nahita maso raha nandalo, ke marin̈y raha volan̈iny. Hainy fa raha volan̈iny zen̈y marin̈y. Nivolan̈a zen̈y izy baka anarô hino.
36 Niboaka raha aby zen̈y baka ho tanteraka raha volan̈in’ny Soratra Masin̈y ty: “Tsy hisy amy taolan̈anany foeky ho tapaka.”*
37 Misy andininy hafa koa mivolan̈a: “Irô hizaha araiky nitombohindrô.”
38 Tafaran’ny raha aby zen̈y, Josefa baka Arimatia nandeha nangataka tamy Pilato izikoa izy afaka mangala fatin’i Jesosy. Izio araiky tamy mpianatran’i Jesosy, fa azon’izy navozo irô Jiosy aby io, tsy nambarany foeky fa izy mpianatranany. Niken’i Pilato fangatahan̈anany, ke navy Josefa nangala fatin’i Jesosy.
39 Nikodemosy, lelahy araiky navy alin̈y tamy Jesosy tamy voanalohany in̈y, nitondra miora miaro* aloesy* nipezy kadiriny 100 livra.*
40 Ke fatin’i Jesosy nindesindrô aviô nifon̈ôsindrô tamy lamba lin niaraka tamy raha man̈itry, eraka fomban’ny Jiosy lera mandevin̈y.
41 Tamy tany namonoan̈a izy* io nisy zaridain. Tamy zaridain io tao nisy fasan̈a mbala vao sady mbala tsiary nandiven̈ana olo foeky.
42 Andra Fan̈oman̈anandrô Jiosy aby io baka tamy zen̈y, aviô fasan̈a io tsy lavitry tiô, ke Jesosy nalevin̈indrô tao.
Lamariky amy Pazy Ambany
^ Abt: “nitaly.”
^ Na: “Akôry ao; Koezy.”
^ Na: “Vonia.”
^ Na: “Vonia.”
^ Na: “antaon̈a amy pôtô.”
^ Na: “fahifan̈a han̈anton̈o anao amy pôtô.”
^ Abt: “kadiriny tamy lera fahatsiota.”
^ Abt: “Adosoa.”
^ Na: “Vonia.”
^ Na: “izy hivonen̈a.”
^ Na: “tôrotôro.”
^ Na mety ho: “fehy araiky amin’ny.”
^ Miora ndreky aloesy io raha maniry.
^ Izio livra romanin̈y.
^ Na: “tany nan̈antaon̈ana izy tamy pôtô.”
