Vaovao Tsara Nisoratin’i Jaona 2:1-25
2 Tamin’ny andra fahatelo, nisy fetin’ny mariazy ta Kana, a Galilia an̈y. Tamy fety io tao maman’i Jesosy.
2 Jesosy ndreky irô mpianatranany aby io koa mba ainvite tamy fetin’ny mariazy io.
3 Izikoa fa lany divain, maman’i Jesosy nivolan̈a taminany karaha ty: “Irô efa tsisy divain eky.”
4 Kanefa ho Jesosy taminany: “A man̈angy, ino ma idirantsika amy zen̈y?* Lera tôkony han̈anaovako raha mbala tsendriky navy.”
5 Ho mamany tamindrô mpanompo aby io: “Ataova zay raha volan̈iny aminarô.”
6 Tiô nisy sajoa vato tsiota fasian̈a rano, eraka raha nitakian’ny lalàn̈a momba fanasan̈a ain̈y narehandrô Jiosy aby io. Indroe na intelon’ny raha fan̈iran̈ana* vo mahafeno sajoa tsiaraikiaraiky.
7 Ho Jesosy tamindrô: “Finoa rano sajoa aby io.” Ke irô io nifinoandrô firaka tamy son̈iny.
8 Baka iô ho izy tamindrô: “An̈ovòza amizay, aviô izio indesa amy mpiandraikitry fety an̈y.” Nindesindrô tan̈y raha io baka tiô.
9 Mpiandraikitry fety io nan̈andran̈a rano niova divain io, kanefa tsy hainy foeky baka taia navian’izio, (fa irô mpanompo nan̈ovo rano io ndraiky nahay); nikahian’ny mpiandraikitry fety io mpan̈ainga,
10 ke ho izy taminany: “Nin’olo jiaby divain tsara antsendriky amezan̈a olo, fa lera olo mamo vo alefa lay ratsiratsy. Fa ninao ndraiky, divain tsara najarisinao firaka ziô.”
11 Jesosy nan̈ano raha zen̈y ta Kana, a Galilia. Izio fahagagan̈a* voanalohany nataony. Naboakany irô mpianatranany aby io voninahitrinany ke irô nino izy.
12 Tafaran’izen̈y, izy ndreky mamany ndreky irô rahalahiny aby io aviô irô mpianatra aby io nijotso ta Kapernaomy. Fa irô fo tsy nidôko tao ela.
13 Efa narikitry Paskindrô Jiosy aby io, ke Jesosy nanonga ta Jerosalema.
14 Tamy tempoly tao, izy nahita mpivarotro aomby ndreky ôndrikôndriky ndreky pizon, aviô izy nahita mpanakalo vola nipetraka tamy sezindrô.
15 Izy koa fa baka nan̈amboatra karavasy tady, niroasiny tambelan̈an’ny tempoly tan̈y irô ndreky ôndrikôndrikindrô ndreky aombindrô. Naparitany koa vola madinikindrô mpanakalo vola aby io baka iô narongadrongany latabatrandrô.
16 Aviô karaha ty ho izy tamindrô mpivarotro pizon aby io: “Indesa miala ato raha aby io! Aza atao tran̈o fivarotan̈a* eky tran̈on’ny Babako!”
17 Azondrô mpianatranany aby io onon̈o raha voasoratra ty: “Fitiavako* tran̈onao hizelazela mira môtro an̈atin’ny fônaka.”
18 Ke ho irô Jiosy aby io: “Ino famantaran̈a aboakanao zahay, ke mahavy anao masaky man̈ano raha aby io?”
19 Ho Jesosy tamindrô: “Ravàn̈a tempoly ty, fa hatsangako izy ty an̈atin’ny telo andra.”
20 Ke ho irô Jiosy aby io: “Tan̈atin’ny 46 taon̈o kony niasan̈a tempoly ty ay! Ke anao handeha hanangana izy ty an̈atin’ny telo andra?”
21 Kanefa tempoly tiany koran̈iny io vatan̈anany.
22 Ke lera izy natsangana tamy maty, tadidindrô mpianatranany aby io fa efa matetiky izy nivolan̈a raha zen̈y. Ke irô nanjary nino Soratra Masin̈y ndreky raha efa nivolan̈in’i Jesosy.
23 Tamin’izy ta Jerosalema tamy fetin’ny Pasky, maro olo nanjary nino izy* irô koa fa nahita fahagagan̈a aby nataony.
24 Kanefa Jesosy tsy natoky irô, fôtony hainy aby irô jiaby.
25 Izy lastiô tsy nila olo foeky han̈ambara taminany raha tan̈atin’ny jerin’olo, fôtony hainy raha an̈atin’ny fôn’olo.
Lamariky amy Pazy Ambany
^ Abt: “Ino ma ninaka ndreky ninao amy zen̈y, man̈angy?” Izio fomba ivolan̈ana fa izy tsy man̈eky. Tsy raha tsy man̈aja izy eto koa fa nivolan̈a “man̈angy.”
^ Mety ho bata izio. 1 bata = 22 litra.
^ Abt: “famantaran̈a.”
^ Na: “Aza atao bazary.”
^ Abt: “Hafanam-pônaka amy.”
^ Abt: “an̈aran̈anany.”
