Vaovao Tsara Nisoratin’i Jaona 21:1-25
21 Tafaran’izen̈y, Jesosy niboaka ndraiky koa tamindrô mpianatranany aby io, tamy Ranomasin̈in’i Tiberiasy. Karaha ty fomba niboahany:
2 Niaraka tiô Simona Petera, Tomasy (araiky kahian̈a i Amba in̈y), Natanaela baka a Kana a Galilia, irô zanakan’i Zebedio aby io, aviô mpianatranany aroe hafa.
3 Ho Simona Petera tamindrô: “Zaho handeha han̈arato.” Ho irô taminany: “Zahay hiaraka aminao.” Ke lôso irô nanonga tan̈atin’ny sambo, fa irô fo tsisy raha nazondrô foeky tamin’ny alin̈y in̈y.
4 Kanefa, andra mbala vo hibian̈a in̈y, Jesosy nitsangana tamôron-dranomasin̈y tarỳ, fa irô mpianatra aby io tsy tontohitry foeky fa Jesosy io.
5 Ho Jesosy tamindrô: “A zanako aby, anarô tsisy raha* hoanin̈y, tsy zen̈y?” Irô nivolan̈a: “Tsisy ay!”
6 Ho izy tamindrô: “Atsipia amin’ny ilany ankavanan̈an’ny sambo io haratonarô, fa anarô hahazo edy.” Ke izio natsipindrô, kanefa tsy vitandrô nampanonga izio fôtony naro mare laoko nazondrô.
7 Ke ho mpianatra araiky tian’i Jesosy in̈y tamy Petera: “Tômpo io!” Niaraka Simona Petera naharen̈y fa Tômpo io, izy nisikiny* lambanany ambelan̈a fôtony izy tsy amy sikiny,* baka iô izy nipìky tan̈atin’ny ranomasin̈y tao.
8 Fa irô mpianatra hafa aby io ndraiky nandeha tamy sambo hely, sady nan̈antsory harato feno laoko in̈y, fôtony irô tsy lavitry tantety, fa kadiriny 90 metra* tiô fo.
9 Irô koa fa navy tantety, irô nahita môtron’ny sharbon; nisy laoko tan̈abon’izio tiô, aviô môfo.
10 Ho Jesosy tamindrô: “Itondrasa amy laoko vo nazonarô aby in̈y zaho.”
11 Ke Simona Petera nandeha tamy sambo tarỳ, baka iô nantsoritiny tantety harato feno laoko maro maventy mandeha 153 in̈y. Ndray laoko aby io naro mare, harato io tsy natriaka foeky.
12 Ho Jesosy tamindrô: “Mavia anarô hihina hanin̈y maraindrain̈y.” Tsisy tamindrô mpianatra aby io nasaky nan̈ontany izy: “Azôvy ma anao?” fôtony haindrô fa Tômpo izio.
13 Nalain’i Jesosy môfo io aviô namezany irô. Karaha zen̈y koa nataony tamy laoko.
14 Io fan̈intelon’i Jesosy niboaka tamindrô mpianatra aby io tafaran’izy natsangana tamy maty.
15 Irô koa fa baka nihina maraindrain̈y, ho Jesosy tamy Simona Petera: “A Simona zanakan’i Jaona, anao ma tia zaho mandilatra irô raha aby ty?” Ho izy taminany: “Ia, Tômpo, hainao fa zaho rekitry makia aminao.”* Ho izy taminany: “Ampihinàna zanaka ôndrikôndrikinaka.”
16 Ho izy taminany ndraiky koa: “A Simona zanakan’i Jaona, anao ma tia zaho?” Ho izy: “Ia, Tômpo, hainao fa zaho rekitry makia aminao.” Ho Jesosy taminany: “Iambesa* ôndrikôndrikinaka hely aby io.”
17 Ho izy taminany fan̈intelony: “A Simona zanakan’i Jaona, anao ma rekitry makia aminaka?” Nalahelo Petera, Jesosy koa fa nan̈ontany izy fan̈intelony: “Anao ma rekitry makia aminaka?” Ke ho izy taminany: “Tômpo, anao mahay raha jiaby; hainao fa zaho rekitry makia aminao.” Ke ho Jesosy taminany: “Ampihinàna ôndrikôndrikinaka hely aby io.
18 Ankitikitin̈y, ambarako anao marin̈y tsarabe fa, tamin’ny anao mbala tanora, anao tômpiny fo nampisikiny ain̈inao aviô anao nandeha tamy zay tany tianao. Fa lera anao mahaimatoe, anao hamavatra tan̈ananao ke olo hafa hampisikiny anao ndreky hitondra anao amy tany tsy tianao himboan̈a.”
19 Nivolan̈a zen̈y izy misy han̈aboahan̈a fomba hifatesan’i Petera ke han̈amezan’i Petera voninahitry Zan̈ahary. Izy koa fa baka nivolan̈a zen̈y, ho izy tamy Petera: “Man̈araha zaho fo.”
20 Petera nitodiky, ke izy nahita mpianatra araiky tian’i Jesosy in̈y nan̈araka baka tafara. Izio araiky nipetraka narikitry* Jesosy tamin’ny hanin̈y hariva in̈y ndreky nivolan̈a: “Tômpo, azôvy ma hamadiky anao?”
21 Mpianatra io koa fa hitan’i Petera, ho izy tamy Jesosy: “Tômpo, han̈ano akôry fo ma araiky io?”
22 Ho Jesosy taminany: “Izikoa izy tiako hidôko iô firaka zaho mimpody, mampan̈ino anao ma zen̈y? Fa anao man̈araha zaho fo.”
23 Ke nandeha koran̈a tamindrô mpan̈ara-dia Jesosy* aby io fa mpianatra io tsy ho foaty. Kanefa, Jesosy tsy nivolan̈a taminany fa izy tsy ho foaty, fa ho izy: “Izikoa izy tiako hidôko iô firaka zaho mimpody, mampan̈ino anao ma zen̈y?”
24 Io mpianatra nitsangana vavolombelon̈o nan̈ambara momba raha aby zen̈y ndreky nanoratra raha aby zen̈y. Ary hainay fa marin̈y volan̈anany.
25 Mbala misy raha maro hafa koa nataon’i Jesosy, fa izikoa raha aby zen̈y nisoratin̈y tamin’ny an-tsipiriany, fahitako izy, tsy ho tandry donia ty foeky irô horonam-boky voasoratra aby io.
Lamariky amy Pazy Ambany
^ Na: “laoko.”
^ Na: “Tômpo io, nifiheziny tamy vanian̈anany.”
^ Na: “izy an̈arany nisikiny.”
^ Abt: “kadiriny 200 hakiho.”
^ Na: “zaho tia anao.”
^ Na: “Tarita.”
^ Abt: “nandry nandriran̈a narikitry tratran’i.”
^ Abt: “tamindrô rahalahy.”
