Vaovao Tsara Nisoratin’i Jaona 3:1-36
3 Nisy lelahy araiky an̈isan’ny Fariseo, sady mpitondra tamindrô Jiosy aby io. Nikodemosy an̈arany.
2 Izio nandeha tamy Jesosy tan̈y izikoa fa alin̈y, ke ho izy: “Raby, hainay fa anao mpampianatra nirahin’ny Zan̈ahary, fôtony tsisy olo mahavita fahagagan̈a nataonao aby io izikoa tsy raha Zan̈ahary miaraka aminany.”
3 Ke ho Jesosy taminany: “Ankitikitin̈y, ambarako anao marin̈y tsarabe fa, izikoa tsy ateraka ndraiky olo araiky, izy tsy hahita Fanjakan̈an’ny Zan̈ahary.”
4 Ho Nikodemosy taminany: “Akôry eky ataon’ny lelahy efa matoe hateraka ndraiky? Izy ma afaka himpody an̈atin’ny kibon’ny mamany ndraiky ke ho teraka fan̈indroeny?”
5 Ho Jesosy: “Ankitikitin̈y, ambarako anao marin̈y tsarabe fa, izikoa olo araiky tsy teraka baka amy rano ndreky fan̈ahy, izy tsy afaka miditry amy Fanjakan̈an’ny Zan̈ahary.
6 Nôfotro raha teraka baka amy nôfotro, aviô fan̈ahy raha teraka baka amy fan̈ahy.
7 Aza gaga izikoa zaho nivolan̈a taminao: Anarô tsy maintsy hateraka ndraiky.
8 Tsiko mitsoko amy zay tany tiany, aviô ren̈inao feon’izio, fa izio fo tsy hainao baka aia na han̈aia. Karaha zen̈y koa olo teraka baka amy fan̈ahy.”
9 Ke ho Nikodemosy taminany: “Akôry eky hampapôsibla raha zen̈y?”
10 Ho Jesosy: “Anao mpampianatra amin’Israely kanefa tsy hainao raha aby zen̈y?
11 Ankitikitin̈y, ambarako anao marin̈y tsarabe fa, raha hainay volan̈inay baka iô raha hitanay ambaranay, fa anarô tsy nan̈eky raha nambaranay.
12 Izikoa momba raha ambony tany eto raha nikoran̈iko taminarô kanefa anarô mbala tsy mino fo, akôry ataonarô hino izikoa zaho mikoran̈a aminarô momba raha an-dan̈itry an̈y?
13 Aviô koa, tsisy olo nanonga tan-dan̈itry izikoa tsy araiky nijotso baka tan̈y, tsy azôvy zen̈y fa Zanak’olo.
14 Karaha nataon’i Mosesy nan̈anton̈o* bibilava araiky tamy tany paiky tan̈y in̈y, Zanak’olo koa tsy maintsy ahanton̈o,*
15 amy zen̈y zay olo mino izy hahazo fiainan̈a tsisy farany.
16 “Fôtony be ankitin̈y fitiavan’ny Zan̈ahary donia ty, ke namezany zanakanany lahitaokan̈a, amy zen̈y zay olo man̈aboaka fa mino izy tsy ho ripaka fa hahazo fiainan̈a tsisy farany.
17 Fôtony Zan̈ahary tsy nan̈iraka Zanany amy donia ty baka hitsara donia ty, fa baka donia ty ho avotro baka aminany.
18 Lan̈iany olo man̈aboaka fa mino izy tsy hitsarain̈a. Lan̈iany olo tsy man̈aboaka fa mino izy efa nitsarain̈a, fôtony izy tsy nan̈aboaka fa izy mino an̈aran̈an’ny Zanaka lahitaokan̈an’ny Zan̈ahary.
19 Ty antony itsaran̈a olo: Hazavan̈a navy tamy donia ty, kanefa hiziky ny tian’olo tozay hazavan̈a, fôtony raha ataondrô* tsy manjary.
20 Fôtony hazavan̈a io halan’ny zay olo man̈ano raha tsy manjary aviô izy tsy man̈aton̈o izio, amy zen̈y raha ataony tsy hibolain̈y.
21 Fa lan̈iany olo man̈ano ny marin̈y man̈aton̈o hazavan̈a, baka ho hita fa mifan̈araka amy sitrapôn’ny Zan̈ahary raha ataony.”
22 Tafaran’izen̈y, Jesosy ndreky irô mpianatranany aby io nandeha tambanivolon’i Jodia. Izy nidôkodôko tan̈y hely niaraka tamindrô ndreky nan̈ano batisa.
23 Kanefa Jaona koa mba nan̈ano batisa ta Ainona narikitry Saleima, fôtony tao nisy rano be. Ke nisy olo fo navy taminany tiô handeha hatao batisa.
24 Jaona tamy zen̈y mbala tsy nigadrain̈a.
25 Irô mpianatran’i Jaona aby io niady hevitry tamy Jiosy araiky momba fanasan̈a ain̈y.
26 Irô baka tiô nandeha tamy Jaona tan̈y, ke ho irô taminany: “Raby, hitanao lelahy araiky niaraka taminao tandaforehin’ny Ten̈aranon’i Jordany in̈y, araiky nikoran̈inao taminay in̈y, izy kony man̈ano batisa ay! Olo jiaby mandeha aminany an̈y.”
27 Ke ho Jaona: “Tsisy raha azon’olo araiky izikoa izio tsy raha namezan̈a izy baka an-dan̈itry.
28 Anarô lastiô vavolombelon̈o tamy zaho nivolan̈a: ‘Zaho tsy Kristy, fa zaho nirahin̈y handeha alohanany.’
29 Fa zay olo manan̈a olo hingain̈a, izy mpan̈ainga. Fa kamaradin’ny mpan̈ainga io koa fa mitsangana ke maharen̈y izy mivolan̈a, ravoravo mare izy maharen̈y feon’ny mpan̈ainga io. Ke haravoan̈anaka iziô efa feno.
30 Asanany* tsy maintsy mitombo, fa ninaka* ndraiky tsy maintsy mihen̈y.”
31 Araiky baka an̈abo an̈abon̈abon’olo jiaby. Fa araiky baka ambony tany ndraiky mikoran̈a raha ambony tany fôtony izy baka ambony tany. Araiky baka an-dan̈itry an̈abon̈abon’olo jiaby.
32 Izy man̈ambara raha hitany ndreky ren̈iny, kanefa tsisy olo man̈eky raha ambarany.
33 Lan̈iany olo nan̈eky raha nambarany, mankamafy* fa Zan̈ahary io marin̈y.
34 Fôtony araiky nirahin’ny Zan̈ahary man̈ambara volan̈an’ny Zan̈ahary. Izy baka tsy matity* izikoa fa man̈amia fan̈ahinany.
35 Baba tia Zanaka ke namezany izy tam-pelatan̈ananany raha jiaby.
36 Zay olo man̈aboaka fa mino Zanaka hahazo fiainan̈a tsisy farany. Fa zay olo tsy man̈araka volan̈an’ny Zanaka ndraiky tsy hahazo fiainan̈a aviô tsy hiala aminany foeky helokon’ny Zan̈ahary.
Lamariky amy Pazy Ambany
^ Abt: “nampanonga.”
^ Abt: “ampanongain̈a.”
^ Na: “asandrô.”
^ Abt: “Izy.”
^ Abt: “zaho.”
^ Abt: “nan̈isy tombon-kase.”
^ Na: “tsy man̈isy limitiny.”
