Vaovao Tsara Nisoratin’i Jaona 4:1-54
4 Izikoa fa hain’ny Tômpo fa ren̈indrô Fariseo aby io fa mbala maromaron’ny mpianatra azon’i Jaona mpianatra azon’i Jesosy ndreky nataony batisa—
2 ndray tsy Jesosy tômpin’ain̈y aby izy nan̈ano batisa io fa irô mpianatranany aby io—,
3 niala ta Jodia izy baka iô nimpody nandeha ta Galilia ndraiky.
4 Kanefa izy tsy maintsy nandalo ta Samaria.
5 Ke izy navy ta Sykara, tanàna araiky ta Samaria, narikitry tany namezan’i Jakoba i Josefa zanany.
6 Tao tany nisy vôvon’i Jakoba. Jesosy kajon’ny dia ke izy nipetraka tamy vôvo* io tiô. Kadiriny midỳ* tamy zen̈y.
7 Nisy man̈angy baka a Samaria navy hantsaka rano. Ho Jesosy taminany: “Ameza rano kony zaho higiahako.”
8 (Irô mpianatranany aby io nandeha tan-tanàna tan̈y nivanga hanin̈y.)
9 Ke ho man̈angy samaritanin̈y io taminany: “Anao Jiosy, ke nan̈ino anao mangataka rano aminaka kanefa zaho man̈angy samaritanin̈y?” (Jiosy baka tsy nifandray tamy Samaritanin̈y.)
10 Ho Jesosy taminany: “Izikoa mba hainao edy kadô tsy vangaim-bola baka amy Zan̈ahary, aviô azôvy olo mivolan̈a aminao: ‘Ameza rano kony zaho higiahako’, anao edy ny nangataka rano taminany, ke anao namiany rano velon̈o.”
11 Ho man̈angy io taminany: “Tômpo, ndray anao tsisy trobakam-bôvo ke, aviô vôvo io lalin̈y. Ke baka aia fo anan̈anao rano velon̈o zen̈y?
12 Anao ma bebe tozay Jakoba dadilahibenay, araiky nan̈amia zahay vôvo ty, sady izy ndreky ry zanany baka iô biby nitarimìny aby io lastiô nigiaka teto?”
13 Ho Jesosy taminany: “Zay olo migiaka amy rano ty mbala himpody tihigiaka ndraiky.
14 Fa lan̈iany olo migiaka rano hamiako izy ndraiky tsy ho sakara eky. Fa rano hamiako izy io hanjary karaha loharano miboiboiky an̈atin’ny fônany ao, ke han̈amia izy fiainan̈a tsisy farany.”
15 Ho man̈angy io taminany: “Tômpo, an̈ameza amy rano zen̈y kony zaho, amy zen̈y zaho efa tsy ho sakara eky aviô efa tsy himpodimpody hantsaka eto eky.”
16 Ho izy taminany: “Mindao kahia vadinao, baka iô mavia atỳ anarô.”
17 Ho man̈angy io: “Zaho tsy manambady.” Ho Jesosy taminany: “Marin̈y anao koa nivolan̈a: ‘Zaho tsy manambady.’
18 Fôtony anao efa nanan̈a vady dimy, aviô tsy vadinao lelahy miaraka mipetraka aminao ao ziô. Marin̈y ankitin̈y raha nivolan̈inao.”
19 Ho man̈angy io taminany: “Tômpo, mpaminan̈y ankitin̈y anao.
20 Irô dadilahibenay aby io nivavaka tan̈abon’ny bongo ty, fa anarô ndraiky mivolan̈a fa a Jerosalema an̈y olo tôkony hivavaka.”
21 Ho Jesosy taminany: “A man̈angy, anao minoa zaho fa ho avy lera, sady tsy amy bongo ty na a Jerosalema an̈y tany hivavahanarô amy Baba.
22 Anarô mivavaka amy raha tsy hainarô, fa zahay mivavaka amy raha hainay, fôtony famonjian̈a io manomboko* amy Jiosy.
23 Ndray zen̈y, ho avy lera, ary efa ziôty raha zen̈y, olo ten̈a mpivavaka hivavaka amy* Baba erakan’ny fan̈ahy ndreky fahamarin̈ana, fôtony olo karaha zen̈y tsarabe tadiavin’ny Baba hivavaka aminany.*
24 Zan̈ahary io Fan̈ahy, ke zay olo mivavaka aminany tsy maintsy mivavaka erakan’ny fan̈ahy ndreky fahamarin̈ana.”
25 Ho man̈angy io taminany: “Haiko fa ho avy Mesia, araiky kahian̈a Kristy. Ke lera izy avy, hazavainy amintsika tsarabe raha jiaby.”
26 Ho Jesosy taminany: “Zaho mikoran̈a aminao io izy.”
27 Tamy zen̈y navy irô mpianatranany aby io, ke irô gaga fôtony izy nikoran̈a tamy man̈angy. Fa irô fo tsisy nivolan̈a: “Ino ma raha tadiavinao?” na: “Nan̈ino ma anao mikoran̈a aminany?”
28 Nambelan’ny man̈angy io tiô sajoanany, aviô lôso izy nandeha tan-tanàna tan̈y ke ho izy tamin’olo:
29 “Mavia baka anarô fa misy lelahy zay ao nivolan̈a taminaka raha jiaby nataoko. Mety izy donko Kristy ay!”
30 Ke irô niboaka tambelan̈an’ny tanàna io, baka iô lôso irô nandeha taminany tan̈y.
31 Tan̈atin’ny fotoan̈a zen̈y, namango irô mpianatra aby io nandrisiky izy karaha ty: “A Raby, anao mihinàna.”
32 Kanefa ho izy tamindrô: “Zaho misy hanin̈y hoanin̈y fa tsy hainarô fo.”
33 Ke irô mpianatra aby io nifampikoran̈a karaha ty: “Izy tiô ma nitondrasan’olo raha hoanin̈y?”
34 Ke ho Jesosy tamindrô: “Hanin̈inaka man̈ano sitrapôn’ny Araiky nan̈iraka zaho ndreky mankefa asanany.
35 Anarô mivolan̈a fa mbala misy efatra fanjava vo avy fotoan̈a fangalan̈a vokatra, tsy zen̈y? Fa ho zaho aminarô: Zahava baka vilo aby io! Efa masaka vokatra ke efa mila alain̈a. Efa
36 sakavy nahazo karama mpangala vokatra sady efa mamory vokatra nin’ny fiainan̈a tsisy farany, amy zen̈y mpamafy ndreky mpangala vokatra hiaraka hiravoravo.
37 Marin̈y edy basy fomba fivolan̈ana ty: Olo araiky mpamafy, fa araiky hafa mpangala vokatra.
38 Zaho man̈iraka anarô hangala vokatran’ny raha tsy nandanianarô angôvo. Olo hafa niasa mare, fa anarô nahazo hatsaran̈a baka tamin’ny asa mare nataondrô.”
39 Naro tamy Samaritanin̈y baka tamy tanàna io nanjary nino izy fôtony man̈angy in̈y nitsangana vavolombelon̈o ke nivolan̈a: “Izy nivolan̈a taminaka raha jiaby nataoko.”
40 Irô Samaritanin̈y aby io koa fa navy taminany tiô, irô nangataka izy hidôko hiaraka amindrô. Ke izy nidôko tao andra aroe.
41 Vokatran’izen̈y, nahainaro fo olo nino baka tamy raha nivolan̈iny.
42 Ke ho irô tamy man̈angy in̈y: “Efa tsy baka tamy raha nivolan̈inao in̈y fo eky iziô mahavy zahay mino, fôtony zahay tômpin’ny ain̈y foeky naharen̈y, ke hainay fa lelahy io ankitin̈y mpamonjy donia ty.”
43 Tafaran’ny andra aroe aby in̈y, izy niala tao ke nandeha ta Galilia.
44 Kanefa Jesosy lastiô efa nan̈ambara fa mpaminan̈y tsy hajain̈a amy tany faviany.
45 Izy koa fa navy ta Galilia, irô Galilianin̈y aby io nandray izy fôtony irô nahita raha jiaby nataony ta Jerosalema tamy fety; irô koa baka mba tamy fety in̈y tan̈y.
46 Navy ta Kana ta Galilia tan̈y ndraiky koa izy. Tan̈y izy nan̈aova rano hanjary divain in̈y. Nisy manam-pahifan̈a niasa tamy lapan’ny mpanjaka zay nanan̈a zanaka narary ta Kapernaomy.
47 Izikoa fa ren̈in’ny lelahy io fa Jesosy niala ta Jodia baka iô navy ta Galilia, izy nandeha taminany tan̈y nangataka izy ho avy ke hampajanga zanakanany, fôtony izio efa ho foaty.
48 Fa ho Jesosy taminany: “Anarô koa tsy mahita famantaran̈a ndreky fahagagan̈a, anarô tsy mety hino.”
49 Manam-pahifan̈a io nivolan̈a taminany: “Tômpo, mavia kony diany zanako mbala tsy maty e!”
50 Ho Jesosy taminany: “Mindao fa velon̈o zanakanao.” Lelahy io nino raha nivolan̈in’i Jesosy, ke lôso izy nandeha.
51 Tamin’izy mbala tan-dalan̈a hody, irô mpanomponany aby io nitsena izy ke nivolan̈a taminany fa zanakanany velon̈o.*
52 Ke nan̈ontaniany irô tamy kelera zanany io nahaitsara. Ho irô taminany: “Nomoaly kadiriny inera tiô* lafievranany* nafaka.”
53 Hain’ny baban’ny tsaiky io fa tamy lera zen̈y tsarabe Jesosy nivolan̈a taminany: “Velon̈o zanakanao.” Ke izy ndreky olo jiaby tran̈o araiky taminany tao nino.
54 Zen̈y fahagagan̈a faharoe nataon’i Jesosy tamin’izy niala ta Jodia ke navy ta Galilia.
Lamariky amy Pazy Ambany
^ Na: “fantsakan̈a; lohatany.”
^ Abt: “tamy lera fahatsiota.”
^ Na: “baka.”
^ Na: “hanompo.”
^ Na: “hanompo izy.”
^ Na: “nahaitsara.”
^ Abt: “Nomoaly tamy lera fahafito.”
^ Na: “tazon̈onany.”
