Vaovao Tsara Nisoratin’i Jaona 5:1-47
5 Tafaran’izen̈y nisy fetindrô Jiosy aby io, ke Jesosy nanonga ta Jerosalema.
2 Ta Jerosalema tao, narikitry Barôn’ôndrikôndriky, nisy lapisìny kahian̈a amy volan̈a hebreo: Betizata.* Izio nisy lalan̈a dimy misy tafony.
3 Feno olo marary, gila, malemy vity, ndreky misy antsa* nidôko tamy lalan̈a misy tafony aby io.
4 ——
5 Tao nisy lelahy zay efa narary tan̈atin’ny 38 taon̈o.
6 Hitan’i Jesosy lelahy io nandrinandry tiô sady hainy koa fa efa ela izio narary, ke ho izy taminany: “Anao ma tiho janga?”
7 Ho lelahy marary io: “A tômpoko anao, zaho tsisy olo man̈ampy zaho hiditry amy lapisìny io lera rano mihetsiky. Ke egy zaho handeha ao in̈y, misy olo hafa mijotso ao alohanaka.”
8 Ho Jesosy taminany: “Mitsangàna, batay fandrian̈anao baka iô mandihana.”
9 Ke tiô ny iô lelahy io janga. Nalainy fandrian̈anany aviô izy nanomboko nandeha.
Andra tamy zen̈y Sabata.
10 Ke ho irô Jiosy aby io tamy lelahy janga io: “Niany Sabata, ke anao tsy mahazo mitondra fandrian̈a io.”
11 Kanefa ho izy tamindrô: “Lelahy nampajanga zaho fo kony nivolan̈a taminaka: ‘Batay fandrian̈anao baka iô mandihana’ ay!”
12 Ke irô nan̈ontany izy: “Azôvy lelahy nivolan̈a taminao: ‘Batay fandrian̈anao baka iô mandihana’?”
13 Kanefa tsy hain’ny lelahy janga io foeky azôvy olo nampajanga izy, fôtony Jesosy efa lôso namakivaky tan̈atin’ny vahoaka tan̈y.
14 Tafaran’izen̈y, hitan’i Jesosy tamy tempoly tao izy ke ho izy taminany: “Anao ziô efa janga. Aza manota eky tsao ho hisy raha ratsiratsin’in̈y havoa anao.”
15 Lôso lelahy io, aviô nivolan̈iny tamindrô Jiosy aby io fa Jesosy nampajanga izy.
16 Zen̈y nahavy irô Jiosy aby io nan̈enjiky Jesosy, fôtony izy nan̈ano raha aby zen̈y tamy Sabata.
17 Fa ho izy tamindrô: “Babako tsy vôly miasa firaka ziô, ke zaho koa tsy vôly miasa.”
18 Zen̈y nahavy irô Jiosy aby io nahaitihamono izy fo, fôtony irô nihevitry fa izy tsy nitandrin̈y Sabata ndreky nan̈ano ain̈inany mitovy amy Zan̈ahary, fôtony izy nikaiky Zan̈ahary io Babany.
19 Baka iô ho Jesosy tamindrô: “Ankitikitin̈y, ambarako anarô marin̈y tsarabe fa, Zanaka tsy man̈ano zay raha tiany fo, fa zay raha hitany ataon’ny Baba fo ataony. Fôtony zay raha ataon’ny Baba, karaha zen̈y koa ataon’ny Zanaka, sady ataony tsisy ny hafa amin’ny an̈anaovan’ny Baba izy.
20 Fôtony Baba tia Zanaka ke aboakany izy raha jiaby ataony, aviô izy mbala han̈aboahany asa maventiventin’izen̈y, amy zen̈y anarô ho lany fan̈ahy.
21 Karaha ataon’ny Baba manangana olo maty ke mamelon̈o irô ndraiky, karaha zen̈y koa ataon’ny Zanaka mamelon̈o zay olo tiany hatsangana.
22 Fôtony Baba tsy mitsara olo foeky, fa nankin̈iny amy Zanaka fitsaran̈a jiaby.
23 Amy zen̈y olo jiaby han̈amia voninahitry Zanaka karaha ataondrô man̈amia voninahitry Baba. Lan̈iany olo tsy man̈amia voninahitry Zanaka, tsy man̈amia voninahitry Baba nan̈iraka izy.
24 Ankitikitin̈y, ambarako anarô marin̈y tsarabe fa, lan̈iany olo maharen̈y volan̈anaka ndreky mino Araiky nan̈iraka zaho hahazo fiainan̈a tsisy farany. Izy tsy hitsarain̈a fôtony izy karaha olo efa naty fa nimpody velon̈o ndraiky.
25 “Ankitikitin̈y, ambarako anarô marin̈y tsarabe fa, ho avy lera, ary efa ziôty raha zen̈y, irô olo maty aby io haharen̈y feon’ny Zanakan’ny Zan̈ahary, ke lan̈iany mitandren̈y ho velon̈o.
26 Karaha ataon’ny Baba manan̈a angôvo man̈amia fiainan̈a,* Zanaka koa namezany angôvo han̈amia fiainan̈a.
27 Izy namezany fahifan̈a hitsara, fôtony izy Zanak’olo.
28 Ke anarô aza lany fan̈ahy amy raha zen̈y, fôtony ho avy lera harin̈esandrô jiaby am-pasan̈a an̈y feonany,
29 ke irô hiboaka. Lan̈iany nan̈ano ny tsara hatsangana baka hahazo fiainan̈a, fa lan̈iany zatra nan̈ano raha ratsy ndraiky hatsangana baka hitsarain̈a.
30 Zaho tsy afaka man̈ano zay raha tiako fo. Zaho mitsara erakan’ny raha ren̈iko, aviô zaho koa fa mitsara, zaho mitsara erakan’ny rariny, fôtony tsy sitrapônaka ny tiako hatao fa sitrapôn’ny Araiky nan̈iraka zaho.
31 “Izikoa zaho zaraiky mitsangana vavolombelon̈o man̈ambara momba ain̈inaka, tsy marin̈y raha volan̈iko.
32 Fa misy olo hafa mitsangana vavolombelon̈o man̈ambara momba zaho, ary haiko tsarabe fa marin̈y raha volan̈iny momba zaho.
33 Anarô nandefa olo tamy Jaona tan̈y, ke izy nivolan̈a ny marin̈y.
34 Kanefa zaho tsy mitavandra volan̈an’olo, fa zaho ndraiky mivolan̈a raha aby zen̈y baka anarô ho avotro.
35 Izy* lalampon̈o nirehitry ndreky nangilangilatra, aviô tan̈atin’ny fotoan̈a fôhiky anarô vôn̈ono hiravoravo mare tamin’ny hazavan̈anany.
36 Zaho manan̈a porofo maventiventin’ny lay namezan’i Jaona, fôtony asa nan̈irahan’ny Babako zaho lastiô izy ataoko io, baka iô asa ataoko aby zen̈y man̈aporofo fa zaho irakan’ny Baba.
37 Baba nan̈iraka zaho lastiô nan̈amia porofo momba zaho. Anarô tsiary naharen̈y feonany na nahita saoranany,*
38 aviô volan̈anany tsy nidôko an̈atin’ny fônarô, fôtony anarô tsy nino araiky nirahiny.
39 “Anarô mitsakaraka raha an̈atin’ny Soratra Masin̈y ao fôtony anarô mieritreritry fa baka amy zio hazahoanarô fiainan̈a tsisy farany; ary izio* edy ny man̈amia porofo momba zaho.
40 Kanefa anarô tsy mba tihan̈aton̈o zaho misy hazahoanarô fiainan̈a.
41 Zaho tsy man̈eky voninahitry baka amin’olombelon̈o.
42 Kanefa haiko tsarabe fa anarô tsisy fitiavan̈a Zan̈ahary an̈atin’ny fônarô ao.
43 Zaho navy tamin’ny an̈aran̈an’ny Babako, kanefa anarô tsy nandray zaho. Fa izikoa iziô misy olo avy amin’ny an̈aran̈anany tômpiny, izy ndraiky raisinarô.
44 Akôry ataonarô hino, kanefa voninahitry baka aminarô samby anarô fo ikenarô fa anarô tsy mitady voninahitry baka amy Zan̈ahary?
45 Anarô aza mieritreritry fa zaho handeha han̈ampanga anarô amy Baba. Misy olo araiky zay han̈ampanga anarô; izio Mosesy, araiky nantin̈ainarô in̈y.
46 Izikoa anarô nino Mosesy, anarô tôkony nino zaho, fôtony izy nanoratra momba zaho.
47 Kanefa izikoa anarô tsy mino raha nisoratiny, akôry hinoanarô raha volan̈iko?”
Lamariky amy Pazy Ambany
^ Na: ”Betesda.”
^ Na: “malemy tan̈ana na vity.”
^ Na: “manan̈a fiainan̈a an̈atinany ao.”
^ Abt: “Lelahy zen̈y.”
^ Na: “endrikinany.”
^ Izio Soratra Masin̈y.
