Vaovao Tsara Nisoratin’i Jaona 6:1-71
6 Tafaran’izen̈y, Jesosy nitsaka Ranomasin̈in’i Galilia, na Ranomasin̈in’i Tiberiasy.
2 Ke nisy vahoaka maro tsy vôly nan̈araka izy, fôtony irô nahita fahagagan̈a maro nataony, tamin’izy nampajanga olo marary.
3 Ke Jesosy nanonga tamy bongo, aviô izy nipetraka tiô niaraka tamy mpianatranany.
4 Pasky tamy zen̈y efa narikitry, tsy ino izio fa fetindrô Jiosy aby io.
5 Jesosy koa fa nanôpy masonany ke nahita vahoaka marobe navy han̈aton̈o izy, ho izy tamy Filipo: “Aia eky tany handeha hivangantsika môfo handeha hoanindrô vahoaka aby ty?”
6 Kanefa, izy raha tihitsapa jery Filipo fo fa, efa hainy raha handeha hataony.
7 Ho Filipo taminany: “Atsika ndray hivanga môfo valeran’ny 200 denaria, zen̈y tsy mety hahampy olo jiaby io, nata samby mahazo helihely.”
8 Araiky tamindrô mpianatranany aby io, tsy azôvy zen̈y fa i Andrea rahalahin’i Simona Petera, nivolan̈a taminany:
9 “Ty misy tsaiky lelahy misy môfo dimy ndreky laoko aroe. Kanefa ino ma raha vitan’izen̈y amin’olo marobe ty?”
10 Ho Jesosy: “Iraha mipetraka irô olo aby io.” Feno bozaka baka tamy plasy io, ke irô lelahy aby io nipetraka tiô; kadiriny 5 000 tiô irô.
11 Nalain’i Jesosy môfo aby io; izy koa fa baka nivavaka,* izio nirasainy tamindrô olo nipetraka tiô. Nataony karaha zen̈y koa laoko hely aby in̈y, ke kila olo nihinan̈a zay laniny.
12 Irô koa fa voky, ho izy tamy mpianatranany: “Avoria zay lambilambiny tavela amy zen̈y tsisy hanin̈y verivery.”
13 Navorindrô irô io, ke lambilambiny tsy lanindrô olo aby nihinan̈a tamy môfo dimy in̈y nahafeno tanty 12.
14 Irô olo aby io koa fa nahita fahagagan̈a* nataony, ho irô: “Io ankitin̈y Mpaminan̈y ho avy amy donia ty zen̈y.”
15 Izikoa fa hain’i Jesosy fa irô ho avy hanambotro izy ke han̈ano izy mpanjaka, izy niala tiô ke nimpody nandeha tamy bongo tan̈y ndraiky izy zaraiky.
16 Andra koa fa hariva, irô mpianatranany aby io nandeha nijotso tan-dranomasin̈y,
17 ke irô nanonga tan̈atin’ny sambo, baka iô irô nitsaka ranomasin̈y handeha a Kapernaomy. Efa nahiziky andra, kanefa Jesosy mbala tsendriky navy tamindrô tiô.
18 Nihetsiky mare koa ranomasin̈y fôtony naresaka tsiko.
19 Kanefa irô koa fa nivehy kadiriny dimy na tsiota kilômetra,* irô nahita Jesosy nandeha tan̈abon’ny ranomasin̈y sady nan̈aton̈o sambo io. Ke irô navozo.
20 Kanefa ho izy tamindrô: “Zaho fo ty; anarô aza mavozo.”
21 Ke ravoravo irô nampanonga izy tan̈atin’ny sambo io tao, aviô betibetiky fo sambo io navy tamy tany tiandro himboan̈a.
22 Amarain’izin̈y, tontohitry irô vahoaka nidôko tandaforehin’ny ranomasin̈y io fa tsisy sambo tiô. Nisy sambo hely zay ndraiky tiô fa, izio efa niondran̈an’ny mpianatran’i Jesosy, fa Jesosy fo tsy niaraka tamindrô.
23 Kanefa nisy sambo baka a Tiberiasy aby zay navy narikitry plasy nihinanandrô môfo tafaran’ny Tômpo nan̈ano vavaka fisaoran̈a in̈y.
24 Izikoa fa hitandrô vahoaka aby io fa tsisy tiô na Jesosy na irô mpianatranany aby io, irô niondran̈a tamindrô sambo aby io, baka iô lôso irô nandeha nitsakaraka Jesosy ta Kapernaomy tan̈y.
25 Irô koa fa nahita izy tandaforehin’ny ranomasin̈y, ho irô taminany: “Raby, ombian̈a eky navianao teto?”
26 Ho Jesosy tamindrô: “Ankitikitin̈y, ambarako anarô marin̈y tsarabe fa, tsy baka amin’ny anarô nahita fahagagan̈a antony itsakarehanarô zaho, fa baka amin’ny anarô nihinan̈a môfo ke voky.
27 Miasà, tsy baka hazahoan̈a hanin̈y mety robaka, fa baka hazahoan̈a hanin̈y maharitry ke hazahoan̈a fiainan̈a tsisy farany, tsy ino zen̈y fa hanin̈y hamezan’ny Zanak’olo anarô. Baba Zan̈ahary lastiô nan̈isy tombon-kase izy fôtony izy ankasitrahiny.”
28 Ke ho irô taminany: “Ino raha tsy maintsy ataonay misy hahavitanay man̈ano asan’ny Zan̈ahary?”
29 Ke ty raha nambaran’i Jesosy irô: “Anarô man̈ano asan’ny Zan̈ahary izikoa anarô man̈aboaka fa anarô mino araiky nirahiny.”
30 Ho irô taminany: “Ino basy fahagagan̈a ataonao misy ahitanay izio ke inoanay anao? Ino asa ataonao?
31 Irô dadilahibentsika aby io nihina mana tamy tany paiky tan̈y, karaha efa voasoratra: ‘Irô namezany môfo baka an-dan̈itry nihoanindrô.’”
32 Ho Jesosy tamindrô: “Ankitikitin̈y, ambarako anarô marin̈y tsarabe fa, Mosesy tsy nan̈amia anarô môfo baka an-dan̈itry, fa Babako ndraiky man̈amia anarô ny ten̈a môfo baka an-dan̈itry.
33 Fôtony araiky mijotso baka an-dan̈itry ndreky man̈amia fiainan̈a donia ty, izy môfon’ny Zan̈ahary.”
34 Ke ho irô taminany: “A Tômpo, ameza môfo zen̈y fo zahay.”
35 Ho Jesosy tamindrô: “Zaho môfon’ny fiainan̈a. Lan̈iany olo man̈aton̈o zaho efa tsy ho mosary eky, aviô lan̈iany olo man̈aboaka fa mino zaho efa tsisy andra hampasakara izy eky.
36 Kanefa eraka raha nivolan̈iko taminarô in̈y, anarô ndray nahita zaho, anarô tsy mino zaho.
37 Han̈aton̈o zaho aby zay olo amezan’ny Baba zaho. Aviô zay olo man̈aton̈o zaho tsy hitoravako foeky;
38 fôtony tsy han̈ano sitrapônaka antony nijotsoako baka tan-dan̈itry, fa han̈ano sitrapôn’ny Araiky nan̈iraka zaho.
39 Ty sitrapôn’ny Araiky nan̈iraka zaho: Tsy tôkony hambelako hisy ho very foeky irô olo namezany zaho aby io, fa tôkony hatsangako amy maty amin’ny andra farany.
40 Fôtony ty sitrapôn’ny Babako: Zay olo man̈eky Zanaka ke man̈aboaka fa mino izy hahazo fiainan̈a tsisy farany, aviô zaho hanangana izy amy maty amin’ny andra farany.”
41 Ke irô Jiosy aby io nanomboko nin̈on̈on̈o fôtony izy nivolan̈a: “Zaho môfo nijotso baka an-dan̈itry.”
42 Ke irô nivolan̈a: “Tsy io ma Jesosy zanakan’i Josefa in̈y? Haintsika kony baban’izio ndreky renin’izio ay! Ke nan̈ino fo basy izy ziôty mivolan̈a: ‘Zaho nijotso baka an-dan̈itry’?”
43 Ho Jesosy tamindrô: “Anarô mivoleza min̈on̈on̈o.
44 Tsisy olo afaka man̈aton̈o zaho izikoa tsy tahômin’ny Baba araiky nan̈iraka zaho. Aviô zaho hanangana izy amy maty amin’ny andra farany.
45 Ty raha nisoratindrô Mpaminan̈y aby io:* ‘Irô jiaby hampianarin’i Jehovah.’ Zay olo nitandren̈y Baba ke nianatra taminany, man̈aton̈o zaho.
46 Tsisy olo nahita Baba izikoa tsy araiky baka tamy Zan̈ahary; izy nahita Baba.
47 Ankitikitin̈y, ambarako anarô marin̈y tsarabe fa, lan̈iany olo mino hahazo fiainan̈a tsisy farany.
48 “Zaho môfon’ny fiainan̈a.
49 Irô dadilahibenarô aby io nihina mana tamy tany paiky tan̈y, kanefa irô mbala naty fo.
50 Ty ndraiky môfo nijotso baka an-dan̈itry amy zen̈y olo jiaby afaka hihina aminany ty, ke tsy ho foaty.
51 Zaho môfo velon̈o nijotso baka an-dan̈itry. Izikoa misy olo mihina amy môfo ty, izy ho velon̈o mandrakizay. Aviô ain̈inaka izy môfo handeha hamezako io, amy zen̈y donia ty hahazo fiainan̈a.”
52 Ke irô Jiosy aby io nanomboko niady hevitry karaha ty: “Akôry ma ataon’ny lelahy io han̈amia nôfotronany hihoanintsika?”
53 Ke ho Jesosy tamindrô: “Ankitikitin̈y, ambarako anarô marin̈y tsarabe fa, anarô koa tsy mihina nôfotron’ny Zanak’olo ndreky migiaka lionany, anarô tsy hahazo fiainan̈a.*
54 Zay olo mihina nôfotronaka ndreky migiaka lionaka hahazo fiainan̈a tsisy farany, aviô zaho hanangana izy amy maty amin’ny andra farany;
55 fôtony nôfotronaka ny ten̈a hanin̈y baka iô lionaka ny ten̈a figiahan̈a.
56 Lan̈iany olo mihina nôfotronaka ndreky migiaka lionaka tafikamban̈a aminaka fo, aviô zaho tafikamban̈a aminany.
57 Velon̈o Baba nan̈iraka zaho, aviô baka aminany mahavy zaho velon̈o. Ary karaha zen̈y koa fa lan̈iany olo mihina zaho, ho velon̈o baka aminaka.
58 Ty môfo nijotso baka an-dan̈itry. Izy ty tsy karaha araiky nihoanindrô dadilahibenarô aby in̈y, fôtony irô mbala naty fo. Lan̈iany olo mihina môfo ty ho velon̈o mandrakizay.”
59 Izy nivolan̈a raha aby zen̈y tamin’izy nampianatra tamy synagoga araiky* ta Kapernaomy.
60 Irô koa fa naharen̈y zen̈y, maro tamindrô mpianatranany aby io nivolan̈a: “Volan̈a zen̈y ma mba fitandrin̈esan̈a! Azôvy ma mahavita mitandren̈y zen̈y?”
61 Kanefa hain’i Jesosy tan̈atin’ny jerinany tan̈y fa irô mpianatranany aby io nin̈on̈on̈o momba raha zen̈y, ke ho izy tamindrô: “Mampihozongozon̈o finoan̈anarô ma raha zen̈y?
62 Karakôry eky anarô koa mahita Zanak’olo manonga amy tany nisy izy taloha?
63 Fan̈ahy man̈amia fiainan̈a, fa nôfotro tsisy raha ilàn̈a izy. Raha nivolan̈iko taminarô aby in̈y baka amy fan̈ahy sady man̈amia fiainan̈a.
64 Kanefa misy aminarô io tsy mino.” Efa hain’i Jesosy rango tamy voanalohany baka azôvy amindrô io ny tsy mino, aviô azôvy araiky hamadiky izy.
65 Baka iô koa ho izy: “Zen̈y antony nahavy zaho nivolan̈a taminarô: Tsisy olo afaka man̈aton̈o zaho izikoa tsy Baba nan̈amia lalan̈a izy.”
66 Ke naro tamy mpianatranany aby io nimpody afara, aviô irô efa tsy nan̈araka izy eky.
67 Ke ty ho Jesosy tamindrô 12 Lahy: “Anarô koa ma mba tihandeha?”
68 Ho Simona Petera taminany: “Tômpo, handeha amin-jôvy ma zahay? Volan̈anao hazahoan̈a fiainan̈a tsisy farany.
69 Zahay mino sady hainay koa fa anao Araiky Masin̈in’ny Zan̈ahary.”
70 Ho Jesosy tamindrô: “Zaho nifidy anarô 12 Lahy, tsy zen̈y? Kanefa araiky aminarô io mpan̈odihody raha tsy ataon’olo.”*
71 Jodasy zanakan’i Simona Iskariota izy tiany koran̈iny io, fôtony izio handeha hamadiky izy kanefa izio an̈isan’ny 12 Lahy.
Lamariky amy Pazy Ambany
^ Na: “nan̈ano mersy Zan̈ahary.”
^ Na: “famantaran̈a.”
^ Abt: “kadiriny 25 na 30 stadio.”
^ Abt: “raha voasoratra amy Mpaminan̈y ao.”
^ Abt: “anarô tsisy fiainan̈a an̈atinarô ao.”
^ Na mety ho: “vahoaka nivorivory.”
^ Na: “araiky aminarô io devoly.”
