Vaovao Tsara Nisoratin’i Jaona 8:12-59
8 12 Karaha ty koa ho Jesosy tamindrô: “Zaho hazavan̈an’ny donia ty. Lan̈iany olo man̈araka zaho tsy mety handeha amin’ny hiziky zen̈y foeky, fa hanan̈a hazavan̈an’ny fiainan̈a.”
13 Ke ho irô Fariseo aby io taminany: “Anao tômpiny fo mitsangana vavolombelon̈o man̈ambara ain̈inao; raha volan̈inao tsy marin̈y.”
14 Ho Jesosy tamindrô: “Zaho ndray mitsangana vavolombelon̈o man̈ambara momba zaho, raha volan̈iko marin̈y, fôtony haiko baka aia tany naviako aviô aia tany himboako. Fa anarô ndraiky tsy mahay baka aia tany naviako aviô aia tany himboako.
15 Anarô mitsara erakan’ny nôfotro,* fa zaho ndraiky tsy mitsara olo foeky.
16 Aviô ndray zaho mitsara, amy rariny fitsaran̈anaka, fôtony zaho tsy mitsara manaokan̈a, fa Baba nan̈iraka zaho miaraka aminaka.
17 Baka iô koa, ty raha voasoratra amy Lalàn̈anarô: ‘Marin̈y raha volan̈in’ny vavolombelon̈o aroe.’
18 Zaho araiky mitsangana vavolombelon̈o man̈ambara momba ain̈inaka, aviô Baba araiky nan̈iraka zaho mitsangana vavolombelon̈o man̈ambara momba zaho.”
19 Ke ho irô taminany: “Aia Babanao?” Ho Jesosy: “Samby tsy hainarô na zaho na Babako. Izikoa anarô nahay zaho, tôkony hainarô koa azôvy Babako.”
20 Tamy tany fikajian̈a raha valera izy nivolan̈a raha aby zen̈y, tamin’izy nampianatra tamy tempoly. Fa tsisy olo nanambotro izy, fôtony leranany mbala tsy navy.
21 Ke ho izy tamindrô ndraiky koa: “Zaho handeha, aviô anarô hitady zaho, fa anarô ho foaty amy fahotan̈anarô. Tany handihanako tsy afaka andihananarô.”
22 Ho irô Jiosy aby io: “Handeha hamono ten̈a ma izy mahavy izy mivolan̈a: ‘Tany handeha handianako tsy afaka andihananarô’?”
23 Ho izy tamindrô koa: “Anarô baka ambany; zaho baka an̈abo. Anarô baka amy donia ty; zaho tsy baka amy donia ty.
24 Zen̈y nahavy zaho nivolan̈a taminarô: Anarô ho foaty amy fahotan̈anarô. Fôtony izikoa anarô tsy mino fa zaho izy, anarô ho foaty amy fahotan̈anarô.”
25 Ke ho irô taminany: “Azôvy ma anao?” Ho Jesosy tamindrô: “Nan̈ino ma zaho mbala mandany lera mikoran̈a aminarô?
26 Maro raha tôkony hivolan̈iko momba anarô baka iô maro raha hitsaraiko. Ia, Araiky nan̈iraka zaho marin̈y,* baka iô zay raha ren̈iko baka taminany, izio ambarako donia ty.”
27 Tsy nazava tamindrô foeky fa momba Babany izy nikoran̈iny tamindrô io.
28 Ke ho Jesosy: “Lera Zanak’olo efa baka nahanton̈onarô,* iô vo hainarô fa zaho izy, aviô tsy zay raha tiako hatao fo ataoko; fa eraka raha nampianarin’ny Baba zaho, zen̈y ivolan̈ako raha aby zen̈y.
29 Baka iô Araiky nan̈iraka zaho miaraka aminaka; izy tsy niala zaho, fôtony zaho man̈ano raha mamparavoravo izy fo.”
30 Tamin’izy nivolan̈a raha aby zen̈y, maro olo nino izy.
31 Ho Jesosy tamindrô Jiosy nino izy aby io: “Anarô koa tsy miala amy* volan̈anaka, anarô ten̈a mpianatranaka;
32 anarô hahay ny marin̈y, ke ny marin̈y io hankafaka anarô.”
33 Ho irô taminany: “Zahay kony taranakan’i Abrahama ay, zahay tsiary ndraiky andevon’olo zen̈y foeky. Nan̈ino anao mivolan̈a: ‘Anarô ho afaka’?”
34 Ho Jesosy tamindrô: “Ankitikitin̈y, ambarako anarô marin̈y tsarabe fa, zay olo zatra manota andevon’ny fahotan̈a.
35 Sôsoko zen̈y, mpanompo tsy midôko an-tran̈o mandrakizay; fa zanaka ndraiky midôko ao mandrakizay.
36 Ke izikoa Zanaka mankafaka anarô, anarô ho afaka ankitin̈y.
37 Haiko fa anarô taranakan’i Abrahama, fa anarô mitady hamono zaho, fôtony anarô tsy man̈eky volan̈anaka.
38 Zaho mivolan̈a raha hitako tamy zaho niaraka tamy Babako, fa anarô man̈ano raha ren̈inarô tamy babanarô.”
39 Ho irô taminany: “Babanay Abrahama.” Ho Jesosy tamindrô: “Izikoa anarô zanakan’i Abrahama, anarô tôkony man̈ano asan’i Abrahama.
40 Fa anarô iziô mitady hamono zaho, kanefa zaho nan̈ambara anarô ny marin̈y ren̈iko tamy Zan̈ahary. Abrahama tsy nan̈ano raha karaha zen̈y.
41 Anarô man̈ano asan’ny babanarô.” Ho irô taminany: “Zahay tsy teraka baka tamy fijangajangan̈a.* Araiky fo Babanay, Zan̈ahary.”
42 Ho Jesosy tamindrô: “Izikoa Zan̈ahary Babanarô, anarô tôkony tia zaho fôtony zaho baka tamy Zan̈ahary ke indriô zaho. Tsy sitrapônaka tômpiny naviako, fa nin’ny Araiky nan̈iraka zaho.
43 Nan̈ino ma tsy mazava aminarô raha volan̈iko? Fôtony tsy din̈inarô mitandren̈y volan̈anaka.
44 Anarô baka amy Devoly babanarô, ke zay raha irin’ny babanarô fo tianarô hatao. Izy efa mpamono olo rango tamy voanalohany tan̈y,* aviô izy tsy niôrin̈y tamy fahamarin̈ana, fôtony tsisy fahamarin̈ana aminany ao. Izy mavandy fôtony efa zen̈y ny maha izy izy. Izy baka mpavandy sady baban’ny vandy.
45 Fa zaho ndraiky mivolan̈a ny marin̈y aminarô, kanefa anarô tsy mino zaho.
46 Azôvy aminarô afaka man̈aporofo fa zaho mpanota? Izikoa zaho mivolan̈a ny marin̈y, nan̈ino fo basy anarô tsy mino zaho?
47 Zay olo baka amy Zan̈ahary mitandren̈y volan̈an’ny Zan̈ahary. Zen̈y mahavy anarô tsy mitandren̈y, fôtony anarô tsy baka amy Zan̈ahary.”
48 Ho irô Jiosy aby io taminany: “Tsy marin̈y ma zahay koa mivolan̈a fa anao Samaritanin̈y baka iô anao misy demony?”
49 Ho Jesosy: “Zaho tsisy demony, fa zaho man̈amia voninahitry Babako. Fa anarô ndraiky tsy man̈amia voninahitry zaho.
50 Kanefa zaho tsy mitady voninahitry nin’ny ain̈inaka tômpiny. Fa misy Araiky tihan̈amia zaho raha zen̈y ary izy mpitsara.
51 Ankitikitin̈y, ambarako anarô marin̈y tsarabe fa, izikoa misy olo man̈araka volan̈anaka, izy tsy hahita fahafatesan̈a zen̈y foeky.”
52 Ke ho irô Jiosy aby io taminany: “Hainay eky ziôty fa anao misy demony ankitin̈y. Abrahama efa naty, karaha zen̈y koa irô mpaminan̈y aby io, kanefa anao mivolan̈a: ‘Izikoa misy olo man̈araka volan̈anaka, izy tsy ho foaty foeky.’
53 Anao ma bebe tozay Abrahama babanay efa naty in̈y? Irô mpaminan̈y aby io koa efa naty. Anao ma mihevitry anao azôvy?”
54 Ho Jesosy: “Izikoa zaho man̈amia voninahitry ain̈inaka, voninahitrinaka tsisy dikany. Babako man̈amia voninahitry zaho, araiky volan̈inarô fa Zan̈aharinarô.
55 Anarô ndray tsy mahay izy, zaho ndraiky mahay izy. Izikoa zaho mivolan̈a fa zaho tsy mahay izy, ho mpavandy karaha anarô koa zaho. Kanefa haiko izy aviô zaho man̈araka volan̈anany.
56 Abrahama babanarô ravoravo mare nan̈anten̈a hahita andranaka. Efa hitany raha zen̈y, ke izy ravoravo.”
57 Ke ho irô Jiosy aby io taminany: “Ndray anao mbala tsendriky 50 taon̈o, ke anao efa nahita Abrahama?”
58 Ho Jesosy tamindrô: “Ankitikitin̈y, ambarako anarô marin̈y tsarabe fa, talohan’i Abrahama nisy, zaho efa nisy.”
59 Ke irô nangala vato handeha hitorahandrô izy, kanefa Jesosy nisitriky aviô izy niala tamy tempoly tao.
Lamariky amy Pazy Ambany
^ Na: “eraka fomba fitsaran’olombelon̈o.”
^ Na: “mivolan̈a ny marin̈y.”
^ Abt: “nampanongainarô.”
^ Na: “tsy vôly man̈araka.”
^ Na: “rango tamin’izy vo nanomboko.”
