Vaovao Tsara Nisoratin’i Jaona 9:1-41
9 Izy koa fa nandalo, izy nahita lelahy araiky gila rango izy vo teraka.
2 Ke irô mpianatranany aby io nan̈ontany izy: “Raby, azôvy ma nanota ke nahavy lelahy io gila rango izy vo teraka, izy sa ry olobeny?”
3 Ho Jesosy: “Samby tsisy nanota na lelahy io na ry olobeny, fa miboaka raha ty amy zen̈y asan’ny Zan̈ahary ho hitan’olo baka amy raha mavoa izy io.
4 Atsika tsy maintsy man̈ano asan’ny Araiky nan̈iraka zaho diany andra mbala matsan̈a; fa ho avy alin̈y ke tsisy olo ho afaka hiasa.
5 Zaho koa mbala amy donia ty, zaho hazavan̈an’ny donia ty.”
6 Izy koa fa baka nivolan̈a raha aby zen̈y, izy nandraora tamy tany baka iô izy nan̈amboatra gaodra tamy raoranany; izio amizay nisôriny tamy mason’ny lelahy in̈y,
7 ke ho izy taminany: “Mindao sasà amy basain’i Siloama an̈y masonao” (“Nalefa” dikan’izio izikoa adika). Ke lôso lelahy io nandeha nanasa masonany, aviô izy nanjary nahita izikoa fa nimpody baka tan̈y.
8 Irô jiràny ndreky irô olo aby efa zatra nahita izy nangataka in̈y nivolan̈a: “Tsy io lelahy araiky nipetraka nangataka in̈y?”
9 Hon’olo sasany: “Izy ankitin̈y io.” Sasany ndraiky nivolan̈a: “Aha, izio olo mitovitovy aminany fo.” Fa lelahy io tsy vôly nivolan̈a: “Zaho izy.”
10 Ke irô nan̈ontany izy: “Akôry nampahita* masonao?”
11 Ho izy: “Nisy lelahy zay, Jesosy an̈arany, nan̈amboatra gaodra aviô izio nisôriny tamy masonaka, baka iô ho izy taminaka: ‘Mindao sasà a Siloama an̈y masonao.’ Ke zaho nandeha nanasa masonaka, aviô zaho nahita.”
12 Ke ho irô taminany: “Aia lelahy zen̈y?” Ho izy: “Tsy haiko ay.”
13 Nindesindrô tamy Fariseo aby io tan̈y lelahy efa navy gila io.
14 Sabata baka andra tamy Jesosy nan̈amboatra gaodra in̈y ndreky nampahita* mason’ny lelahy io.
15 Ke irô Fariseo aby io nan̈ontany lelahy io tamy fomba akôry nahavy izy nahita. Ho izy tamindrô: “Nisôriny gaodra tamy masonaka, aviô zaho nandeha nanasa masonaka ke zaho nahita.”
16 Sasany tamindrô Fariseo aby io nivolan̈a: “Lelahy zen̈y tsy irakan’ny Zan̈ahary, fôtony izy tsy mitandrin̈y Sabata.” Ho sasany: “Akôry ma hahavy olo mpanota hahavita fahagagan̈a karaha zen̈y?” Ke irô tsy nitovy hevitry.
17 Ke ho irô ndraiky koa tamy lelahy efa navy gila in̈y: “Akôry hevitrinao momba izy? Izy baka nampahita* masonao.” Ho lelahy io: “Izy mpaminan̈y.”
18 Kanefa irô Jiosy aby io tsy nino fa lelahy io efa gila fa nanjary nahita, izikoa tsy efa nikahiandrô raimandreninany.
19 Ke ho irô tamindrô: “Io ankitin̈y ma zanakanarô araiky volan̈inarô fa gila rango izy vo teraka in̈y? Ke akôry fo basy nahavy izy ziô nahita?”
20 Ho raimandreniny: “Ia, zanakanay ankitin̈y izio. Izio gila rango izy vo teraka.
21 Fa amy fomba akôry nahavy izy mahita, aviô azôvy nampahita* masonany, tsy hainay ay! An̈ontania izy! Izio efa be. Izy afaka mikoran̈a raha momba ain̈inany.”
22 Nivolan̈a raha aby zen̈y raimandreninany, fôtony irô navozo irô Jiosy aby io. Irô Jiosy aby io baka efa nifan̈araka fa hitoravan̈a hiala amy synagoga zay olo man̈eky fa Jesosy io Kristy.
23 Zen̈y nahavy ry olobeny nivolan̈a: “Izio efa be. An̈ontania izy.”
24 Nikahiandrô fan̈indroeny ndraiky koa lelahy efa navy gila in̈y, ke ho irô taminany: “Ameza voninahitry Zan̈ahary; hainay fa lelahy in̈y mpanota.”
25 Ho izy: “Tsy haiko eky izy na mpanota na tsy mpanota, fa ty fo raha haiko: Zaho taloha gila, fa zaho iziô ndraiky mahita.”
26 Ke ho irô taminany: “Ino ma raha nataony taminao? Karakôry nataony nampahita* masonao?”
27 Ho izy tamindrô: “Efa nivolan̈iko taminarô raha zen̈y, fa anarô tsy nitandren̈y. Nan̈ino ma anarô tihitandren̈y zen̈y ndraiky koa? Anarô koa ma mba tihanjary mpianatranany?”
28 Ke irô nanihitihy izy karaha ty: “Anao mpianatran’ny lelahy zen̈y, fa zahay ndraiky mpianatran’i Mosesy.
29 Hainay fa Zan̈ahary nikoran̈a tamy Mosesy, fa lelahy zen̈y ndraiky tsy hainay foeky baka aia tany naviany.”
30 Ho lelahy io tamindrô: “Mahagaga koa tsy ahaizanarô baka aia tany naviany, kanefa izy nampahita* masonaka!
31 Haintsika fa Zan̈ahary tsy mitandren̈y olo mpanota, fa izikoa misy olo mavozo Zan̈ahary sady man̈ano sitrapônany, izy tandrin̈esany.
32 Letrizay, mbala tsiary ndraiky nisy olo naharen̈y fa nisy olo nampahita* mason’olo araiky gila rango izy vo teraka.
33 Izikoa lelahy in̈y tsy baka amy Zan̈ahary, izy tsisy raha ho vitany foeky.”
34 Ho irô taminany: “Anao teraka tan̈atin’ny fahotan̈a ke anao han̈ano hampianatra zahay?” Izy baka tiô natsipindrô tambelan̈a* tan̈y.
35 Ren̈in’i Jesosy fa izy natsipindrô tan-tany, ke izy koa fa hitany, ho izy: “Anao ma mino Zanak’olo?”
36 Ho lelahy io: “Azôvy ma izy, tômpoko anao, misy inoako izy?”
37 Ho Jesosy taminany: “Anao efa nahita izy, ary izy lastiô araiky mikoran̈a aminao ty.”
38 Ho lelahy io: “Tômpo, zaho mino anao.”* Lelahy io baka tiô nankôhoko nan̈oloan̈a izy.
39 Ke ho Jesosy: “Zaho navy amy donia ty baka donia ty afaka hitsarain̈a. Amy zen̈y olo gila manjary mahita, fa ny mahita ndraiky manjary gila.”
40 Nisy Fariseo aby zay tiô naharen̈y izy nivolan̈a raha aby zen̈y, ke ho irô taminany: “Anao ma mihevitry fa zahay koa mba gila?”
41 Ke ho Jesosy tamindrô: “Anarô ôtrizay koa gila, anarô tsy nanota. Fa anarô mivolan̈a: ‘Zahay mahita’, ke tsy afaka fahotan̈anarô.”
Lamariky amy Pazy Ambany
^ Abt: “nampibian̈a.”
^ Abt: “nan̈abian̈a.”
^ Abt: “nan̈abian̈a.”
^ Abt: “nan̈abian̈a.”
^ Abt: “nan̈abian̈a.”
^ Abt: “nan̈abian̈a.”
^ Abt: “nan̈abian̈a.”
^ Na mety ho: “niroasindrô tambelan̈an’ny synagoga.”
^ Abt: “izy.”
