Vaovao Tsara Nisoratin’i Lioka 21:1-38
21 Izy koa fa nizaha in̈y, izy nahita irô mpan̈arivo aby io nandatsaka fan̈amezan̈andrô* tan̈atin’irô raha fandatsahan̈a vola aby io.
2 Izy baka tiô nahita man̈angy maty vady sady masikiny zay nandatsaka vola madiniky aroe ambany valera mare,*
3 ke ho izy: “Ambarako anarô marin̈y tsarabe fa, man̈angy maty vady sady masikiny io ny ten̈a nandatsaka be mandilatra olo hafa jiaby.
4 Fôtony irô jiaby nan̈ano fan̈amezan̈a baka amy lambilambin’ny vola tsy lanindrô, fa man̈angy io ndraiky, ndray masikiny, izy nandatsaka raha jiaby ivilaomany.”
5 Tafaran’izen̈y, an̈atiny olo sasany mbala nikoran̈a momba tempoly ndreky fomba nampisanjian̈a izio tamy vato maro tsara ndreky tamy raha voataokan̈a nin’ny Zan̈ahary in̈y,
6 izy nivolan̈a: “Ho avy andra handronganan̈a raha jiaby hitanarô io, ke tsisy vato hambela hifampitenginy eky iô.”
7 Ke irô nan̈ontany izy karaha ty: “Mpampianatra, ombian̈a ma raha aby zen̈y hiboaka, baka iô ino raha hahaizan̈a fa raha aby zen̈y ho avy?”
8 Ho izy: “Mitandrema anarô tsao ho voafitaka, fôtony maro olo ho avy hisandoko an̈aran̈anaka ke hivolan̈a: ‘Zaho izy’, aviô: ‘Efa marikitry fotoan̈a voatôndro.’ Fa anarô aza man̈araka irô.
9 Baka iô lera anarô maharen̈y lagera ndreky korontan̈a, anarô aza mavozo. Fôtony raha aby zen̈y tsy maintsy handalo antsendriky, kanefa mbala tsendriky avy iô ny iô ny farany.”
10 Baka iô ho izy tamindrô: “Hisy firenena hiady amy firenena, aviô hisy fanjakan̈a hiady amy fanjakan̈a.
11 Hisy hôrohôron-tany maro maventy ndreky mosary aviô valan̈’aretin̈y mamono amy tany isan-karazany. Olo hahita raha mampavozo, baka iô hisy famantaran̈a maventy baka an-dan̈itry.
12 “Kanefa alohan’ny raha jiaby zen̈y handalo, anarô hisambôrin’olo ndreky hinjehindrô, aviô hatolotrondrô amy synagoga ndreky hampidirindrô amy prizon. Baka amin’ny an̈aran̈anaka, anarô hindesindrô man̈oloan̈a mpanjaka ndreky governera,
13 amy zen̈y anarô hahavita hitory amindrô.
14 Kanefa anarô mila tapa-kevitry an̈atin’ny fônarô an̈y tsy han̈oman̈a tsialohaloha fiaraovan-ten̈anarô,
15 fôtony hambarako anarô volan̈a tôkony hivolan̈inarô baka iô anarô hamezako fahendrena, ke ndray hitambatra araiky fahavalonarô jiaby, irô tsy hahavita hanohitry na hifamatra anarô.
16 Sôsoko zen̈y, firaka amy raimandreninarô ndreky rahalahinarô ndreky havanarô aviô kamaradinarô hamadiky anarô,* ke hisy sasany aminarô hivonen̈a.
17 Baka amin’ny an̈aran̈anaka, anarô ho halan’olo jiaby.
18 Kanefa ndray araiky amy fan̈evanarô tsy ho very.
19 Anarô koa miaritry, ho voavonjinarô fahin̈ananarô.
20 “Kanefa, izikoa fa hitanarô fa Jerosalema avoakodidin̈in’ny maramila, tsara hainarô fa izy efa marikitry hiravan̈iny.
21 Ke lan̈iany olo a Jodia mila milefa amy bongo an̈y, baka iô lan̈iany olo a Jerosalema mila miala ao, aviô lan̈iany olo ambanivolo efa tsy tôkony hiditry a Jerosalema ao eky.
22 Fôtony amin’ny andra aby zen̈y fotoan̈a hampiharan̈a ny rariny,* amy zen̈y ho tanteraka aby raha jiaby voasoratra.
23 Amin’ny andra aby zen̈y, hidiran’andra man̈angy mavesatra ndreky mampinono! Fôtony haresaka fahorian̈a amy tany io, aviô vahoaka ty hisazin̈y.
24 Irô ho foatin’ny sabatra marangitry, ke irô hindesin̈y ho babo amy firenena jiaby, baka iô Jerosalema hidiadiavin’ny hafa firenena* firaka fotoan̈a voatôndro nin’ny hafa firenena* aby io tapitry.
25 “Aviô, hisy famantaran̈a amy masoandra ndreky amy fanjava baka iô amy lakintan̈a. Ambony tany eto ndraiky, irô firenena aby io ho vaky asaloha ndreky ho very hevitry fôtony hihetsiky mare ranomasin̈y sady haresaka.
26 Olo ho toran̈a baka amy fahavozoan̈a ndreky baka amy fatahaoran̈a raha hiboaka ambony tany eto,* fôtony handeha hozongozon̈iny angôvon’ny lan̈itry.
27 Zanak’olo ho hitan’olo* ho avy an̈atin’ny rôndro, miaraka amin’ny angôvo ndreky voninahitry maventy.
28 Kanefa izikoa fa manomboko miboaka raha aby zen̈y, mitsangàna mahitsy, baka iô misan̈andrà, fôtony fan̈avaotan̈a* anarô efa marikitry.”
29 Aviô ty fan̈oharan̈a nambarany irô: “Diniha baka kakazo aviavy ndreky kakazo hafa jiaby.
30 Irô io koa fa hitanarô mandravim-bao, hainarô baka amy zen̈y fa efa marikitry asara.
31 Karaha zen̈y koa, izikoa fa hitanarô miboaka raha aby zen̈y, tsara hainarô fa Fanjakan̈an’ny Zan̈ahary efa marikitry.
32 Ambarako anarô marin̈y tsarabe fa, tsy ho lany foeky taranaka ty firaka raha jiaby zen̈y miboaka.
33 Lan̈itry ndreky tany ho ravan̈a, fa volan̈anaka ndraiky tsy ho ravan̈a foeky.
34 “Kanefa anarô mitandrema tsao fônarô hivisaran’ny fihinanan̈a dila loatra ndreky figiahan-toaka be loatra ndreky raha maro mampiasaloha amy fiainan̈a, ke tsy hampoizinarô havian’ny andra zen̈y aminarô, fôtony raha zen̈y ho tampoko
35 karaha fandriky. Fôtony raha zen̈y ho avy amin’olo jiaby mipetraka ambony tany ty.
36 Ke anarô miambesa fo, aviô aza vôly miangavy baka anarô ho afaka hilefa raha jiaby tsy maintsy hiboaka aby zen̈y, amy zen̈y anarô ho afaka hitsangana man̈oloan̈a Zanak’olo.”
37 Mazava andra izy nandeha nampianatra tamy tempoly, fa izikoa fa alin̈y ndraiky izy nandeha nidôko tamy bongo kahian̈a Bongo Olivy.
38 Maraindrain̈y be, olo jiaby efa navy hitandren̈y izy amy tempoly ao.
Lamariky amy Pazy Ambany
^ Izio vola.
^ Abt: “leptona aroe.”
^ Na: “hanolotro anarô amy manam-pahifan̈a.”
^ Na: “Fôtony andra aby zen̈y andra famalian̈a faty.”
^ Na: “Jentilisa.”
^ Na: “Jentilisa.”
^ Na: “ambony tany misy olo mipetraka.”
^ Abt: “hitandrô.”
^ Abt: “famotsaoran̈a.”
