Vaovao Tsara Nisoratin’i Lioka 23:1-56
23 Ke vahoaka jiaby nitsangana aviô nitondra izy tamy Pilato.
2 Irô nanomboko nan̈ampanga izy karaha ty: “Lelahy ty hitanay nampirisiky vahoaka hanohitry fanjakan̈a. Baka iô izy tsy nan̈aomba olo han̈efa hetra amy Kaisara, aviô izy nivolan̈a fa izy zen̈y Kristy mpanjaka.”
3 Ke Pilato nan̈ontany izy: “Anao ma Mpanjakan’ny Jiosy?” Ho Jesosy: “Efa izy edy raha volan̈inao zen̈y.”
4 Ke ho Pilato tamindrô lohandohan’ny mpisôron̈o ndreky vahoaka aby io: “Tsy hitako ino hadisovan̈an’ny lelahy io.”
5 Fa irô nan̈izingizin̈y karaha ty: “Raha nampianarin’ny lelahy io olo man̈eran̈a Jodia, rango ta Galilia tan̈y firaka eto, mampisy korontan̈a.”
6 Pilato koa fa naharen̈y zen̈y, izy nan̈ontany asa izy Galilianin̈y.
7 Izikoa fa nalainy antoko fa Jesosy olo baka tamy faritry nanjakan’i Heroda, izy nalefany tan̈y. Heroda lastiô ta Jerosalema tamy zen̈y.
8 Heroda koa fa nahita Jesosy, ravoravo mare izy. Efa ela baka izy tihahita Jesosy, fôtony maro raha ren̈iny momba izy, aviô izy nan̈anten̈a hahita izy han̈ano fahagagan̈a.
9 Ke nanomboko nan̈ontany Jesosy raha maro izy, fa izy tsy namaly.
10 Kanefa irô lohandohan’ny mpisôron̈o ndreky mpanoratra lalàn̈a aby io tsy vôly nitsangana sady nan̈ampanga izy angôvo jiaby.
11 Ke Heroda ndreky maramilanany aby io tsy nan̈isy fôtiny izy. Irô nan̈adroadro izy ke izy nampisikinindrô lamba tsara mare, aviô izy nampodindrô tamy Pilato ndraiky.
12 Tamin’ny andra zen̈y, Heroda ndreky Pilato nanjary kamarady, kanefa irô talohan’izen̈y tsy fankahazo foeky.
13 Navorin’i Pilato irô lohandohan’ny mpisôron̈o ndreky irô mpitondra* aviô vahoaka aby io,
14 ke ho izy tamindrô: “Lelahy ty nindesinarô taminaka fôtony anarô nivolan̈a fa izy nampirisiky vahoaka hanohitry fanjakan̈a. Kanefa zaho iziô nan̈adikadin̈y izy man̈oloan̈a anarô, fa tsy hitako aby fahamarin̈an’ny raha nivolan̈inarô iampangan̈a izy.
15 Ndray Heroda koa mba mieritreritry karaha zen̈y. Zahava baka izy nampodiny amintsika atỳ io! Lelahy io tsy nan̈ano raha tôkony hamonoan̈a izy foeky.
16 Fa izy ndraiky handeha hisazìko aviô izy hivotsaorako.”
17 ——
18 Fa vahoaka jiaby ndraiky nandronton̈o karaha ty: “Vonia an̈y lelahy io! Votsaora Barabasy!”
19 (Lelahy zen̈y nigadrain̈a fôtony izy nitaon̈o olo tamy tanàna io hanohitry fanjakan̈a sady namono olo.)
20 Nimpody nivolan̈a tamindrô ndraiky Pilato, fôtony Jesosy tiany hivotsaoran̈a.
21 Fa irô nandronton̈o mare karaha ty: “Antaon̈a amy pôtô* an̈y izy! Antaon̈a amy pôtô* an̈y izy!”
22 Karaha ty koa ho izy, tamy fan̈intelon’izy nivolan̈a tamindrô: “Raha nan̈ino? Ino ma raha ratsy nataon’ny lelahy io? Tsy hitako foeky kony antony tôkony hamonoan̈a izy ay! Ke izy hisazìko baka iô hivotsaorako.”
23 Kanefa irô koa fa naharen̈y zen̈y, irô nahainandronton̈o mare fo sady nangataka hamonoan̈a Jesosy. Ke feondrô fo ren̈y.
24 Farany, Pilato nilefitry, ke namezany irô foeky raha nitadiavindrô.
25 Nivotsaorany lelahy nangatahandrô in̈y, tsy azôvy zen̈y fa araiky nigadrain̈a fôtony nitaon̈o olo hanohitry fanjakan̈a ndreky namono olo. Fa Jesosy ndraiky natôndrony tamindrô baka hataondrô aminany zay raha tiandrô hatao.
26 Jesosy koa fa nindesindrô, Simona baka a Kyrena nisakanandrô; izy tamy zen̈y baka tambanivolo. Nampitondrasindrô izy hazofijalian̈a,* baka iô izy nirahandrô nandeha tafaran’i Jesosy.
27 Nisy vahoaka marobe nan̈araka izy; an̈isan’izen̈y irô man̈angy namango tratra baka tamin’ny alahelo sady niafatrafatra nitomoan̈y izy.
28 Fa Jesosy nitodiky tamindrô man̈angy aby io aviô ho izy: “A man̈angy zanakan’i Jerosalema, anarô aza mitoman̈y zaho eky. Fa ain̈inarô ndreky zanakanarô fo hitoman̈iza,
29 fôtony ho avy andra hivolan̈an’olo: ‘Sambatra man̈angy tsy niteraka ndreky kibo tsy niteraka aviô nono mbala tsy ninonoan’ny tsaiky!’
30 Ke irô hivolan̈a amy bongo aby io: ‘Mitandatsaha aminay!’, aviô amindrô tazoa aby io: ‘Saraon̈a zahay!’
31 Izikoa zen̈y raha ataondrô amy fotoan̈an’ny kakazo mbala len̈y, ino eky raha hiboaka lera izio maiky?”
32 Nisy dahalo aroe lahy koa nindesin̈y hivonen̈a niaraka taminany.
33 Irô koa fa navy tamy tany araiky kahian̈a Babakindoha, izy ndreky irô dahalo aby io nifantsihindrô tamy pôtô, ke araiky tankavanan̈anany, baka iô araiky tankavianany.
34 Fa ho Jesosy: “Baba, ambilà hadisovan̈andrô fôtony tsy haindrô raha ataondrô.” Aviô, irô nan̈ano antsapaka misy handrasandrô lambanany.
35 Irô olo aby io nidôko nitsangana tiô nizaha, fa irô mpitondra tamy Jiosy aby io ndraiky nan̈adroadro izy karaha ty: “Olo hafa navaotany, ke ambilà izy han̈avotro ain̈inany izikoa izy Kristin’ny Zan̈ahary, Araiky Voafidy!”
36 Firaka irô maramila aby io mbala nan̈adroadro izy fo, ke irô nan̈aton̈o baka iô izy namezandrô divain matsiko,
37 aviô ho irô: “Izikoa anao Mpanjakan’ny Jiosy, avaota ain̈inao!”
38 Nisy soratra karaha ty koa tan̈abonany tiô: “Ty Mpanjakan’ny Jiosy.”
39 Araiky tamindrô dahalo nianton̈o tiô koa nanomboko nanihitihy izy karaha ty: “Anao ma tsy Kristy? Avaota ain̈inao baka iô avaota koa zahay!”
40 Fa araiky hafa in̈y nasiaka namany io karaha ty: “Anao ma tsy mazovo Zan̈ahary foeky, kanefa anao nahazo sazy miran̈a amy ninany?
41 Rariny atsika izikoa voasazy, fôtony baka tamy raha nataontsika fo navoazantsika izy ty; fa lelahy io ndraiky tsisy raha ratsy nataony.”
42 Baka iô ho izy: “Jesosy, tsaraova zaho lera anao avy amy Fanjakan̈anao.”
43 Ke ho Jesosy taminany: “Ambarako anao marin̈y tsarabe niany ty fa, anao hiaraka aminaka amy Paradisa.”
44 Kadiriny midỳ* andra tamy zen̈y, kanefa nahiziky gômon̈o nan̈eran̈a faritry io jiaby firaka troazera folakandra,*
45 fôtony tsy hita foeky hazavan̈an’ny masoandra. Baka iô ridô tamy toeran̈a masin̈y tao natriaka baka an̈ivo.
46 Jesosy baka tiô nandronton̈o mare karaha ty: “A Baba, apetrako am-pelantan̈ananao fahin̈ananaka.” Izy koa fa baka nivolan̈a zen̈y, izy naty.*
47 Izikoa fa hitan’ny manamboninahitry io raha nandalo, izy nanomboko nan̈amia voninahitry Zan̈ahary karaha ty: “Olo marin̈y ankitin̈y lelahy io.”
48 Irô vahoaka jiaby navy hizaha raha nandalo koa fa nahita raha aby zen̈y, irô lôso nody sady namango tratrandrô.
49 Fa irô olo jiaby nahay izy ndraiky nitsangana lavidavitry tarỳ. Aviô koa tiô nisy man̈angy nan̈araka izy baka ta Galilia, ke irô nahita raha aby zen̈y.
50 Nisy lelahy araiky zay an̈isan’ny Filan-kevitry.* Josefa an̈arany. Lelahy io tsara fan̈ahy salakady olo marin̈y.
51 Izy tsy nan̈eky hanaohan̈a tetiky ndreky raha tsy manjary nataon’ny Filan-kevitry io. Izio baka Arimatia, tanàna araiky a Jodia, aviô izy niambin̈y Fanjakan̈an’ny Zan̈ahary.
52 Lelahy io nandeha tamy Pilato ke nangataka fatin’i Jesosy.
53 Ke najotsony faty io, baka iô izio nifon̈ôsiny lamba lin tsara mare, aviô izio napetrany tamy fasan̈a nangadin̈a tan̈atin’ny lampimbato; tao mbala tsiary nandiven̈ana olo.
54 Andra Fan̈oman̈ana tamy zen̈y, aviô efa hanomboko Sabata.
55 Irô man̈angy niaraka taminany baka ta Galilia koa nan̈araka, ke irô nizaha fasan̈a io ndreky karakôry fomba nan̈apitrahan̈a fatin’i Jesosy tao.
56 Aviô lôso irô nandeha nan̈oman̈a raha man̈itry ndreky menaka man̈itry. Fa ndray zen̈y, irô nangala kajo tamin’ny andra sabata, fôtony zen̈y raha nitakin’ny Lalàn̈a.
Lamariky amy Pazy Ambany
^ Na: “mpitondra irô Jiosy aby io.”
^ Na: “Vonia.”
^ Na: “Vonia.”
^ Abt: “tamy lera fahatsiota.”
^ Abt: “tamy lera fahasivy.”
^ Na: “nafaka fahin̈ana.”
^ Na: “Synedriona.”
