Vaovao Tsara Nisoratin’i Lioka 5:1-39
5 Tandraraiky, tamy Jesosy nitsangana marikitry matsaborin’i Genesareta,* nisy vahoaka nifanefisefy taminany tiô fôtony irô handeha hitandren̈y volan̈an’ny Zan̈ahary.
2 Izy nahita sambo aroe tamôron’ny matsabory io, fa irô mpan̈arato aby io efa nijotso nandeha nanasa haratondrô.
3 Nanonga tamin’ny araiky tamy sambo aby io izy. Izio nin’i Simona. Izy nan̈iraka Simona somary hihataka hely sisin’ny rano; baka iô izy nipetraka, aviô izy nanomboko nampianatra irô vahoaka aby io baka tan̈atin’ny sambo io tao.
4 Izikoa fa vita koran̈anany, ho izy tamy Simona: “Mandihana amy lalin̈y, aviô alatsaha haratonarô misy hahazahoanarô laoko!”
5 Fa ho Simona: “A Mpampianatra, zahay efa niasa mare alin̈y jiaby in̈y fa tsisy raha nazonay foeky. Kanefa baka amy volan̈anao zen̈y, halatsako fo ndraiky harato aby ty.”
6 Raha zen̈y koa fa nataondrô, irô nahazo laoko marobe, ke natriaka foeky haratondrô.
7 Ke irô nan̈ano fihetsiky tamy tan̈ana hikahian̈a mpan̈arato namandrô tamy sambo hafa amy zen̈y irô io ho avy han̈ampy irô. Navy irô olo aby io; sambo aroe io samby feno laoko, ke efa kalikaly ho dobo!
8 Izikoa fa hitan’i Simona Petera raha zen̈y, izy nandohaliky nan̈oloan̈a Jesosy, ke ho izy: “Anao mialà aminaka eto, Tômpo, fôtony zaho ty olo mpanota.”
9 Izy ndreky irô olo niaraka taminany aby io baka lany fan̈ahy, fôtony naro ankitin̈y laoko nazondrô.
10 Lany fan̈ahy karaha zen̈y koa Jakoba ndreky Jaona zanakan’i Zebedio. Irô io niaraka niasa tamy Simona. Fa ho Jesosy tamy Simona: “Anao aza mavozo eky. Manomboko iziô, olo velon̈o ho azonao.”
11 Ke sambo aby io nindesindrô nimpody tantety, baka iô nialandrô raha jiaby, aviô irô nan̈araka izy.
12 Tandraraiky, Jesosy tamy zen̈y tamy tanàna araiky zay, nisy lelahy feno habokan̈a tao. Lelahy io koa fa nahita Jesosy, izy nankôhoko sady niangavy karaha ty: “A Tômpo, izikoa tianao hampadio zaho, ho vitanao raha zen̈y.”
13 Ke namparin’i Jesosy tan̈anany baka iô lelahy io nikasihiny, aviô ho izy: “Ia, tiako han̈ano zen̈y! Hadio anao.” Tiô ny iô, nafaka habokan̈an’ny lelahy io.
14 Baka iô izy namepetry lelahy io tsy hivolan̈a raha zen̈y amin’olo, fa ho izy taminany fo: “Mindao anao mandeha amy mpisôron̈o an̈y, aviô fôtony anao efa nidiovin̈y, man̈anaova fan̈atitry eraka raha nan̈irahan’i Mosesy, amy zen̈y ho hitandrô fa anao efa janga.”
15 Ndray zen̈y, nahainiparitaka fo vaovao momba izy, ke nisy vahoaka marobe vory hitandren̈y izy ndreky hitahàny amin’ny aretin̈indrô.
16 Kanefa, matetiky izy nandeha tamy tany mitaokan̈a, hivavaka.
17 Tandraraiky, tan̈atiny izy nampianatra in̈y, nisy Fariseo ndreky mpampianatra Lalàn̈a baka amy tanànan’i Galilia ndreky Jodia, baka iô baka a Jerosalema nipetraka tiô. Namezan’i Jehovah angôvo i Jesosy baka hampajanga olo.
18 Nisy olo nitondra lelahy araiky malemy tamy brankara. Namango irô nitady fomba hampidiran̈a izy ndreky han̈apitrahan̈a izy man̈oloan̈a Jesosy,
19 fa irô fo tsy nahita fôtony naro loatra olo tao. Ke irô nanonga tan̈abon’ny tafontran̈o, baka iô nisy nan̈adosoandrô tafontran̈o tanimanga io, aviô lelahy io najotsondrô baka tamy brankara, tan̈ivon’olo nan̈oloan̈a Jesosy tiô.
20 Izikoa fa hitany fa irô nanan̈a finoan̈a, ho izy tamy lelahy malemy io: “Voavela fahotan̈anao.”
21 Ke irô mpanoratra lalàn̈a ndreky Fariseo aby io nifampikoran̈a karaha ty: “Azôvy lelahy tsy man̈isy fôtiny Zan̈ahary ty? Azôvy koa ma mahavita man̈ambela fahotan̈a izikoa tsy Zan̈ahary zaraiky fo?”
22 Kanefa hain’i Jesosy raha tan̈atin’ny jerindrô, ke ho izy tamindrô: “Ino ma raha iritriretinarô an̈atin’ny fônarô ao zen̈y?
23 Aia ma moramora, mivolan̈a: ‘Voavela fahotan̈anao’, sa: ‘Mitsangàna, baka iô mandihana’?
24 Fa baka ho hainarô fa Zanak’olo manan̈a fahifan̈a han̈ambela fahotan̈a ambony tany eto...” Ho izy tamy lelahy malemy io: “Ho zaho aminao: Mitsangàna, alaiva brankaranao, baka iô mindao mody.”
25 Ke lelahy io nitsangana nan̈oloan̈a irô, baka iô nalainy brankaranany, aviô lôso izy nody sady nan̈amia voninahitry Zan̈ahary.
26 Lany fan̈ahy olo jiaby, ke irô nanomboko nan̈amia voninahitry Zan̈ahary. Irô koa navozo mare sady ho irô: “Naro niavaka raha hitantsika niany!”
27 Tafaran’izen̈y, izy niboaka aviô izy nahita mpamory hetra araiky nipetraka tamy birô fan̈ifan̈a hetra. Levy an̈arany. Ho izy taminany: “Alô han̈araka zaho.”
28 Ke nialàn’i Levy aby raha jiaby, baka iô izy nitsangana ke nan̈araka Jesosy.
29 Aviô Jesosy nan̈anaovan’i Levy fety be tan-tran̈onany tao. Maro mpamory hetra ndreky olo hafa nihinan̈a* niaraka tamindrô.
30 Ke irô Fariseo ndreky irô mpanoratra lalàn̈andrô aby io nin̈on̈on̈o tamy mpianatranany, ho irô: “Nan̈ino ma anarô mihinan̈a ndreky migiaka miaraka amy mpamory hetra ndreky mpanota?”
31 Ke ho Jesosy tamindrô: “Tsy olo salama mila dôkotera, fa olo marary.
32 Tsy handeha hikaiky olo marin̈y antony naviako, fa handeha hikaiky mpanota baka irô hibebaka.”
33 Ho irô taminany: “Irô mpianatran’i Jaona aby io matetiky mifady hanin̈y* sady miangavy am-bavaka. Man̈ano karaha zen̈y koa mpianatrandrô Fariseo aby io, fa mpianatranao aby io ndraiky mihina ndreky migiaka.”
34 Ho Jesosy tamindrô: “Anarô tsy afaka miforse naman’ny mpan̈ainga hifady hanin̈y, mpan̈ainga koa mbala ankilandrô iô, tsy zen̈y?
35 Fa ho avy andra han̈adosoan̈a mpan̈ainga io ankilandrô iô, ke amin’ny andra aby zen̈y irô vo hifady hanin̈y.”
36 Baka iô izy nan̈ano fan̈oharan̈a tamindrô: “Tsisy olo mangala tapaka lamba vao hikopandrian̈a lamba kay. Izikoa zen̈y edy atao, hahaihantsoritin’ny lamba vao io lamba kay io, fôtony izio tsy miady aminany.
37 Aviô tsisy olo man̈ano divain vao an̈atin’ny saka angôzy* efa kay. Izikoa zen̈y raha atao, divain vao io hampipaofaka saka angôzy io ke ho very divain jiaby, baka iô ho robaka saka io.
38 Ke divain vao tsy maintsy atao an̈atin’ny saka angôzy vao.
39 Tsisy olo izikoa fa baka nigiaka divain kay, ke hitady araiky vao, fôtony ho izy: ‘Araiky kay ny tsara.’”
Lamariky amy Pazy Ambany
^ Izio Ranomasin̈in’i Galilia.
^ Na: “nandry nandriran̈a nihina.”
^ Na: “mifehy.”
^ Izio saka angôzy fasian̈a divain.
