Vaovao Tsara Nisoratin’i Lioka 6:1-49
-
Jesosy “Tômpon’ny Sabata” (1-5)
-
Lelahy maty tan̈ana nampahivan̈iny (6-11)
-
Apostoly 12 (12-16)
-
Jesosy nampianatra ndreky nampajanga olo (17-19)
-
Olo sambatra ndreky olo hidiran’andra (20-26)
-
“Tiava fo fahavalonarô” (27-36)
-
“Voleza mitsara” (37-42)
-
Baka amy voany ahaizan̈a izy (43-45)
-
Tran̈o tsara ôrin̈y; tran̈o ratsy fôtotro (46-49)
6 Tamy Sabata araiky zay, Jesosy ndreky irô mpianatranany aby io nandalo tamy tanimbary. Irô mpianatranany aby io nan̈ombotro tahom-bary,* baka iô izio nihosihosendrô aviô nihoanindrô.
2 Ke ho sasany tamindrô Fariseo aby io: “Nan̈ino ma anarô man̈ano raha tsy fatao amin’ny andra sabata?”
3 Fa ho Jesosy tamindrô: “Mbala tsiary nivakianarô ma raha nataon’i Davida tamin’izy ndreky irô olo niaraka taminany aby io silaon̈o?
4 Izy niditry tamy tran̈on’ny Zan̈ahary tao, baka iô namezan̈a izy irô môfo atao fan̈atitry aby io. Ke irô io nihoaniny aviô nan̈amezany koa irô olo niaraka taminany aby io, kanefa tsisy olo nahazo nihinan̈a môfo aby zen̈y izikoa tsy mpisôron̈o zaraiky fo.”
5 Aviô ho izy tamindrô: “Zanak’olo Tômpon’ny Sabata.”
6 Tamin’ny andra sabata hafa ndraiky, izy niditry tamy synagoga baka iô izy nanomboko nampianatra. Nisy lelahy maty* tan̈ana ankavanan̈a zay tao.
7 Nizahavandrô mpanoratra lalàn̈a ndreky Fariseo aby io tsarabe Jesosy tsao izy handeha hampajanga olo io amin’ny andra sabata, misy hahitandrô antony hiampangan̈a izy.
8 Kanefa, hainy raha tan̈atin’ny jerindrô, ke ho izy tamy lelahy maty* tan̈ana io: “Mitsangàna aviô mavia an̈ivo eto.” Ke lelahy io nitsangana baka iô izy nandeha tan̈ivo tiô.
9 Ke ho Jesosy tamindrô: “Zaho man̈ontany anarô, ino ma raha mety atao amy Sabata: Man̈ano ny tsara sa man̈ano ny ratsy, man̈avotro fahin̈ana sa mamono olo?”
10 Izy koa fa baka nizaha olo jiaby nan̈odidin̈y izy tiô, ho izy tamy lelahy io: “Vavara tan̈ananao.” Raha zen̈y koa fa nataony, tan̈ananany janga.
11 Kanefa irô rômotro mare, ke irô niaraka nandiniky ino raha handeha hataondrô Jesosy.
12 Tandraraiky zay, izy nandeha tamy bongo hivavaka. Tan̈atin’ny alin̈y araiky izy nivavaka tamy Zan̈ahary.
13 Andra koa fa kiaka, izy nikaiky irô mpianatranany aby io, aviô izy nifidy 12 lahy tamindrô io; apostoly nikahiany irô io:
14 Simona araiky nikahiany Petera, Andrea rahalahiny, Jakoba, Jaona, Filipo, Bartolomeo,
15 Matio, Tomasy, Jakoba zanakan’i Alfeo, Simona araiky kahian̈a “araiky mafana fô”,
16 Jodasy zanakan’i Jakoba, aviô Jodasy Iskariota araiky nanjary mpamadiky in̈y.
17 Izy baka iô niaraka nijotso tamindrô aviô nitsangana tamy tany lemaka. Nisy mpianatranany marobe tiô, baka iô koa nisy olo marobe baka ta Jodia ndreky Jerosalema aviô baka tamy faritry tamôron-dranomasin̈in’i Tyro ndreky Sidona, navy hitandren̈y izy ndreky hitahany amin’ny aretin̈indrô.
18 Ary ndray olo nampijalian’ny demony mbala janga fo.
19 Ke vahoaka jiaby nitady hikasiky izy, fôtony nisy angôvo niboaka baka taminany ke nampajanga irô jiaby.
20 Ke izy niangana nizaha irô mpianatranany aby io, aviô ho izy:
“Sambatra anarô masikiny, fôtony anarô hahazo* Fanjakan̈an’ny Zan̈ahary.
21 “Sambatra anarô mosary amy ziôty, fôtony anarô hivokisan̈a.
“Sambatra anarô mitomoan̈y amy ziôty, fôtony anarô hitokiky.
22 “Sambatra anarô izikoa baka amy Zanak’olo mahavy anarô halan’olo ndreky hahilikilikindrô, baka iô hankaratsindrô ke ataondrô fa ratsy fan̈ahy.*
23 Amin’andra zen̈y, miravoravoa, ia, miravoravoa mare, fôtony be ankitin̈y hatsaran̈a miambin̈y anarô an-dan̈itry an̈y. Karaha zen̈y baka raha nataondry olobendrô tamindrô mpaminan̈y aby io.
24 “Kanefa hidiran’andra anarô mpan̈arivo, fôtony raha jiaby mahafa-pô anarô efa azonarô.
25 “Hidiran’andra anarô voky amy ziôty, fôtony anarô mbala ho mosary.
“Hidiran’andra anarô mitokiky amy ziôty, fôtony anarô mbala halahelo ndreky hitomoan̈y.
26 “Hidiran’andra anarô izikoa olo jiaby mivolan̈a raha tsara momba anarô, fôtony karaha zen̈y baka raha nataondry olobendrô tamindrô mpaminan̈y sandoko aby io.
27 “Kanefa, ty raha ambarako anarô mitandren̈y zaho: Tiava fo fahavalonarô, an̈anaova ny tsara fo olo tsy mankatia anarô,
28 ameza tsodrano fo olo man̈ozon̈o anarô, aviô mivavaha fo nin’olo tsy man̈isy fôtiny anarô.
29 Izikoa misy olo mamango fifinao araiky, ameza izy koa ilany; baka iô izikoa misy olo mangala lambanao ambelan̈a, ambilà koa alainy lambanao an̈atiny.
30 Izikoa misy olo mangataka raha aminao, ameza izy; baka iô izikoa misy olo mangala fanan̈ananao, izio aza takin̈a aminany.
31 “Aviô, zay raha tianarô hataon’olo aminarô, karaha zen̈y koa ataova amindrô.
32 “Izikoa olo mankatia anarô fo tianarô, ino edy dera ho azonarô baka amy zen̈y? Fôtony ndray irô mpanota aby io mba mankatia olo tia irô koa.
33 Baka iô izikoa olo man̈ano ny tsara aminarô fo han̈anaovanarô ny tsara, ino edy dera ho azonarô baka amy zen̈y? Ndray irô mpanota aby io koa ane mba man̈ano karaha zen̈y ay!
34 Aviô koa, izikoa olo atokisanarô fa han̈ampody volanarô fo ampitrosainarô,* ino edy dera ho azonarô baka amy zen̈y? Ndray olo mpanota koa mba mampindran̈a vola olo mpanota sady man̈anten̈a fa ho voaefa volandrô.
35 Fa anarô ndraiky, tiava fo fahavalonarô, baka iô man̈anaova ny tsara fo, aviô anarô koa fa mampitraosa olo, aza man̈anten̈a hahazo valiny. Amy zen̈y ho be ankitin̈y hatsaran̈a ho azonarô, aviô anarô hikahian̈a zanakan’ny Farany An̈abo, fôtony izy tsara fan̈ahy amin’olo tsy mahay mankasitraka ndreky ratsy fan̈ahy.
36 Ke aza vôly mamindra fô, karaha Babanarô mamindra fô.
37 “Voleza mitsara, amy zen̈y anarô tsy hitsarain̈a foeky. Voleza man̈amia tsin̈y,* amy zen̈y anarô tsy hamezan̈a tsin̈y* foeky. Aza vôly man̈ambela hadisovan̈a,* amy zen̈y hambela koa hadisovan̈anarô.*
38 Mifen̈a ho zatra man̈amia, amy zen̈y anarô koa mba hamezan̈a. Eran̈a tsara, sady voatsentsin̈y, baka iô nahontsakontsan̈a, aviô mandongolongo, handeha hararaka amy fofoan̈anarô. Fôtony arakaraka eran̈an-draha ampiasainarô, han̈iran̈ana ninarô koa.”
39 Ty koa fan̈oharan̈a nambarany irô: “Olo gila ma afaka mitariky olo gila? Tsy samby ho latsaka an̈atin’ny lavaka edy irô roe?
40 Mpianatra tsy an̈abo mandilatra mpampianatranany, fa lan̈iany olo mahazo fampianaran̈a lavorary ndraiky hitovy amy mpampianatranany.
41 Ke nan̈ino anao mizaha tapaka kakazo amy mason’ny rahalahinao, kanefa bolongan’ny kakazo amy masonao tsy hitanao aby?
42 Akôry hasakianao mivolan̈a amy rahalahinao: ‘A rahalahy, ambesa hadosoko tapaka kakazo amy masonao’, kanefa ndray anao tômpiny fo tsy mahita bolongan’ny kakazo amy masonao? Mpihatsaravelatsihy! Adosoa antsendriky bolongan’ny kakazo amy masonao, amy zen̈y ho hitanao tsarabe fomba han̈adosoan̈a tapaka kakazo amy mason’ny rahalahinao.
43 “Tsisy kakazo tsara ke han̈amia voany ratsy, aviô tsisy kakazo ratsy ke han̈amia voany tsara.
44 Baka amy voany ahaizan̈a kakazo araiky. Tsisy olo, ohatra, hangala aviavy baka amy fatsiky, na handeha hitsongo rezain baka amy raha maniry feno fatsiky.
45 Olo tsara* man̈aboaka raha tsara nakajiany an̈atin’ny fônany, fa olo ratsy fan̈ahy ndraiky man̈aboaka raha ratsy nakajiany an̈atin’ny fônany. Zay raha mameno fôn’olo fo volan̈in’ny vavanany.
46 “Nan̈ino basy anarô mikaiky zaho: ‘Tômpo! Tômpo!’, kanefa raha volan̈iko tsy ataonarô aby?
47 Handeha ambarako anarô mitovy amin-jôvy lan̈iany olo man̈aton̈o zaho ndreky mitandren̈y volan̈anaka ke man̈araka irô io:
48 Izy miran̈a amy lelahy araiky niasa tran̈o, ke nangady lalin̈y aviô nandatsaka fôtotro tan̈abon’ny lampimbato. Ke lera nisy tondra-drano, ranon’ny ten̈arano nantreky mare tamy tran̈o io, fa izio fo tsy nahavita nampihozongonzon̈o izy, fôtony tran̈o io tsara ôrin̈y.
49 Fa lan̈iany olo maharen̈y kanefa tsy man̈ano raha, mitovy amin’olo araiky niasa tran̈o kanefa tsy nan̈ano fôtotro. Ranon’ny ten̈arano nantreky mare tamy tran̈o io, ke direkty izio rongana. Tsisy raha nety nisambôrin̈y foeky tamy zio.”
Lamariky amy Pazy Ambany
^ Na: “tahom-barimbazaha.”
^ Na: “malemy.”
^ Na: “malemy.”
^ Abt: “ninarô.”
^ Abt: “ataondrô fa ratsy fan̈ahy an̈aran̈anarô.”
^ Tsy ino zen̈y fa mitraosa tsisy zana-bola.
^ Na: “mankaratsy.”
^ Na: “hankaratsin̈y.”
^ Na: “Aza vôly mamôsotro.”
^ Na: “amy zen̈y anarô hivotsaoran̈a.”
^ Na: “tsara fan̈ahy ; tia raha tsara.”
