Vaovao Tsara Nisoratin’i Lioka 7:1-50
7 Izikoa fa voavolan̈an’i Jesosy aby raha tôkony hivolan̈iny tamy vahoaka, izy niditry ta Kapernaomy.
2 Tao nisy manamboninahitry araiky zay nanan̈a mpanompo tiany mare, kanefa mpanompo io narary fatatra sady efa ho foaty.
3 Izy koa fa naharen̈y raha momba Jesosy, izy nan̈iraka sasany tamin’ny anti-pan̈ahindrô* Jiosy aby io handeha taminany tan̈y, hangataka izy ho avy ke hampajanga mpanomponany io.
4 Ke irô navy tamy Jesosy tan̈y aviô irô niangavy izy mare karaha ty: “Izy vain̈y han̈anaovanao zen̈y,
5 fôtony tiany firenenantsika ty aviô izy nan̈ôrin̈y synagogantsika.”
6 Ke Jesosy niaraka tamindrô. Fa izy koa fa tsy lavitry tany nisy tran̈o io, manamboninahitry io efa nan̈iraka namany hivolan̈a taminany karaha ty: “Tômpoko anao, anao aza misahiran̈a, fôtony zaho tsy man̈eva han̈ano karibo an-tran̈o anao.
7 Ke zen̈y mahavy zaho tsy mihevitry fa zaho vain̈y han̈aton̈o anao. Fa mivolàn̈a fo fa, ho janga edy mpanomponaka.
8 Fôtony zaho io koa mba ambany fahifan̈an’olo, sady manan̈a maramila ambany fahifan̈anaka koa. Ke zaho koa fa mivolan̈a amin’ny araiky amindrô io: ‘Mindao!’, izy efa lôso edy; zaho koa mivolan̈a amin’ny araiky hafa: ‘Mavia!’, izy efa avy edy; zaho koa mivolan̈a amy mpanomponaka: ‘Ataova ty!’, izy efa man̈ano edy.”
9 Jesosy koa fa naharen̈y raha aby zen̈y, lany fan̈ahy izy, ke izy nitodiky tamy vahoaka nan̈araka izy aby io sady nivolan̈a: “Zaho man̈ambara anarô fa, zaho mbala tsiary nahita finoan̈a maventy be ambaka zen̈y ndray tan’Israely teto.”
10 Irô iraka aby io koa fa nimpody tan-tran̈o, hitandrô fa mpanompo io efa janga.*
11 Tsy ela tafaran’izen̈y, izy nandeha tamy tanàna araiky kahian̈a Naina. Ankoatran’ny mpianatranany, nisy vahoaka marobe koa niaraka taminany.
12 Izy koa fa navy narikitry barôn’ny tanàna io, indriô nisy fatin’ny lelahy araiky nindesin’olo niboaka. Izio zaraiky fo zanakan’ny mamany, salakady viavy io lastiô efa maty vady. Nisy vahoaka marobe baka tan-tanàna tao koa niaraka tamy man̈angy io.
13 Tômpo koa fa nahita izy, izy nahinakinaka ke ho izy taminany: “Aza mitomoan̈y eky.”
14 Aviô izy nan̈aton̈o, baka iô nikasihiny raha filanjan̈a faty io, ke nidôko irô mpilanja aby io. Aviô ho izy: “A tsaiky lelahy ty, ho zaho aminao: Mitsangàna!”
15 Lelahy naty io nianko baka iô izy nanomboko nivolan̈a, aviô izy natôndron’i Jesosy tamy mamany.
16 Ke irô jiaby navozo mare, aviô irô nidera Zan̈ahary karaha ty: “Misy mpaminan̈y maventy mitsangana amintsika eto”, baka iô: “Zan̈ahary nitsinjo vahoakanany.”
17 Ke vaovao momba izy io niparitaka eran’ny Jodia jiaby ndreky tamy faritry jiaby man̈odidin̈y.
18 Ke nitantarain’ny mpianatran’i Jaona taminany raha jiaby zen̈y.
19 Jaona nikaiky aroe tamy mpianatranany, ke irô io nirahiny nandeha tamy Tômpo tan̈y han̈ontany karaha ty: “Anao ma Araiky ho avy, sa zahay mbala tôkony hiambin̈y olo hafa?”
20 Karaha ty ho irô izikoa fa navy taminany tan̈y: “Zahay nirahin’i Jaona Mpan̈ano Batisa han̈ontany anao: ‘Anao ma Araiky ho avy, sa zahay mbala tôkony hiambin̈y olo hafa?’”
21 Tamy fotoan̈a* zen̈y izy nampajanga olo marobe narary, nazon’ny aretim-patatra, nisy fan̈ahy ratsy, baka iô izy nampahita olo gila maro koa.
22 Ke ho izy tamindrô roe lahy: “Mindao tantarà amy Jaona raha ren̈inarô ndreky hitanarô aby ty: Olo gila manjary mahita, ny malemy vity mahavita mandeha, olo boka manjary madio, ny maren̈iny manjary maharen̈y raha, olo maty atsangana, baka iô olo masikiny itorian̈a vaovao tsara.
23 Sambatra lan̈iany olo tsy mahita antony hisalasalan̈a momba zaho.”*
24 Irakan’i Jaona aby io koa fa rôso, karaha ty ho Jesosy tamy vahoaka aby io momba Jaona: “Ino ma dianarô tamy tany paiky tan̈y? Nandeha nizaha bararata afikofikon’ny tsiko?
25 Va ino dianarô tan̈y? Nandeha nizaha olo misikiny lamba tsara mare?* Efa amy tran̈on’ny mpanjaka edy ahitan̈a olo misikiny lamba lafo mare sady manan̈a zay raha tiany.
26 Ke ino marin̈y ma raha ten̈a tianarô ho hita? Mpaminan̈y? Ia, zaho man̈ambara anarô fa izy mbala beben’ny mpaminan̈y.
27 Karaha ty raha efa voasoratra momba izy: ‘Mpitondra hafatranaka hirahako handeha alohanao,* ke izy han̈amboatra lalan̈a himboanao.’
28 Ambarako anarô fa, izikoa mbala olo naterakan’ny man̈angy fo, mbala tsisy be mandilatra Jaona. Kanefa zay olo farany hely amy Fanjakan̈an’ny Zan̈ahary mbala be mandilatra izy.”
29 (Olo jiaby ndreky irô mpamory hetra aby io koa fa naharen̈y zen̈y, irô nan̈ambara fa Zan̈ahary man̈ano ny rariny, fôtony irô natao batisa tamy batisan’i Jaona.
30 Fa irô Fariseo ndreky irô olo nahay Lalàn̈a aby io ndraiky tsy nijery sitrapôn’ny* Zan̈ahary momba irô, fôtony irô tsy nan̈eky hataon’i Jaona batisa.)
31 “Hampiran̈iko amin-jôvy edy olo amy taranaka ty? Azôvy edy olo mitovy amindrô io?
32 Irô io miran̈a tsaiky misaoma a bazary ndreky mifandronton̈o karaha ty: ‘Zahay efa nitsoko sodin̈y, kanefa anarô tsy nitsinjaka. Zahay efa niafatrafatra nitomoan̈y, kanefa anarô tsy nitomoan̈y.’
33 Karaha zen̈y koa, Jaona Mpan̈ano Batisa koa fa navy, izy tsy nihinan̈a môfo sady tsy nigiaka divain, kanefa ho anarô: ‘Izy misy demony.’
34 Zanak’olo ndraiky navy, nihinan̈a ndreky nigiaka, kanefa ho anarô: ‘Zahava! Angoain̈y ay, sady migiaka* koa! Izy amy zen̈y kamaradindrô mpamory hetra ndreky mpanota aby io.’
35 Kanefa, hita baka amy vokatran’ny raha ataon’olo araiky,* na izy misy jery na izy tsisy jery.”
36 Nisy Fariseo araiky tsy vôly niangavy izy hiaraka hihina aminany. Ke izy niditry tamy tran̈on’ny Fariseo io tao aviô izy nangala fipitrahan̈a* tamy latabatra.
37 Nisy viavy araiky nalaza mpanota tamy tanàna io tao naharen̈y fa izy nihinan̈a* tan-tran̈on’ny Fariseo io. Ke viavy io nitondra tavoangy vatosanga nisy menaka man̈itry.
38 Izy nandeha tafaran’i Jesosy tao, baka iô nidôko fananjò vitinany, aviô izy nitomoan̈y. Len̈in’ny ranomasonany vitin’i Jesosy, ke izio nifafany tamy fan̈evanany. Nirôfiny moramora koa vitin’i Jesosy aviô nan̈idin̈any menaka man̈itry.
39 Fariseo nikaiky izy in̈y koa fa nahita raha zen̈y, karaha ty ho izy tan̈atin’ny jerinany tan̈y: “Lelahy ty koa mpaminan̈y ankitin̈y, tôkony efa hainy azôvy man̈angy mikasiky izy io ndreky olo karakôry izio. Tôkony efa hainy fa viavy io olo mpanota.”
40 Fa ho Jesosy taminany: “A Simona, misy raha ambarako anao.” Ke izy namaly karaha ty: “Ino eky zen̈y Mpampianatra?”
41 “Nisy lelahy aroe nanan̈an’olo traosa; nin’ny araiky 500 denaria, fa nin’ny araiky ndraiky 50.
42 Fa irô tsisy vola han̈ifan̈a traosandrô io, ke nifoan̈an’ny lelahy io traosandrô jiaby. Fahitanao izy, azôvy amindrô roe lahy io ten̈a ho tia izy?”
43 Ke ho Simona: “Fahitako izy, araiky ten̈a nanan̈any traosa be.” Ho izy taminany: “Marin̈y raha volan̈inao zen̈y.”
44 Ke izy nitodiky tamy viavy io, salakady nivolan̈a tamy Simona karaha ty: “Hitanao man̈angy io? Tamy zaho niditry tan-tran̈onao tato, zaho tsy namezanao rano hanasako vity. Fa viavy io nanden̈y vitinaka tamy ranomasonany, baka iô izio nifafany tamy fan̈evanany.
45 Zaho tsy nirôfinao. Kanefa rango naviako tato, viavy io tsy vôly niôroko vitinaka.*
46 Anao tsy nan̈idin̈y menaka tamy lohanaka. Fa man̈angy io ndraiky nan̈idin̈y menaka man̈itry tamy vitinaka.
47 Zen̈y mahavy zaho mivolan̈a aminao fa, ndray maro* karakôry fahotan̈anany, voafafa aby irô io, fôtony izy be fitiavan̈a. Fa lan̈iany olo nahazo familan-keloko hely, ho hely fitiavan̈a.”
48 Aviô ho izy tamy man̈angy io: “Voavela fahotan̈anao.”
49 Nifampivolan̈a karaha ty irô olo aby nihinan̈a* niaraka taminany tamy latabatra tiô: “Azôvy loatra ma lelahy io ke man̈ambela fahotan̈an’olo?”
50 Fa ho izy tamy man̈angy io: “Finoan̈anao nan̈avotro anao. Mindao; tsaratsara ay!”
Lamariky amy Pazy Ambany
^ Na: “salama tsara.”
^ Abt: “lera.”
^ Abt: “tsy avoatsikon̈o baka aminaka.”
^ Abt: “lamba malemilemy.”
^ Abt: “man̈oloan̈a saoranao.”
^ Na: “torohevitrin’ny; tari-dalan̈an’ny.”
^ Abt: “migiaka divain.”
^ Na: “baka amy zanakanany jiaby.”
^ Na: “nandry nandriran̈a nihina”; fomban’olo tamin’ny andran’ny Baiboly nandry nandriran̈a nikodidin̈y latabatra koa fa nihina.
^ Na: “nandry nandriran̈a nihina tamy latabatra.”
^ Na: “niôroko vitinaka moramora.”
^ Na: “maventy.”
^ Na: “nandry nandriran̈a.”
