Vaovao Tsara Nisoratin’i Marka 11:1-33
11 Irô koa fa narikitry ho avy ta Jerosalema ndreky ta Betifaga aviô ta Betania, tamy Bongo Olivy, izy nan̈iraka aroe tamindrô mpianatranany aby io.
2 Ho izy tamindrô: “Mindao anarô mandeha amy tanàna hely irỳ. Miaraka anarô tafiditry ao, anarô hahita zanakan’ny borìky mbala tsiary nitingenan’olo, mirohy. Vahà izio, baka iô indesa atỳ.
3 Izikoa misy olo mivolan̈a aminarô: ‘Nan̈ino ma izio vahanarô?’, volàn̈a aminany: ‘Ilain’ny Tômpo izy ty, fa izy ty baka iô hampodiny.’”
4 Ke lôso irô, aviô irô nahita zanakan’ny borìky nirohy tamy varavaran̈a, tambelan̈a tamy lalan̈a tiô. Nivahandrô izio.
5 Kanefa sasany tamin’olo nitsangana tiô nivolan̈a tamindrô: “Nan̈ino ma zanakan’ny borìky io vahanarô?”
6 Raha nivolan̈in’i Jesosy in̈y tsarabe nambarandrô mpianatra aby io tamindrô, ke irô nambelandrô olo aby io nandeha.
7 Nindesindrô tamy Jesosy tan̈y zanakan’ny borìky io. Napetrakandrô tan̈abon’izio tiô lambandrô ambelan̈a. Jesosy baka tiô nitenginy tan̈abon’izio.
8 Naro koa olo namelatra lambandrô ambelan̈a tamy lalan̈a, fa nin’ny sasany ndraiky tahon’ny kakazo misy raviny vo nitapahan̈a baka tam-bilo.
9 Irô olo nandeha talohanany ndreky nan̈araka tafaranany aby io tsy vôly nandronton̈o karaha ty: “Mba vonjia kony izy e! Irarian̈a hahazo hatsaran̈a araiky avy amin’ny an̈aran̈an’i Jehovah!
10 Irarian̈a hahazo hatsaran̈a Fanjakan̈a ho avy, Fanjakan̈an’i Davida babanay! Anao amy lan̈itry farany an̈abo an̈y, mba vonjia kony izy e!”
11 Izy niditry ta Jerosalema, aviô izy nandeha tamy tempoly; nizahany raha jiaby nan̈odidin̈y izy. Kanefa andra efa hariva, ke izy ndreky irô 12 Lahy nandeha ta Betania.
12 Amarain’izin̈y, irô koa fa niala ta Betania, izy naharen̈y mosary.
13 Baka lavitry, izy nahita kakazo aviavy feno raviny, ke izy nan̈aton̈o izio tiô misy ahitany asa izio misy voany. Fa izy koa fa navy tiô, zahany, tsisy voany foeky izio fa raviny fo, fôtony mbala tsy leran’ny aviavy tam’izen̈y.
14 Ke ho izy tamy kakazo io: “Anò tsisy olo hihina voany baka aminao eky mandrakizay!” Irô mpianatranany aby io nitandren̈y.
15 Irô baka tiô navy ta Jerosalema. Izy niditry tamy tempoly tao, ke nanomboko nanaora olo jiaby nivarotro ndreky nivanga raha tao. Narongadrongany koa latabatrandrô mpanakalo vola aby io ndreky sezindrô mpivarotro pizon aby io.
16 Aviô tsisy olo nambelany hitondra raha mitsakatsaka mamakivaky tempoly.
17 Ke izy nampianatra irô karaha ty: “Tsy ty ma raha efa voasoratra: ‘Tran̈o fivavahan’ny firenena jiaby hikahian̈a tran̈onaka’? Kanefa ndraiky izy ty nataonarô lavaka fisitrihan’ny mpangalatra.”
18 Ren̈indrô lohandohan’ny mpisôron̈o ndreky irô mpanoratra lalàn̈a aby io raha zen̈y, ke irô nanomboko nitady fomba hamonoan̈a izy. Irô fo navozo izy, fôtony vahoaka jiaby gaga tamy raha nampianariny.
19 Andra koa fa hariva, Jesosy ndreky mpianatranany aby io niboaka baka tamy tanàna io.
20 Fa maraindrain̈y be, irô koa fa nandalo narikitry kakazo aviavy in̈y, zahandrô izio efa nalazo firaka* tamy vahatranany.
21 Tsaroan’i Petera raha nandalo in̈y, ke ho izy tamy Jesosy: “A Raby, zahava baka! Nalazo kakazo aviavy nozon̈inao in̈y.”
22 Ke ho Jesosy tamindrô: “Minoa Zan̈ahary.
23 Ambarako anarô marin̈y tsarabe fa, izikoa misy olo mivolan̈a amy bongo irỳ: ‘Mitsangàna, baka iô mitandatsaha an-dranomasin̈y an̈y’, aviô izy tsy misalasala foeky am-pônany an̈y ke izy mino fa hiboaka ankitin̈y raha volan̈iny, ho tanteraka raha zen̈y.
24 Zen̈y mahavy zaho mivolan̈a aminarô: Zay raha angatahanarô am-bavaka, minoa fa izio efa azonarô, ke izio ho azonarô ankitin̈y.
25 Aviô lera anarô mivavaka,* ambilà hadisovan̈an’olo anan̈anarô alahelo, am’izen̈y Babanarô an-dan̈itry an̈y koa han̈ambela hadisovan̈anarô.”
26 ——
27 Nimpody ta Jerosalema ndraiky irô. Tamin’izy nandehandeha tamy tempoly tao, navy irô lohandohan’ny mpisôron̈o ndreky irô mpanoratra lalàn̈a aviô irô anti-pan̈ahy aby io,
28 ke ho irô taminany: “Fahifan̈a baka aia an̈anaovanao raha aby io? Azôvy nan̈amia anao fahifan̈a han̈ano irô io?”
29 Ho Jesosy tamindrô: “Misy raha araiky han̈ontaniako anarô. Valia zaho, fa hambarako anarô edy fahifan̈a baka aia an̈anaovako raha aby io.
30 Baka an-dan̈itry sa baka amin’olombelon̈o nazahoan’i Jaona fahifan̈a han̈ano batisa? Valia zaho.”
31 Ke irô nifampikoran̈a karaha ty: “Izikoa atsika mivolan̈a: ‘Baka an-dan̈itry’, izy hivolan̈a: ‘Ke nan̈ino fo anarô tsy nino izy?’
32 Kanefa ho sakintsika ma hivolan̈a: ‘Baka amin’olombelon̈o’?” Irô baka navozo vahoaka, fôtony olo jiaby nihevitry fa Jaona in̈y mpaminan̈y ankitin̈y.
33 Ke ho irô tamy Jesosy: “Tsy hainay.” Ke ho Jesosy tamindrô: “Tsy ambarako anarô koa basy fahifan̈a baka aia an̈anaovako raha aby io.”
