Vaovao Tsara Nisoratin’i Marka 12:1-44
-
Fan̈oharan̈a momba mpambôly namono olo (1-12)
-
Zan̈ahary ndreky Kaisara (13-17)
-
Fan̈ontanian̈a momba familaoman̈a olo maty (18-27)
-
Didy aroe farany maventy (28-34)
-
Kristy ma Zanakan’i Davida? (35-37a)
-
“Mitandrema amy mpanoratra lalàn̈a” (37b-40)
-
Vola madiniky aroe namezan’ny man̈angy maty vady sady masikiny (41-44)
12 Izy aviô nanomboko nan̈ano fan̈oharan̈a. Ho izy tamindrô: “Nisy lelahy araiky nanan̈a tany namboliany rezain. Nasiany lakoro man̈odidin̈y izio. Nangady lavaka koa izy nataony famihazan̈a rezain, baka iô izy nanangana tilikambo. Aviô, tanin’ny rezain io nafôndrony tamy mpambôly, baka iô lôso izy nandeha tan-tany hafa.
2 Izikoa fa navy fotoan̈a fangalan̈a rezain, izy nan̈iraka mpanomponany araiky handeha amindrô mpambôly aby io hamory sasany amy vokatra baka amy tanin’ny rezain in̈y.
3 Kanefa mpanompo io nisambôrindrô, nibomàndrô, aviô nalefandrô nody tan̈am-polo.
4 Nandifasany mpanompo hafa ndraiky koa irô, kanefa mpanompo io nibomàndrô tamy loha, baka iô nalaindrô baràka.
5 Nandefa araiky koa izy, fa mpanompo io nivonendrô. Mbala nan̈iraka olo maro koa izy fa, sasany tamindrô io nibomàndrô, aviô sasany ndraiky nivonendrô.
6 Araiky olo tavela taminany tiô: Zanany lelahy. Zanany io tiany mare. Izio olo nalefany farany tamindrô tan̈y, fôtony ho izy: ‘Irô tsy maintsy han̈aja zanako.’
7 Kanefa irô mpambôly aby io nifampikoran̈a karaha ty: ‘In̈y mpandova ay! Alô vonentsika izy, am’izen̈y ho azontsika lova.’
8 Ke nisambôrindrô izy, baka iô nivonendrô, aviô nantsoritsoritindrô tambelan̈an’ny tanin’ny rezain io.
9 Ino raha handeha hataon’ny tômpin’ny tanin’ny rezain io? Ho avy izy, ke hivoneny irô mpambôly aby io, baka iô tanin’ny rezain io amezany olo hafa.
10 Mbala tsiary nivakianarô tamy Soratra Masin̈y tao ma fa ‘vato tsy nasiandrô mpan̈amboatra tran̈o aby io fôtiny edy nanjary vato fehizoro farany maventy’?*
11 Mbala tsiary nivakianarô koa ma fa ‘baka amy Jehovah raha zen̈y salakady maharikian̈a atsika’?”
12 Ke irô tihanambotro izy, fôtony haindrô baka fa irô izy tan̈atin’ny jerin’i Jesosy tamin’izy nan̈ano fan̈oharan̈a io. Fa irô fo navozo vahoaka ke nialàndrô izy, baka iô lôso irô.
13 Aviô, nalefandrô taminany tan̈y sasany tamindrô Fariseo ndreky sasany tamindrô olo aby an̈isan’ny antòko mpanaohan̈a Heroda, fôtony irô tihamandriky izy baka amy raha volan̈iny.
14 Irô olo aby io koa fa navy, ho irô taminany: “A Mpampianatra, hainay fa anao mivolan̈a ny marin̈y fo, baka iô anao tsy mitady rady amin’olo, fôtony anao tsy man̈avakavaka olo, aviô marin̈y fo koa raha ampianarinao momba Zan̈ahary. Mety sa tsy mety* man̈efa latety* amy Kaisara?
15 Tôkony han̈efa ma zahay sa tsy tôkony?” Hain’i Jesosy fa irô mihatsaravelatsihy, ke ho izy tamindrô: “Nan̈ino ma anarô mitsapa jery zaho? Itondrasa denaria araiky zaho zahako.”
16 Nitondrasandrô araiky izy, baka iô ho izy tamindrô: “Sarin-jôvy io, baka iô an̈aran̈an-jôvy io?” Ho irô taminany: “Nin’i Kaisara.”
17 Ke ho Jesosy: “Ifà amy Kaisara edy basy rahan’i Kaisara, fa ifà amy Zan̈ahary ndraiky rahan’ny Zan̈ahary.” Lany fan̈ahy irô naharen̈y raha nivolan̈iny.
18 Baka iô nan̈aton̈o izy irô Sadoseo aby io. Irô io mivolan̈a fa familaoman̈a olo maty zen̈y tsisy. Irô nan̈ontany izy:
19 “A Mpampianatra, Mosesy nanoratra tamintsika fa izikoa lelahy araiky maty kanefa izy tsy niteraka, rahalahiny tôkony han̈ainga vadin’ny lelahy naty io, am’izen̈y lelahy naty io hahazo taranaka.
20 Nisy olo fito mirahalahy. Nanambady araiky voanalohany, kanefa izy naty tsy niteraka.
21 Ningain’ny araiky faharoe vadin’ny rahalahiny in̈y, kanefa izy koa mba naty tsy niteraka. Nan̈ano karaha zen̈y koa araiky fahatelo.
22 Samby tsisy niteraka irô fito mirahalahy. Tamy farany, naty koa man̈angy io.
23 Ke lera olo maty hivilômin̈y, azôvy amindrô hanjary vadin’ny viavy in̈y? Samby efa nanambady izy aby baka irô fito.”
24 Ho Jesosy tamindrô: “Tsy zen̈y ma ny raha mampadiso hevitry anarô, fôtony anarô tsy vitany tsy mahay Soratra Masin̈y fa mbala tsy hainarô koa angôvon’ny Zan̈ahary?
25 Lera olo maty atsangana baka, lelahy tsy han̈ainga aviô man̈angy tsy hingain̈a, fa irô hanjary miran̈a anjely an-dan̈itry an̈y.
26 Fa momba olo maty atsangana zen̈y, mbala tsy nivakianarô amy bokin’i Mosesy ao, amy fitantaran̈a momba raha maniry feno fatsiky in̈y ma raha nivolan̈in’ny Zan̈ahary taminany ty: ‘Zaho Zan̈aharin’i Abrahama ndreky Zan̈aharin’i Isàka aviô Zan̈aharin’i Jakoba’?
27 Izy tsy Zan̈aharin’olo maty, fa nin’ny velon̈o. Anarô ten̈a diso hevitry.”
28 Nisy mpanoratra lalàn̈a araiky nan̈aton̈o, ke ren̈iny irô niady hevitry. Izikoa fa hitany fa vitan’i Jesosy tsarabe namaly irô, izy nan̈ontaniany: “Ino didy voanalohany* amy didy jiaby?”
29 Ho Jesosy: “Ty ny voanalohany: ‘A Israely, tandrin̈esa ty: Jehovah Zan̈aharintsika io, Jehovah araiky fo.
30 Ke tiava Jehovah Zan̈aharinao amy fônao jiaby ndreky amy vatan̈anao jiaby ndreky amy jerinao jiaby aviô amin’ny angôvonao jiaby.’
31 Ty araiky faharoe: ‘Anao mila tia olo karaha ataonao tia ain̈inao.’ Tsisy didy maventy mandilatra irô io.”
32 Ho mpanoratra lalàn̈a io taminany: “A Mpampianatra, tsara raha volan̈inao zen̈y, sady marin̈y tsarabe: ‘Izy araiky fo, aviô tsisy ambaka izy.’
33 Baka iô fitiavan̈a izy amy fô jiaby ndreky amy jery jiaby ndreky amin’ny angôvo jiaby, aviô fitiavan̈a olo karaha fitiavan̈a ain̈in-ten̈a, mbala valera lavitry mandilatra fan̈atitry iroan̈a ndreky sôron̈o jiaby.”
34 Hitan’i Jesosy fa lelahy io nahay namaly, ke ho izy taminany: “Anao tsy lavitry Fanjakan̈an’ny Zan̈ahary.” Tsisy olo nasaky nan̈ontany raha izy eky tafaran’izen̈y.
35 Kanefa, tan̈atin’i Jesosy mbala nampianatra tamy tempoly in̈y fo, izy nivolan̈a: “Nan̈ino ma irô mpanoratra lalàn̈a aby io mivolan̈a fa Kristy io zanakan’i Davida?
36 Nitaritin’ny fan̈ahy masin̈y i Davida, ke nivolan̈a: ‘Ho Jehovah tamy Tômpoko: “Anao mipitraha ankavanan̈anaka eto parapan̈anaovako fahavalonao ambanin’ny vitinao.”’
37 Ndray Davida fo nikaiky izy Tômpo, ke akôry mampa zanany izy am’izen̈y?”
Namparavoravo irô vahoaka aby io nitandren̈y izy.
38 Tamin’izy mbala nampianatra in̈y, karaha ty ho izy: “Mitandrema amy mpanoratra lalàn̈a; irô io tia mandehandeha misikin̈y rôbo lava ndreky hataon’olo mbalatsara a bazary
39 aviô mahazo plasy aloha* amy synagoga ndreky plasy farany mihaja amy fihinanan̈a harivariva.
40 Ritrivindrô fanan̈anan’ny* man̈angy maty vady, aviô irô man̈ano vavaka lava be fôtony irô tiho hita. Mareren’ny* sazy ho azon’olo hafa sazy ho azondrô.”
41 Baka iô izy nipetraka fananjò irô raha fandatsahan̈a vola aby io, ke nidinihiny fomba fandatsahandrô olo aby io vola tan̈atin’ny raha aby io. Maro olo mpan̈arivo nandatsaka vola madiniky maro.
42 Nisy man̈angy maty vady sady masikiny navy, ke nandatsaka vola madiniky aroe ambany valera mare.*
43 Ke nikahiany taminany tiô irô mpianatranany aby io, baka iô ho izy tamindrô: “Ambarako anarô marin̈y tsarabe fa, man̈angy maty vady sady masikiny io ny ten̈a nandatsaka be mandilatra olo hafa jiaby nandatsaka vola tamindrô raha fandatsahan̈a vola aby io.
44 Fôtony irô jiaby nandatsaka lambilambin’ny vola tsy lanindrô aby, fa man̈angy io ndraiky, ndray masikiny, izy nandatsaka raha jiaby nanan̈any, tsy ino zen̈y fa raha jiaby ivilaomany.”
Lamariky amy Pazy Ambany
^ Abt: “lohan’ny zôro.”
^ Na: “Mahazo sa tsy mahazo.”
^ Na: “hetra isaka lohan’olo.”
^ Na: “farany be.”
^ Na: “plasy faran’ny tsara.”
^ Abt: “Hoanindrô tran̈on’ny.”
^ Na: “Mavesavesatran’ny.”
^ Abt: “leptona aroe, tsy ino zen̈y fa kadràna araiky.”
